วันที่ 7 สิงหาคม ที่ผ่านมา ขามป้อมเก็บของจากอำเภอลำปลายมาศประมาณหกโมงแลง
แล้วออกเดินทางไปบ้านนายห้าง ย้อนว่าได้ยินข่าวว่าเห็ดระโงกกำลังออกหลายพานะ:l-
มาฮอดหนองแอกซิตี้ประมาณสี่ทุ่มนิดๆๆๆ เจ้าภาพจัดเต็มกับหมูกระทะสูตรบ้านหนองแอก
เทิงกินเทิงอยากนอน เจ้าภาพกะเริ่มได้ที่แล้ว
สลายโตกันช่วงหกทุ่ม ขอบคุณสำหรับหม่องซ้นนอนเด้อจ้า
ตื่นเช้ามา เลาะสำรวจบริเวณโดยรอบ ภาพนี้คือเรือนรับรองแขกไปไทมา
โอ๊ยเนาะพ่อใหญ่จ่อยกะดายซ่างกล้าเอารถเจ้าของไปจอดใกล้รถป้ายแดงเพิ่น
เป็นฮอยขีดข่วนมายากอีกล่ะ
แต่ขามป้อมเลือกพักหลังนี้แทน ให้ความรู้สึกคลาสสิกแบบโฮมสเตย์หลายกว่ากัน
คึดพ้อสมัยเป็นเด็กน้อย ยามฮ้อนเฒ่าพ่อสิพาลูกๆ นอนเสริมเย็นนอกซานฟังนิทานก้อม:l-
ดนเติบพี่อ้ายท่านนายห้าง มาตะไปเลาะเบิ่งเห็ดโคกส่วนโตเลา(ผู้อื่นไปหาบ่ได้พอแกง เลาได้อยู่ผู้เดียว)
มื้อนี้บ่ได้หลายปานได๋ ป่นเอาเนาะพานะ
ในขณะที่ผู้ใหญ่พากันสะออนเห็ดอยู่นั้น ขวัญใจไทเฮือนกะนอนยิ้มปุ้ยๆอยู่ผู้เดียว
กะเลยมีคนอดบ่ได้ไปหยอก ไปเล่นนำ
ดนเติบแม่ครัวกิติมศักดิ์ พี่สาวท่านนายห้างและศรีภรรยาท่านนายห้างฯกะยอพาข้าวออกมา
ซำบายแม่นไทแขก นั่งถ่ากินเสย:l-
ซุบเห็ดละโงกสูตรบ้านหนองแอกซุบใส่บักพริกดิบจี่หรือพริกต้มใส่น้ำต้มปลาแดกที่ต้มเห็ดนั้นล่ะ
บ่ใส่หอม หรืออิหยังอย่างอื่นที่สิเฮ็ดให้กลบกลิ่นหอมของเห็ดเลย
เพราะเห็ดระโงกมีกลิ่นหอมเฉพาะโตอยู่แล้ว บ่ต้องใส่สารปรุงแต่งอื่นเพิ่ม
วิธีการกินซุบเห็ดโงกกะคือ เฮ็ดคำข้าวให้เป็นต่องหล่องตรงกลาง
แล้วกะซ้วนเอาเห็ดขึ้นมาโลด บ่ซั่นสิบ่ได้กินง่ายคือนิทานก้อมพ่อเฒ่ากับลูกเขย :l-
แกงหน่อไม้ใส่เห็ดรวม ใส่อิรอก เมนูนี้ป้าเลาแกงไว้ถ่าไทแขกโดยเฉพาะ
อีกหนึ่งเมนูเด็ดกะอู๋ส้มไข่ปลา และผักพื้นบ้านปลอดสารพิษที่หาเก็บได้ในบริเวณบ้าน
เป็นอีกคาบหนึ่งที่แซบและอบอวลไปด้วยมิตรภาพและความอบอุ่น
ไทแขกเทิงสองกะอิ่มท้องและอิ่มใจ ขอบคุณท่านนายห้างฯและครอบครัว
สำหรับการต้อนรับที่อบอุ่นทุกเทื่อที่ได้มายามเด้อจ้า
ออกจากจตุรพักตรพิมาน ไปเส้นอำเภอเมืองสรวง มุ่งสู่อำเภออาจสามารถไปยามย่า
เอาภาพตะฝั่งชีมาฝากพี่น้องบ้านเฮาจ้า ถ้าบ่มีหยังเปลี่ยนแปลงหรือกิจธุระรัดโต
งานแข่งเรือจิมาเก็บภาพบรรยากาศมาฝากฝากพี่น้องบ้านเฮาจ้า
แม่ย่าซวนอยู่กินข้าวกับหมกฮวก พอดีบ้านข้างๆเพิ่นไปส่อนมาสดๆ (ฮวกธรรมชาติ)
กะเลยบอกเลาด้วยความเสียดายว่า "พอดีจุกมาจากบ้านหนองแอกแล้วจ้า" แหะๆ
ขอบคุณพื้นที่แบ่งปันจากเว็บบ้านมหาดอทคอมจ้า
Bookmarks