สวัสดีพี่น้องบ้านมหาดอทคอมซู๋คนจ้า
พอดีช่วงนี้มีเวลาไปซอกพ้อกล่องใส่ผ้าพันคอที่ถักแล้วบางส่วน
และกะยังมีปลอกหมอนที่ยังถักบ่แล้ว
รวมไปถึงไหมพรมหลากสีนำ แล้วกะเฮ็ดให้คึดพ้อว่า
ตกมาปีนี้ทันมีเวลาไปจับหรือถักต่อให้แล้วเลย
จักเวลาหายไปไสเบิด บ่ซั่นกะเป็นข้ออ้างของคนคร้านเนาะจ้าพี่น้อง
มื้อนี้กะเลยเอาฝีมือบางส่วนมาให้พี่น้องบ้านเฮาที่สนใจงานเย็บปักถักร้อยนำกันได้เบิ่ง
และซ่อยกันติชมจ้า ออกโตไว้ก่อนว่า ฝีมือบ่ทันได้เข้าขั้นเด้อจ้า
อาศัยว่าใจมักพานะ แล้วขามป้อมกะมีจุดอ่อนอีกข้อหนึ่งกะคือ
อ่านแพทเทิร์นในหนังสือที่หลายๆ นิตรสารเพิ่นได้ลงไว้บ่เข้าใจจ้า
แต่ถ้าได้นั่งเบิ่งเพิ่นถักโตต่อโตนี้เฮ็ดได้จ้า แหะๆ
แล้วอีกประการหนึ่งกะคือ แพ้ทางหลายๆ กับการถักประเภทถักต่อดอกนี่จ้า
ถักแล้วๆ กะบ่ค่อยมีโอกาสได้ใช้จ้า ย้อนว่าเกาะสมุยบ่มีหน้าหนาว
กะเลยถักเป็นของขวัญให้ญาติสนิทมิตรสหายในโอกาสต่างๆกันไป
จักผู้เพิ่นได้ดีใจหรือว่ารับไว้ย้อนความเกรงใจกะบ่จัก
ผ้าพันคอลายนี้ใช้เข็มโคร์เชต์ถักจ้า
ใช้เวลาดนก่อแบบแรก กว่าจิแล้วผืน
แล้วกะเหมาะกับมอบให้พี่น้องทางไกลที่เพิ่นหนาวระดับติดลบ
มีเทิงแบบสีล้วนและเป็นลวดลาย
อันนี้กะแล้วแต่ผู้มักจ้า
สำหรับพี่น้องที่สนใจวิธีการถัก ถ่าจักหน่อยเด้อจ้า
ให้ขามป้อมไปทบทวนจักคราวก่อน บ่ได้ถักดนหลายกะลืม แหะๆ
ขอบคุณพื้นที่จากเว็บบ้านมหาดอทคอมจ้า
Bookmarks