ข่อยลาวันที่ 10 - 12 เมษายน 2555 ลาบ่หลายมื่อดอกครับ ลาแค่ 3 มื่อทอนั่นล่ะ ...555
สิเดินทางออกจากกรุงเทพฯ ตอนเช้าวันที่ 6 เม.ย.55 ครับ ไปฮอดกะสิไปเตรียมเอาของอยู่บ้านขึ้นมานอนอยู่วัดชัยภูมิพิทักษ์ หรือว่าวัดผาเกิ้ง นั่นล่ะครับ ...ยามมื่อแลงวันที่ 8 เม.ย.55 ข่อยกะสิเดินทางกลับ กทม. มาร่วมในการรายทางรับ-เสด็จ ในพระราชพิธีพระราชทานเพลิงพระศพสมเด็จพระเจ้าภคินีเธอ เจ้าฟ้าเพชรรัตนราชสุดา สิริโสภาพัณณวดี ในวันที่ 9 เม.ย.55 ครับ
ตอนเย็นวันที่ 9 เม.ย.55 ข่อยกะสิเดินทางกลับไปชัยภูมิ ไปนอนอยู่วัดอีกเทือหนึ่ง เพราะแม่เถ่าข่อยร่วมกับชาวบ้านนาคานหัก เพิ่นตั้งโรงทานอยู่วัด ถ้าไปนอนอยู่บ้านข่อยบ่มีแนวกิน ย่านผีหลอกกะพองกัน..อิอิ
ส่วนดีเจเด็กน้อยเพิ่นสิบวชชีพราหมณ์ครับ ข่อยเคยบวชอยู่หลายเทือคือกัน แต่หิวข้าวแลงขนาด กะเลยอาสามาเป็นลูกมืออยู่โรงทานดีกั่วครับ ตื่นประมาณตี 3.50 น. มาหุงหาอาหาร กะดีกั่วบ่ได้กินข้าวแลงครับ...5555
ไคลแม็กซ์ของงานกะคือ ในเช้าวันที่ 12 เม.ย.55 เพิ่นสิทำพิธีตัดกรรมตัดเวรสะเดาะเคราะห์ต่อดวงชะตาเสริมบารมีครับ เสร็จแล้วญาติโยมกะสิพากันสรงน้ำพระสงฆ์และสามเณร
พี่น้องที่อยู่ละแวกใกล้เคียงวัดผาเกิ้ง อยากสิไปฮวม หรือสิไปเยี่ยมไปยามข่อย กะไปถามหาอยู่โรงทานบ้านนาคานหักเด้อครับ ข่อยสิขั่วบักพริก ตำส้มบักหุ่ง หนึ่งข้าว อวนอัว ๆ พอให้เพิ่นได้ด่าอยู่แถว ๆ โรงทานนั่นล่ะ
จั่งใด๋กะขอให้พี่น้องเดินทางกลับบ้านภูมิลำเนาโดยสวัสดิภาพ เที่ยวสงกรานต์ให้ม่วน ๆ ....กลับมากะขอให้มีพลังใจในการเฮ็ดการเฮ็ดงาน หากชีวิตบ่สิ้นกะต้องดิ้นต่อไปครับ มีทอนั่นล่ะชีวิตคนเฮา....อย่าไปคิดหยังหลายครับปวดหัวซะเปล่า ๆ .......สุขสันต์วันสงกรานต์ครับผม
Bookmarks