ข้าวต้มหมก ,ขนมหมก , ขนมเทียน

[บักขามป้อม]

สวัสดีทักทายพี่น้องบ้านมหามื้ออกพรรษาซู่คนจ้า
หลังจากที่เซาไข้แล้วกะเกิดอาการผีเป้าผีโพงจ้า กินทุกอย่างขวางหน้า
กินข้าวแซบปานหยัง แล้วกะคึดหาแต่แนวกิน

รายการสำหรับวันอาทิตย์ที่ผ่านมากะคือ "ข้าวต้มหมก , ขนมหมก" หรือว่าขนมเทียนนั่นเอง
วางแผนไว้ล่วงหน้าเป็นอาทิตย์ โดยได้รับการซ่อยเหลือจากเชฟเอาใบตองหลังบ้านมาให้






วัตถุดิบกะบ่มีหยังหลายจ้า ถั่วเขียวผ่าซีก น้ำตาล กะทิ แล้วก็สาคูจ้า
เวอร์ชั่นนี้บ่ใช้แป้งข้าวเหนียว ใจจริงอยากได้สาคูใบเตย แต่ว่าบ่มีกะเลยได้สาคูขาวธรรมดา
จัดเต็ม สองถุงไปเลย พี่น้องหลาย




จัดการนึ่งถั่วเขียวผ่าซีกที่แช่น้ำไว้ตะมื้อคืนนี้ให้สุกซะก่อน








เอากะทิใส่กระทะตั้งไฟให้แตกมันจักหน่อย
ใส่น้ำตาล หยุมโอ๊ะหยิบเกลือใส่หน่อยนึง แล้วกะเอาถั่วเขียวลงไปผัดให้เข้ากัน
ผัดจนน้ำกะทิงวด ถั่วเขียวแข่นดีแล้วกะตักใส่ซามไว้




ตามสูตรเพิ่นต้องเอาสาคูผ่านน้ำคราวหนึ่ง พอให้ปั้นได้
แต่ว่าเฮ็ดหลายอย่างกะลืมคราว สาคูอยู่ในน้ำดนโพด จักสิได้กินบ่ดอก ฮ่าๆ




พอดีซอกพ้อเม็ดงา ยังอยู่หน่อยนึง กะเลยเอางามาคั่วใส่นำสิได้หอมตึ่มกัน



มีฮอดผู้ขอซิมไส้ขนมพานะ
คึดพ้อตะเป็นเด็กน้อยนั่งเฝ้าผู้เฒ่าเพิ่นห่อข้าวต้ม
เพิ่นกะตักไส้ขนมใส่กะโป๋บักพร้าวที่ขูดเอาบักพร้าวออกแล้วให้
ย้อนว่าย่างไปย่างมา วนอยู่นั้นผู้เฒ่าเพิ่นย้านข่วมใบตอง ข้าวต้มสิบ่สุก








พอตะได้ใบตองมา กะเริ่มห่อกันโลด
สาคูเละโพดปั้นบ่ได้กะเอาช้อนตักเอา
ต้องใช้เทคนิคนิดหนึ่งในการเอาไส้ไว้ตรงกลาง ฮ่าๆ





แล้วๆ ถาดแรก จัดการเอาไปนึ่งได้เลยบาดทินี้
ลุ้นๆ ขนมหมกสิออกมาหน้าตาแบบได๋





ผลออกมาเป็นจั่งซี้ กินได้อยู่จ้า ว่าแม่นสิได้ถิ่ม แหะๆ
เนื้อสาคูกะเด้งดึ๋งๆ ดี เสียแต่ว่าหน้าตาบ่งามเลย บ่เห็นสาคูเป็นเม็ดๆ
เอาไว้โอกาสหน้าแก้โตใหม่เนาะพี่น้องเนาะ ฮ่าๆ

ขอบคุณพื้นที่จากบ้านมหาดอทคอมจ้า

หมายเหตุ ::.. ถั่วเขียวผ่าซีกเป็นชื่อทางการค้า แต่ถ้าซื้อในตลาดจะนิยมเอิ้น ถั่วเหลือง