มาเด้อพี่น้องกินต้มส่มปลาค่อใส่ใบส่มโมง....นำกันนนน

[ฅนภูค่าว]

อาทิตย์ที่แล้วหยุดสี่มื้อเลยเมือบ้านกะสินธุ์ ยามแลงลุงเพิ่นซวนไปใส่เบ็ดตรีนเขื่อนลำปาวท้ายบ้าน เลยได่ปลาค่อน้อยมาต้มส่มเรื่องของเรื่อง



ตอนเซ่ากะพากันไปยามเบ็ดตั้งแต่หกโมง อากาศหละเย็นจ้อยๆแมะ จะแมนสดซื้นคักซะ



ติดได่เอี่ยนกำพร้ามาเป็นหลังแรกแฮกหมาน



ได่ปลานิลกับปลาค่อน้อยอีกสองโต



โตนี่ไคแนพี่น้อง พันกอเข่าลุ้มอุ้มยูว่าแมนงูปลาตอนแรก ย้านมันหลุดเลยต้องใซ้โตซ่อย



แมนสิบ่หมานแต่กะคือสิแล้วเซ้ายู



เซ้านี่กะเลยเลือกเอาแต่ปลาค่อนี่หละต้มส่มใส่ใบส่มโมงสู่พี่น้องกิน



ส่มปากส่มแข่วตั้งแต่มื้อวานนี่แล้วต้นส่มโมงยอดกำลังงาม



ว่าแล้วแม่ครัวกะต้มน้ำให่เดือดปรุงเครื่องใส่ใบส่มโมงลงไปนำให่มันเปลื่อย วาซั้นมันสิบ่ส่ม



แล้วจังคัวปลา ก๋าว่าใบส่มโมงเปลือยแล้วกะเทปลาลงหม่อแล้วปิดฝาให่เดือดอีก



ก๋าว่าปลาสุกกะซีมเบิ่งขาดเหลืออีหยังกะปรุงรสให่มันนัวให่มันแซบจนถึกปากคนกิน ก่อนสิปลงหม่อกะปุ้มซุมต้นหอม ซีป้อมลงปิดฝาหม่อแล้วกะยกลงตักใส่ถ่วยเสริฟเลยครับ



มาเด้อพี่น้องบาดนี่ มาซดต้มส่มปลาค่อนำก้านนนน



แซบบ่พี่น้อง (เหมิดเมียงทางแซบ) เอาเสต็กเนื้อสันมาแลกตอนนี่กะยังบ่เอา .....



จ้ำแจ่วบักพริกดิบนำพร้อมแฮงแซบคัก นี่หละสูตรอิสานบ้านเฮา


ขอขอบคุณพื้นที่ บ้านมหา ดอทคอม และพี่น้องที่เข่ามาซม ขอบคุณครับผม

[นู๋น้อย]

หน่ายอ้ายเด้บาดนี้ ซดต้มปลาฮ้อนๆกับลมหนาวๆแบบนี้ ออยยยย:l-

[บักขามป้อม]

ฟ้าวเลื่อนเมาส์ลงไปอย่างรวดเร็วย้อนว่าย้านเอี่ยน
มาฮอดภาพตอนท้ายๆไคแหน่
เป็นตาแซบจ้าอ้าย ต้มปลาใส่บักกอกอีกแล้ว
ปลานำห้วยนำหนอง นำนาบ้านเฮามันกะแซบล่ะเนาะ
ฮึ่มมมม ปีหน้าก่อนเถาะ อิอิ:l-

[บ่าวเกิบขาด]

เห็นแนวกินแล้วคิดฮอดบ้านแถะน้ออ้าย อยากกลับไปกินกับข้าวฝีมือแม่จัง

[sert1964]

ป๊าดดด มาเป็นตาแซบแท้ เมือบ้านเถี่ยวหน้าให้ผมไปนำแหน่เด้ออ้าย บักส่มโมงบ้านผมเอิ้นบักโมงขี่แข่ว ทางใต้เรียกใบชะมวงแม่นบ่น้องขามป้อม :l-

[บ่าวจัย]

โอ้ย ผมละหน่ายเด้ เอาแนวกินแซบๆมาล่อผมอีกแล้ว อยากไปซดต้มปลานำเด้เป็นตะแซบคัก

[ไก่น้อย]

โอยยน่อ อ้ายเอย ส่างมาหยามหัวใจกันคักแท้ จ้ำฮอดคำข้าวมาอ้างกัน กลืนน้ำลายลัดจนเจ็บท้องแล้วเด้อ ทางนิ ฮ่าๆๆ

จั่งได่ปีใหม่เอาปลาเขื่อนมาเอดน้ำข้าวปุ้นนำเด้อจ้า ฮ่าๆๆสิพาพี่น้องเผาบ้องข้าวหลามนำกันจ้า

[สาวชัย]

ต้มส้มปลาค่อของมักที่สุดเพราะว่าบ่มีผัก คึดพ้อตะกี้อิพ่อเลาไปใส่บั้งได้เอี่ยนมาล่ะมาปิ้งสู่ลูกกิน กินแล้วกะเลือดดังออกย้อยหยาบหย่าง ใหญ่มาเซากินกะเซาเป็นจักว่ามันเกี่ยวกันบ่

[กำพร้าผีน้อย]

...ผุเฒ่าบ้านนี่คือหากินหมานแท่..มีคาถาดีมาเป่ากะหม่อมให้บ่าวจัยแน สิได้หมานนน

..แนวกินเพิ่นจังแม่นคักเนาะ..เห็นหน้าตากะบ่ต้องชิมยาก...แซบบบบบบบบ...

[หนุ่มน้อยศรีสะเกษ]

แซบอีหลีบ่อครับเดี๋ยวสิพาผีน้อยไปลองชิมครับ