อ้อยต้อยต่อนผญา (บั้นเจ้าผู้)

[บ่าวหัวเขียง]

เจ้าผู้ ฝนตกโฮ่ง ไหลลงโฮม บ่อนบ่คุ่ม
บ่อนคุ่มมีบ่แพ้ สังมาโฮ่งแต่บ่อบเขิน แท้น้อ

เจ้าผู้กบยามแล้ง เดือนสามบ่ไขปาก
เจ้าสิงับปากไว้ คอยถ้าเพิ่นผู้ใด๋

เจ้าผู้กกตาลตั้ง กลางนาต้นต่ำ ฝนสิฮำ แดดสิขั่ว ตาลน้อยให้ค่อยทน
ข่อยนี่เหลียวเมื่อบ้าน เห็นกกตาลเป็นจุ่มกุ่ม ไผเด้น้อสิได้หุ้ม กินน้ำก่อนพี่ซาย

[หนุ่มน้อย]

เจ้าผู้ไซหลายท้าง ทางยามหลายปล่อง
พุ้นกะท้างพี้กะท้าง ไหลเข้าสู่ทาง


เจ้าผู้ขวานดีแล้ว ประสงค์ฟันแต่ไม่แก่น หลายเด้อ
ลางเทื่อเป้ย้อนไม้ข้อหล้อ ตอไม้แก่นหมากเยา บ่อฮู้

เจ้าผู้พั่วดอกซ้อน ซอนดอกสะเลเต
กกบ่อเซปลายบ่อเนิ้ง สังมาให้ข้อยคิดนำ แท้น้อ

เจ้าผู้ดวงหอมอ้ม ชมหลายกะเหยกลิ่น
บ่อคือดวงดอกซ้อน ซอนขึ้นเมื่อลุน

เจ้าผู้นาไหล ไห่ ล่ง ประสงค์หาแต่กล้าอ่อน
กล้าแก่ นั่นนา บ่อทันได้เกี่ยวข้าว เป็นหยังเจ้าจั่งบ่อดำ

[sompoi]

บ๊ะ...สุดยอดคือกันตั้วะล่ะอ้ายหนุ่มน้อย
มะลักเว่าเป็นนำเพิ่นแต่เหิงหน่อ
คือบ่มาเว่าสุ่พี่น้องฟังดู๋ๆแน่ะน้อจ้า .. ม่วนๆๆจ้า..