กำลังแสดงผล 1 ถึง 6 จากทั้งหมด 6

หัวข้อ: พร 10 ข้อที่พระนางผุสดีเพิ่นขอในกัณฑ์ทศพร

Threaded View

คำตอบที่แล้วมา คำตอบที่แล้วมา   คำตอบถัดไป คำตอบถัดไป
  1. #1
    แบ่งปันความรู้และประสบการณ์ สัญลักษณ์ของ กะแยงนา
    วันที่สมัคร
    Apr 2009
    กระทู้
    211
    บล็อก
    2

    พร 10 ข้อที่พระนางผุสดีเพิ่นขอในกัณฑ์ทศพร

    ผุสดีนางได้สิ้นบุญเก่าที่ทำมา จั่งได้ไลจากปรางค์จากสวรรค์เวียงแก้ว นางได้เบิ่ดบุญแล้วกะจำใจสิได้ห่าง สิได้ไลละข้างลาล้างคุซุแนว อยู่บ่ได้อีกแล้วจั่งเอื้อนแอ่วขอพร เป็น 10 ตอนพระพรทิพย์จากพระอินทร์อวนอ้าย ..
    เคยได้ยินผุเฒ่าเพิ่นว่าไผ๋สิเป็นเจ้าภาพกัณฑ์เทศน์ในการเฮ็ดบุญผะเหวดบ้านเฮาเจ้าภาพกัณฑ์แรกคือคือกัณฑ์ทศพรแพงกว่ากัณฑ์อื่นแนจั่กหน่อยเพราะเป็นกัณฑ์เริ่มละกะเป็นกัณฑ์ที่มีความเชื่อว่าขอพรได้ตั้ง 10 ข้อ (ประมาณว่าขอได้หลายจ้า) เคยสงสัยวาพระนางผุสดีเพิ่นขอหยังแนเพิ่นขอต่างจากเฮาๆที่ขอกันบ่? มื่อนี้กะเลยถอดพระพรที่พระนางเพิ่นขอออกมาจากเสียงแหล่ของพระอาจารย์สุริยาธัมวังโส มาสู่พี่น้องอ่านกันจ้า
    บัดนี้ อาตมาสิกล่าวต้านกระแสเรื่องคำกลอน ทศพรกัณฑ์กกยกประเดิมดาซ้อน ตามคำสอนชาดกแหล่กระแสธรรมล้ำค่า กล่าวถึงนางเทพฟ้าผุเมียเหง้าท่านพระอินทร์ ผุสดีนางได้สิ้นบุญเก่าที่ทำมา จั่งได้ไลจากปรางค์จากสวรรค์เวียงแก้ว นางได้เบิ่ดบุญแล้วกะจำใจสิได้ห่าง สิได้ไลละข้างลาล้างคุซุแนว อยู่บ่ได้อีกแล้วจั่งเอื้อนแอ่วขอพร เป็น 10 ตอนพระพรทิพย์จากพระอินทร์อวนอ้าย
    ข้อหนึ่งนั้น ยามเมือนงค์นางย้ายลงไปมนุษย์โลก ขอให้โชคมิ่งล้นได้ไปซ่นพ่อพระยาเป็นธิดาเจ้าฟ้าสนุกก่อกองกุศล บำเพ็ญตนให้ปรากฏประโยชน์ผลคนย้อง
    ข้อที่สองให้งามเยี่ยมดวงตานิรเนตร คือดั่งตาลูกเนื้ออย่าขาวขุ่นเจ้าขุ่นมัว บาดนางหลิงแลเยี่ยมไผ๋มองให้มิ่งเมือย เทิงฮักเทิงอยากได้แลแล้วเปิดบ่เป็น
    ข้อสามนั้น ขอให้คิ้วคาดโค้งโก่งดังคันศร ขนตางอนงามลับเลิศวิลัยบาดแลเยี่ยม ยามชายแลสิ่งลิงนำให้มักห่อ ยิกคิ้วต่อแต่ละครั้งพออยากล้มถั่งตาย
    ข้อสี่นั้น ยามทวิโยกย้ายดอกตายจากเมืองแมนไปสู่แดนเมืองมนุษย์ ให้ชื่อผุสสดีนี่ ถึงโลกีย์แดนใต้เมืองได๋กะตามซาง ผุสสดีซือนี้อย่ามีให้เปลี่ยนแปลง
    ข้อห้านั้น ขอให้ลุทิแม้นเกิดราชบุตรา ผู้ที่มีบุญผลาดอกลืนคนทั้งไค้ ชาติต่อไปให้ถึงใต้โพธิญาณอันล้ำค่า ขอให้เป็นมารดาของพระพุทธเจ้า ผัวเหง้าให้ใคร่ครวญ
    ขอหกนั้น วรกายให้เลิศล้วน สมส่วนบาดทรงครรภ์ ฉวีวรรณดูสวยดังบ่ทันมีท้อง อย่าคือหญิงในห้องโลกาพื้นแผ่น อยู่ในแดนโลกใต้ให้ลือแท้แต่พระนาง
    ข้อเจ็ดนั้น สองถันสวยสล้าง ปูนเปียกจูมทอง ถันทั้งสองดูเต็ม เต่งตึงงามเยี่ยม เทียมดังสาวสวรรค์ฟ้า ถึงชรากะอย่าหย่อน ชูสลอนเต่งเต้ายามเฒ่ากะอย่ายาน
    ข้อแปดนั้น เกศาดำสะอาดอ้าน ประดุจเปรียบภูมรา แก่กายมากะดำดีหงอกอย่าแซมซอนได้ ขอให้ดูดีด้วยสวยเป็นธรรมชาติ คือจั่งวาดแต่งแต้มงามโก้ กว่าผุได๋
    ข้อเก้านั้น สังขาราโลกใต้กายบ่จีรังกาลจริงแหล่ว จงบันดาลกายนางให้ก้องงามนามเฟื่อง ผิวขาวเหลืองนวลเนื้อให้สวยงามตามเก่า ชรากาลกะอย่าเศร้า กายน้องให้ผ่องใส
    ข้อสิบนั้น ถือเป็นเอกลักษณ์ไว้ปัญญาเลิศ สมองดี ไผ๋ผุมีเวรเคราะห์ผูกพันธนาร่าง ขอให้ปัญญาน้องตรองตามได้ฮู้ฮ่อง เปิดป่องแก้มไขให้ได้ปล่อยไปนั่นเถาะนา...พี่พระองค์
    องค์อินทราธิราชไท้เลยประสาทพรทิพย์ 10 ประการดั่งนางขอคุซุแนวประทานสิ้น พอพระอินทร์ประทานหล่า จบคาถา 19 ท่อน เป็นอันวาทศพรกะจบลงทอนี้ดอกเพียงหน่อยบ่หลาย

    อ่านจบแล้วบางข้อกะอยากขอคือเพิ่นอยู่เนาะ ว่าบ่จ้า?

    พร 10 ข้อที่พระนางผุสดีเพิ่นขอในกัณฑ์ทศพร
    เครดิตภาพจากปฏิทินรีเจนซี่ // ขอบคุณค่ะ
    แก้ไขครั้งสุดท้ายโดย กะแยงนา; 08-09-2011 at 14:24.

กฎการส่งข้อความ

  • You may not post new threads
  • You may not post replies
  • You may not post attachments
  • You may not edit your posts
  •