"ยามเมื่อสายลมต้อง หัวลมหนาวเข้ามาผ่าน
ทั้งอาหารการกินพร้อม ออกสรรสร้างฮ่วมกัน
มีทั้งมันเผือกต้ม สิ่งผสมกล้วยปิ้งหน่วย
น้ำกะบวยกะเย็นจ้อย หนาวยะเยือกบัดดื่มกินพี่น้องเอ้ยย"
มาแบบกลอน อิหยังบุ๊จ้าพี่น้อง บ่มีหยังหลาย แบบว่ามื้อนี้ได้รับของฝากจากทางบ้าน(สีเกด)หลายอย่างหลายแนว
กะเลยคึดพ้อตอนเป็นเด็กน้อยๆ แล้วพออยากย้อนเวลากลับไปอีกรอบ(เมื่อ 20 ปีที่แล้วตอนนั้น 8-9 ขวบ) แล่นเล่นนำท่งไฮ่ท่งนา
หาเก็บดอกจิ๊กดอกสะแบงมาฮ้อยเป็นมาลัยพวงยาวๆ คล้องคอเล่นเป็นนักร้องอยู่เทิงคันแทนา
แล้วกะหาเก็บผักกะแยงที่ออกดอกสีม่วงอมชมพูมาถักเป็นมงกุฏดอกหญ้าใส่ตามจิตนาการของเด็กน้อยบ้านนาคนหนึ่ง
ยามแลงๆมากะนอนฟังเสียงสะนูว่าวต้านลม ดือ ดื้อ ดือ ดึง...จากวันเด็กสู่วัยทำงาน 29 ปีผ่านไป ไวปานขี้ตั๋วลังคนว่า
แป๊บเดียวหลายๆอย่างเปลี่ยนไป และหายไปจากความเป็นจริง
แต่มันกะยังอยู่ในความทรงจำในสองอันน้อยๆปึกๆของขะน้อยนี้จ้า
และมื้อนี้ความทรงจำอีกอย่างกะหวนคืนมาอีกเทื่อหนึ่งนั้นกะคือ"การได้กินนึ่งเผือก และ กล้วยปิ้ง"
ลังคนว่า บรรยายสายาวเยียด ได๋แท้จะบอกว่าได้กินนึ่งเผือก นั้นติ(แม่นแล้วจ้า)
นึ่งเผือก...เผือกนึ่ง (วัตถุดิบส่งตรงมาจากสีเกด)
ล้างดินออกก่อน น้องเผือกพึ่งออกมาจากสวนใหม่ๆ อิอิ
ปอกเปลือกออกแล้ว ขาวจั๊วะเลย
ผ่าเป็นซีกๆเพื่อง่ายต่อการรับทานและก็ สุกง่ายๆจ้า
ดังไฟแล้วๆกะยกหม้อค้างเตา รอ แล้ว ก็ รอ ว่าเมื่อไหร่จะสุก O_O
ครึ่งชั่วโมงผ่านไป สุกแล้วจ้า
ถ่านไฟยังเหลือ เอากล้วยมาปิ้งกะน๊า
สุกแล้วกล้วยปิ้ง ห๊อม หอม
จริงๆแล้วเมนูนี้กะบ่มีเทคนิคหรือความพิเศษอิหยังที่ต้องนำเสนอ แต่อยากจะบอกว่าการที่ได้เห็นหรือได้กินแนวกินจากทางบ้านที่เฮาเคยกินอยู่เป็นประจำ
มันทำให้หัวใจคนไกลบ้านมันมีความสุขที่หาหยังมาแทนกะบ่ได้แม่นแท้ของที่มาจากพ่อกับแม่ เวลาเมือยามบ้านแต่ละเทื่อ หลายๆคนแม้แต่อิแม่อิพ่อเฒ้า เลากะยังถามว่า....
แม่: ถ่ายฮูปไปหยัง บ่เคยเห็นหน่อไม้ติ
ลูกสาวแม่:แม่บ่ฮู้หยังดอก มันมีค่าทางจิตใจอย่างแรงส์...ขอบอก
แม่:คะซั่นกะถ่ายฮูปเอาไปหลายๆ เอาไว้เบิ่งว่าติ
ลูกสาวแม่: ถูกตร้องค้า แบบว่ายามคึดฮอดบ้านแฮงๆพอได้เปิดเบิ่ง บ่ได้กินได้เห็นภาพกะเอายังว่า...
แม่:?? พ่อกับแม่คือบ่ถ่ายเอาแหน่
ลูกสาวแม่: มีละเด้ใส่กรอบไว้อย่างงามอย่างโก้ ตั้งอยู่เทิงหัวบ่อนนอนกราบงามๆสามเทื่อก่อนนอนสุมื้อพุ้น
แม่:?? (แอบยืนยิ้ม)
:l- ขอบคุณทุกๆท่านที่แวะมาอ่านความทรงจำดีๆเมื่อยังตอนเป็นเด็กน้อย ของนาง
** :*- Baanmaha.com
Bookmarks