:b-b เลิกงานยามเย็นเราก็ไปเดินเล่นที่ตลาดมา ได้บักหอยมาโลกว่า ก็มิรู้ว่าจะทำอะไร แต่ฮู้สึกว่าอยากกินอ่อมบักหอยแฮงๆ
ถ้าเป็นอยู่บ้านนอกเฮากะคือจะบ่คึดหยังอยาก ต่อยก้นบักหอยแล้วกะผัด
หรือบ่กะอ่อมใส่ผักหยังไปกะแล้ว แต่นี้มันเมืองใหย่จะหากินทีก็ต้องรอจังหวะให้แม่ค้าเอามาขาย
แต่มื้อนี้ โชคเข้าข้างนางแล้ว มีบักหอยขม มาขายนำ ขายถุงละ 20 บาทจ้า
ได้พอต้มหม้อน้อยหนึ่งนั้นละถ้าต้มหม้อยุบ้านเฮา
ตอนแรกว่าจะอ่อมใสผักชีลาว แต่พอมาฮอดห้องมันกะค่ำแล้ว เสียงดังบ่ได้
(ที่จริงเขาห้ามเฮ็ดกับข้าวในอพาร์ทเม้นท์)แต่นางละเมิดกฏเพราะความอยากกิน หุหุ
เลยได้กินเมนู "คั่วบักหอย" แทนอ่อมบักหอย
เครื่องปรุง
บ่มีหยังหลายจ้า ตามมีตามเกิด มีหยังกะใส่นั้นละว่าแต่ สุกแล้วแซบ กะโอเคแล้วได้ผักติ้วงามๆมากำหนึ่งจ้า น่าจะเป็นผักติ้วแดง...
หอยขม หรือ หอยจุฟบ้านเฮา แช่น้ำล้างเศษหิน ดิน ทรายออก ก่อน
ยอดผักติ้วอ่อนๆ พริก ผักชีลาว ต้นหอม ตะไคร้ ใบบักกรูด
วิธีปรุงกะบ่มีหยังหลาย
ใส่น้ำครึ่งถ้วยกะพอ ใส่เครื่องปรุง ผงชูรส เกลือ พริกสอย คะไคร้ ใบบักกรูด ยอกผักติ้วลงไปพร้อมกันเลย อ้อ ใส่ข้าวคั่วนำเพิ่มความหอมของน้ำปรุง
แล้วกะใส่บักหอยลงไป คนๆๆให้เข้ากัน
ปิดฝาหม้อรอให้สุก จั่งค่อยใส่หอม กับ ผักชีลาวสุดท้ายเพราะว่ากลิ่นมันแรงส์ เดียวไทบ้านมาขอแบ่งกินนำ
ผ่านไปห้านาที เปิดฝาออก ปาดโถกลิ่นพี่น้องเอ้ย ฮ่าๆๆ จักว่าลอยไปฮอดไสเด้อ ใช้ทัพพีคนจนว่าน้ำแห้งพุ้นละ จั่งปิดไฟ
จุดหมายคือคั่วแห้งๆ สุกแล้วจักใส่จานแบบ่ต้องซิม วัดดวงเอา บ่จางกะเค็มละงานนี้ ฮ๋าๆๆ
:b-b ผลปรากฏว่า...สอบผ่านจ้า แซบคือเก่า อั่นบ่ได้ย้องเจ้าของใด๋ ฮ๋าๆๆ ตั๋วกะบ่มีไผ๋ฮู้นำดอกเพราะว่ากินคนเดียว อิอิ
นี่ละน้อพี่น้อง เสน่ห์ของวัฒนธรรมอีสานบ้านเฮา คือการหาอยู่หากินแบบตามมีตามเกิด มีหยังกะกินอั่นนั้น ตื่นเช้ามาหากินใหม่ แหย่ไข่มดแดงตามป่า หาหน่อไม้ตามฝั่งหนองฝั่งห้วย พอแล้วมื้อไป วิถีชีวิตจะแตกต่างกันไปตามสภาพภูมิประเทศและวัฒนธรรมของแต่ละท้องถิ่น..บางคนกะว่าแนวนี้ บ่เคยกิน แบบนี้พ่อบ่พาเฮ็ด หรือ เกิดมาบ่เคยรู้จักจักเทื่อ อั่นแบบนี้...นานาทัศนะ...ตามแต่หม่องเกิดไผ๋มันเน๊าะพี่น้อง ...มื้อนี้พอส่ำนี้ก่อนมื้อลุนจั่งหาแนวกินใหม่ สำบายดี๋จร้า....ขอบคุณพื้นที่เวปบ้านมหาที่เอื้อเฟื้อสถานที่นำเสนอ จร้า:*-
Bookmarks