ภาคสองตอนเมือยามบ้านช่วงเทศกาลตรุษจีน จ้าพี่น้อง
เนื่องจากเมือบ้านถืกช่วงฝนตกพอดี ได้อยู่บ้านมื้อหนึ่งช่วงเช้ากะได้ไปจั่งหัน(ใส่บาตรเช้า)ตอนเช้าๆ
เรียบร้อยธุระทางวัดแล้วกะ มาซอกเบิ่งตู้เก็บสมบัติอิแม่
ย้านหนูเล่นงาน หมอนเผิ่น กะเลยพาซอกเบิ่งของ ว่ามีหยังเหลือแหน่
ผ้าไหม แม่เฮ็ดไว้ บ่ว่าจะเป็นผ้าโสร่งไหม ผ้าซิ่นไหมเข็น หรือมัดหมี่ ตลอดจนหมอนขิต
ผ้าซิ่นไหมมัดหมี่ ผืนนี้แม่ให้มาจ้า ฝีมือของเอื้อยแต่ได้มีส่วนร่วมนำเผิ่นยุ๊จ้า ปันหลอดและเก็บหมอน
นั่งเฝ้าหม้อดักแด้.....แซะหญ้าให้หมอน
ผืนนี้ผ้าไหมเข็ญ ไหมเส้นน้อย ไหมซื้อจ้าแม่ซื้อมาเป็นเครื่อสมม่าย่าให้เอื้อยแต่เผิ่นว่ามันบางโพดบ่สมเงินผูกแขน กะเลยเอาไว้ก่อน
คนได้ใส่กะแม่นลูกสาวหล่า ใส่ไปเอาบุญแล้วมื้อเช้า
ผืนนี้ไหมเข็ญคือกัน แต่ไหมเจ้าของเลี้ยงเองเฮ็ดเอง ฝีมือแม่ เนื้อผ้าจะแข็งๆเพราะว่าหวีน้ำข้าวเปียกเวลาตำฮูก
ได้ส่อยแม่ปั่นหลอดยุ๊ได๋ อิอิ ผืนนี้แม่เฮ็ดไว้แต่หลายปีแล้ว จ้า
เครือนี้เป็น หัวซิ่น เอาไว้ต่อโต่งซิ่น เพราะว่าซิ่นไหมผืนจะสั้น คนรูปร่างสูงๆจะต้องต่อโต่งเดียวเวลาใส่บ่งาม
แต่สำหรับนู๋น้อยบ่ต้องต่อโต่งยากพอดีเป๊ะ เครือนี้กะต่อได้หลายผืนยุ๊จ้า
ตัวอย่าง ผืนที่ต่อแล้ว
ผืนนี้ เป็นผ้าไหลผ้าไหม มูลแม่ใหย่ให้มา สองผืน ผืนหนึ่งอยู่นำพ่อแต่เอามัดหัวไปขายข้าวในเมือง ลมพัดตกเสียจ้อย เหลือผืนเดียวให้ลูกสาวหล่าบ่จัก ฮ่าๆๆ
แล้วก็ผ้าโสร่ง แม่เฮ็ดไว้แต่หลายปีแล้วคือกันจ้า เวียกยามหน้าแล้งของแม่บ้านกะคือ ตำฮูก บ่ว่าจะเป็นฮูกไหม ฮูกฝ้าย หรือ ฮูกด้าย
เฮ็ดหมอน เฮ็ดเสื่อ เฮ็ดผ้าข้าวม้า ผ้าขิต
นี่คือ เครือฮูก ที่ค้นแล้วแล้ว เหลือแต่สืบเข้ากับฟืมเพื่อที่จะต่ำเป็นผ้าโสร่ง จ้า ฤดูกาลนี้ละ แม่จะจัดการให้เรียบร้อย ฮ่าๆๆ ค้นไว้หลายปีแฮง
ว่าซั่นบ่มีเวลาเฮ็ดจักเทื่อ เมือสงกรานต์อาจจะไปส่อย ยุ๊บ่จัก
อั่นนี้ไหมเข็ญแล้ว เตรียมปั่นใส่หลอด ลงกะสวยตำเป็นผืน ในขั้นตอนต่อไป จ้า
อั่นนี้เป็น ผ้าสไบ หรือว่าผ้าขิตลาย เอื้อยเผิ่นเฮ็ดไว้ ตามแบบของเผิ่นมัก เรียบๆ เป็นด้าย จ้า สีพื้น ขึ้นลายดอก
เฮ็ดไปไหว้ผู้ถ่าว เอาไว้พาดบ่าลงไปวัดยามบุญ
แล้วกะผืนนี้เป็นผ้าซิ่นของเมืองลาว แม่ไปเที่ยวช่องเม็ก ให้เอามาตัดผ้าถุงสำเร็จใส่ วาซั่น อิอิ ได้ผ้าถุงเอาบุญแล้วบาดนี้
รื้อค้น ออกมาแล้ว แม่กะว่าซ้อมจักรเบิ่งละนาง มันยังใช้ได้บ่ แล้วกะต่อโต่งผ้าโสร่งให้อ้ายใส่แหน่จักผืน จัดให้ตามคำขอ
เวลาผ่านไปเที่ยวกั่วๆเริ่มหิว แต่งพาข้าวมาสู่แม่กินก่อน อิอิ พ่อไปไฮ่คนเดียวมื้อนี้
แกงเห็ดปลวกแต่คืนอุ่นกินอีกคาบ แซบคือเก่า กับตำบักแตงหน่อยๆเค็มๆเผ็ดๆ
Bookmarks