ลมหนาวผิวพัดผ่าย ปลายสิบเอ็ด ข้าวพวมก่อง
แจนแวน แวดแวดฮ้อง เอิ้นหาคู่ สู่สม
ลมเย็นเย็นตอนเช้า คุมมุมมัว เหมยหมอก
ออกหาเก็บปลาค่อน้อย บืนคาต้อน ลาดหลุม
ซุมนกยาง นกเจ่าดั้ง บินจากฮัง เทียวจอบส่อง
หม่องได๋มีน้ำข่อน มันบินเจ้ย โฉบลง
สับกินบักหอยโข่ง ซิว ปู กุ้ง แมงอีด
เสียงกระเต็น หวีดหวีดฮ้อง บินแส่วเซิ่นซิว
ฮวงข้าวปลิว ไหวฝั่น พันกัน ย้อนลมปั่น
หัวลมหนาว โบกจั้นจั้น หมุนติ้ว ไง่ระงม
โฉมเอ้ยโฉมแพงอ้าย ไปไสน้อ ซ่างบ่ต่าว
ถิ่มอ้ายบ่าวให้อยู่บ้าน นอนไข้ ป่วยใจ
หรือเจ้ามีใหม่ซ้อน ถิ่มบ่อน เจ้าเคยนอน แล้วบ้อ
หรือบังอร ลืมลังคน ผู้ที่ทน รอคอยน้อง
เดือนสิบสองกำลังย่าง มาเด้อนาง มาเกี่ยวข้าว ซ่อยอี่แม่
มาแป๋เบี้ยผักกาดแซ่ ปลูกกระเทียม กาดกระจ้อน เอาไว้ กับป่นปลา
ปลูกผักซี ผักคะน้า เอาให้แม่ ถ่าไปขาย
บักถั่วลาย ถั่วฝักยาว ถ่าไต่เครือ นำค้าง
บ่มีนาง มาปักไม้ ถั่วบ่มี ค้างสิไต่
หอมหัวใหญ่ เบี้ยกะหล่ำ หิวน้ำ เหี่ยวเฉา
ใต้ทูปเล้า ยังถ่าอุ่น มาดังจุด
นึ่งข้าวเหนียวใส่กระติบ ไปทอดถวย พระคุณเจ้า
อีพ่อลาวกะเทิงฟ้าว เอาควาย ออกจากคอก
ตอกลิ่มจวน ดังเปิ้งเปิ้ง บักลายโจ้น กะตื่นโตน
ลมบนซาตอนเช้า ว่าวสะนู ดังทืดทืด
เสียงบ่หอง คือดั่งตอนข่อนสิแจ้ง เสียงบ่ห่าว ม่วนหู
เพิ่นญาคู ผ่านหน้าบ้าน อ้ายอยากให้นงคราญ มาตักบาตร ฮ่วมกับพี่
สร้างบุญบารมี ลังเทื่อได้ ฮ่วมห้อง เคียงข้าง คู่สอง
กลับมาสาเด้อน้อง เดี๋ยวนี้งานกินดอง ของไทบ้าน กะหลายคู่
อย่าให้อายเขาเด้อ “ว่า..สาวผู้ดีนี้ขาดซู้ คาค้าง อยู่คาน” ... หล่าเอ้ย
:,1-
Bookmarks