ขออนุญาติฝากให้ พลายแก้วจ้า "ชุดมรดกอีสาน" เกลาให้นำเด้อจ้า

[ข้าวต้มมัด]

มรดกแต่เค้า ของเก่าเอามาแปง
มาซ่อยกันเบิ่งแงง แต่งอีสานให้มันโก้
วัฒณธรรมเฮ็ดโจ้โก้ โฮ่พี่น้องให้มาเบิ่ง
ศิลปะบันเทิงพื้นบ้าน ตำนานต้านดอกม่วนหลาย
เสียงพิณแคนโปงลางห่าว อีสานซาว์ต้าวแล้วม่วน
ซวนให้คิดอยากย้อน รำฟ้อนหากม่วนดี แท้แหล่ว

ประเพณีฮีตอีสานเค้า วัฒณธรรมเก่าสืบไว้ต่อ
ทอผ้าไหมลายผ้าขาวม้า สิ่นต่งหนาผ้าสโล่ง
อยู่ดำรงค์พงษ์เผ่าเชื้อ เหนือก่ำถิ่นเดิม
มาซ่อยเสริมซ่อยสร้าง นำกัน นั้นแหล่ว

พุทธรรมนำเติม โบราณกาลต้านกล่าว
ถิ่นอีสานการเค้า ดินแตกไหง่ผง
แต่น้ำใจโฮงเหลือล้น คนต่างบ้านได๋สิท่อ
ออนซอนน้อ พ่อแม่ลุงป้า บ่เห็นหน้าหากคนิง แท้แหล่ว


มรดกก่ำเกินล้าน ฮีตสานต่อประเพณี
เชิดชูเกีรติและศักดิ์ศรี ศรีอีสานเติมแต่งแต้ม
ซอยกันแซมซ่อยกันซ้วน ทุกกระบวนให้ยอดต่อ
ห่วงแหนน้อผุไต่เต้า คนสิเข้ามาเบิ่งแงง พี่น้องเอย

[หนึ่ง]

อยากแต่งผญาเป็นคือข้าวต้มมัดจัง แต่บ่อค่อยแตกฉานภาษาอิสานลึกๆ..เลย

[ข้าวต้มมัด]

ค่อยๆฝึกไปจ้าหนึ่ง ข้าวต้มมัดกะบ่เป็นคือกันจ้า แรกๆ

คำอีสานฮากเหง่าก็บ่ค่อยฮู้จ้า มาฝึกใหม่

ผญ๋าของข้าวต้มมัดบ่คมคือพวกพี่ๆๆเพิ่นดอกจ้า

ฝากไว้ให้อ่านถือว่าเอกลักษณ์ไผ๋มันเนาะ

[พลายแก้ว]

ม่วนแล้วครับเพื่อน สุดยอดครับ บ่กล้าเกลาให้ดอกครับ ดีแล้วครับผม เหมาะสมครับท่าน..อิอิ

...แจมนำแน่เด้อ เพื่อนรัก...

มรดกอันเลิศล้ำ วัฒนธรรมอันสูงค่า
ภูมิปัญญาอันเพริศแพร้ว แนวเนื้อหน่ออีสาน
ศิลปะพื้นบ้าน ตำนานศาสตร์กวีศิลป์
คู่แดนดินถิ่นหมอลำ อารยธรรมให้หวงไว้
เป็นปัจจัยอันดีล้น สู่อนุชนค้นต่อ
พอได้สืบต่อเรื่อง หนุนเนื่องหน่อแนว...

[ข้าวต้มมัด]

อิอิ เอิ้นท่านคือเนาะเพื่อน พลายแก้ว จะของแต่งสั้นๆกะม่วนจ้า

[pcalibration]

.......มาแจมนำเด้อ.น้องข้าวต้มมัด..เขียนไปโลดหล่าแนวได๋มันดี
จักกล่าวย้อนปางก่อนมานาน แดนอีสานกันดารทุกข์ยาก
ควมลำบากปู่ย่าตายาย เผิ่นขนขวายพากันสร่างก่อ
เฮ็ดตูบต่อแปงบ้านเป็นเมือง ใสเรืองเรืองฮุ่งเฮืองมาพี้
เฮาจั่งมีของดีเผยแผ่ เรื่องเก่าแก่นับแต่บูราณ
สืบตำนานกล่าวขานภาคพื้น มีล้นหลื่นหลายหลากเนืองนอง
แม่น้ำของชีมูลไหลหลั่ง หม่องฮากหยั่งเป็นอู่ปู่นอน
แสนอาวรณ์บุญคุณหนุนเค้า ลูกและเต้าสืบหน่อแทนแนว
จดเมืองแกวลาวญวนอวนหมู่ พากันอยู่หลายฟ้าหล่าปี
ย้อนเฮามีของดีล้ำค่า แต่บรรพพาจนฮอดซู่มื้อ
พากันจื่อจำไว้เด้อคำ เสียงหมอลำพิณแคนยังเป่า
การบอกเหล่าดินแดนอีสาน เป็นตำนานเล่าขานไปต่อ
เอาส่ำนี่หละน้อขอลงไว้ก่อน..ท่นั่นแหล่ว...
:l-:,1-:,1-:,1-:l-

[ข้าวต้มมัด]

ขอบคุณจ้าอ้ายพี สำหรับกำลังใจ

[chudhancock]

ลูกข้าวต้มมัดเอ๋ย มรดกตกทอด มาฮอดฮุ่นคราวโหลน
คั่นสุคนมาซ่อยกัน ซุมฮุ่นหลานมาซ่อยค้ำ
วัฒนธรรมกะบอสิ้น ภาษาศิลกะบอเสื่อม
พากันเฮียนสืบฮู้ ฮักษายู้ซ่อยเสริม
อีสานเดิมแต่ดนเค้า ผู้เฒ่าเหลาเซิงปัญยา
แหลมคาถาเป่าคารม เอาคำคมมาขานต้าน
ฮุ่นลูกหลานให้จำไว้ อีสานไทยที่คนส่า
ศูญผญามาแต่เค้า อีสานเหง่าแก่นผญา แท้แหล่ว

มาแจมนำลูกจ้า บอม่วนกะเดิมให้แม่แนเด้อลูก อิอิอิอิ

[ข้าวต้มมัด]

คุณแม่(ป้าลำซิ่ง)กะว่าไปน้อ แม่เก่งยุแล้วบ่ได้เติมหยังดอกจ้า ซวดๆๆๆๆ