กลับมาพบพ้อกันอีกแล้วจ้าพี่น้องบ้านมหาดอทคอมทุกท่าน
กับเมนูยามเช้าๆที่คุ้นเคยของพี่น้องทางอุดรฯ - ขอนแก่น
ที่หากินได้ทั่วๆไป เพราะว่ามีขายกันอยู่แทบทุกๆหม่องทุกๆพื้นที่
เมนูที่ว่านี้กะคือ แกงเส้น หรือต้มเส้นนั่นเองจ้า
จิขายคู่กันกับข้าวเปียกเส้นหรือก๋วยจั๊บอุบลขายตั้งคู่กันหม้อบักใหญ่เลยจ้า
ตะสมัยเป็นเด็กน้อย
แม่ค้าที่อยู่โรงเรียนเพิ่นจิตักใส่ถุงไว้ถุงละบาท
ซื้อแล้วกะสามารถกัดก้นถุงดูดกินได้เลยจ้า
เลาะเอาเนื้อไก่ออกจากน่องไก่มาผัดกระเพราเป็นแนวกินแลง
เหลือส่วนที่เป็นกระดูกติดเนื้อแหน่จักหน่อยไว้ต้มเฮ็ดน้ำซุป
ต้มไว้ตะยามกลางคืนพี้ล่ะ ถ้าพี่น้องมีโครงไก่กะแห่งดีหลายจ้า :l-
ค้างหม้อเฮ็ดน้ำซุปได้เลยจ้า ใส่รากผักชีลงไป ในระหว่างถ่าให้น้ำเดือด
กะหั่นเลือดไก่ล้างให้สะอาดแล้วพักไว้
พอน้ำเดือดกะใส่กระเทียมดองกับซีอิ๊วหวาน(ซีอิ๊วดำ)ลงไป
ใส่เกลือและผงปรุงรสจักหน่อย
ตามด้วยกระดูกไก่และเลือดไก่จ้า
ไก่สุกดีแล้ว ชิมรสได้ที่กะปิดแก๊สได้เลยจ้า
ถ่าเอาเส้นล่อน(วุ้นเส้น)ใส่ในมื้อต่อไป
เส้นล่อนขามป้อมบ่แนะนำให้ใช้เส้นสดเด้อจ้า
เอาแบบเส้นแห้งมาแซ่น้ำเอาจ้า รายละเอียดกะอยู่ข้างห่อเด้อ
ความแตกต่างกะคือเส้นแห้งเหนียวนุ่มและกะเส้นบ่ขาดง่ายจ้า
อุ่นแล้วอุ่นอีกเส้นกะบ่อืดจ้า :l-
เวลากินกะปรุงรสได้คือก๋วยเตี๋ยวจ้า ใส่พริกไทย ต้นหอมผักชี พริกป่น
น้ำตาล กระเทียมเจียว รสส้มใช้น้ำส้มสายชูกลั่นจิเข้ากันดีกว่าใส่บักนาวเด้อจ้า
หรือผู้ได๋จิบ่ปรุงกะได้ น้ำซุปจิหอมซีอิ๊วดำ หวานนิดๆจากกระเทียมดอง
มีถั่วงอกใส่นำแห่งเข้ากันคักจ้า
ขอบคุณพี่น้องที่แวะมาทุกท่าน
และขอบคุณพื้นที่แบ่งปันจากเว็บบ้านมหาดอทคอมจ้า
Bookmarks