สวัสดีครับพี่น้องสมาชิกบ้านมหาตลอดถึงผู้เยี่ยมชมทุกท่าน
กระทู้นี้กะบ่มีหยังหลายดอกครับ เป็นกระทู้อาหารอิสานรสเด็ด
ที่ผมเคยกินแต่ตอนเป็นเด็กน้อย จำได้ว่าเฒ่าแม่เป็นคนเฮ็ดสู่กิน
เมนูนี้เกิดขึ้นได้ในมื้อนี้ตอนแลงของมื้อนี้ล่ะครับ ( 02 ตุลาคม 2554)
สดๆ ฮ้อนๆ หาก่อแยกย้ายกันไปครับ
พอดีได้รับการติดต่อมาจากท่านนายห้างฯ ว่ามีแนวมาเซอร์ไพร์ส
ผมกะถ่าอยู่ตลอดว่าจั่งได๋กะได้กินแท้เด้อหมากทุเรียน
แต่ว่าผิดคาด สอบถามได้ความว่า เพิ่นซิดเบ็ดได้ปลาค่อน้อย
ขนาดท่อโป้มือหลายสิบกว่าโต กับปลาเข็งน้อยประมาณเจ็ดโต
พี่น้องที่ติดตามกระทู้บ้านมหาทะเลใต้มาตลอด กะสิเห็นว่าท่านนายห้างฯ
หากินหมานมาตลอด บ่ว่าสิเป็น ซิดเบ็ด แหย่ไข่มดแดง หาบ่หมานแหน่แต่แฟนว่าซ้านเพิ่นว่า
ย้อนว่าปลาโตน้อยโพด คันสิแกง สิป่นกะพอกะเทิน แม่ครัวเพิ่นเลยว่าหมกใส่ใบตองย่างไฟแบบอิสานบ้านเฮา เพราะว่าบ่ได้กินดนแล้วพานะ
สำหรับไข่มดแดงก้อยกินดู๋แล้ว พอดีไปได้ผักหวานมาตะโลตัส กะเลยคึดว่าแกงซดน้ำคือสิดีว่าซั่นเด๊ะ แม่ครัวกะจัดให้ครับ
ขอรวบรัดตัดตอนมาที่ภาพแนวกินตอนสุกแล้วเนาะครับ จากฝีมือแม่ครัวคนเก่งของคุ้มฯครับ กะได้เมนูออกมาหน้าตาตามภาพครับ
หมกปลาหมกได้สามหมกพอดีครับ พากันกินแค่สองหมก อีกหมกหนึ่งฝากไปให้ข้าวเหนียวกะหมูปิ้งครับ เพราะเพิ่นติดภาระกิจบ่สามารถมากินนำได้
อิ่มหนำสำราญกันไปครับ สำหรับเมนูแซบๆ ต้นเดือนตุลาคมครับ
มีเทิงอาหารเปรี้ยวอาหารหวานปิดท้ายครับครบสูตร
ขอขอบคุณท่านนายห้างฯ ผู้หากินหมาน
ผมแอบตั้งความหวังไว้นิดๆว่ามื้อหน้าหวังว่าคือสิได้กินน้ำเอ๊าะเจ๊าะบักปากเป(ป่นกบ) เพราะได้ยินข่าวว่าเพิ่นสิเมือบ้านช่วงปลายเดือนครับ
เป็นเมนูที่อยากกินอีกเมนูหนึ่งครับ ที่มาของน้ำเอ๊าะเจ๊าะบักปากเป มีนิทานเล่าไว้อยู่ครับ แต่บ่ทันขอเว้าในกระทู้ดอกครับ ย้านพี่น้องขี้คร้านอ่าน
หมายเหตุ ช่วงนี้ไข่มดแดงอยู่เกาะสมุยกำลังหลายครับ
เทียบได้กับบ้านเฮากะคือเดือนสามเดือนสี่นี่ล่ะครับ
บักม่วงเบากะกำลังออกครับ เป็นบักม่วงพันธ์พื้นเมืองของเกาะสมุย
Bookmarks