กำลังแสดงผล 1 ถึง 3 จากทั้งหมด 3

หัวข้อ: อ้อยต้อยต่อนผญา (บั้นปาง)

  1. #1

    อ้อยต้อยต่อนผญา (บั้นปาง)

    อ้อยต้อยต่อนผญา (บั้นปาง)

    ปางไผไว้ ปางมันสาก่อน
    ปางเจ้าไว้ ปางข่อยหากสิมี

    ปางผัวได้ ให้เห็นเมีย ผู้เทียมคู่ แนเด้อ
    คันแม่นปางเมียขึ้น ผัวสิได้เพิ่งพา

    ปางเมียขึ้น อย่าลืมผัว ผู้เป็นพ่อเฮือนเด้อ
    คันแม่นโจรขึ้นบ้านยังสิได้เพิ่งผัว อยู่เด้

    ปางรถขึ้น อย่าลืมทางเที่ยวท่อง
    คันถนนขาดแล้ว สิไปได้ฮ่อมใด่

    อ้อยต้อยต่อนผญา (บั้นผัดแต่)

    ผัดแต่เป็นก่อขึ้น บ่มีเครือสิเกี้ยวอุ่ม
    ผัดแต่เป็นพุ่มไม้ เครือสืเกี้ยวกะบ่มี

    ผัดแต่เห็นกับเจ้า มีแต่เฮาเว้าน่ำๆ
    ตั้วให้คึดอ้ำล้ำ นำเจ้าอยู่สู่วัน

    ผัดแต่ฟังเจ้าเว้า ผัดอยู่บ่มีเซา
    ความกกเจ้าเว้ามั่น ความปลายเจ้าเว้าหล่าย
    แนเดือนใด๋กะบ่ได้ สิลัยถิ่มปล่อยป๋า

    อ้อยต้อยต่อนผญา (บั้นไผสิหลิงเห็น)

    ไผสิหลิงเห็นไส้ หัวใจนกขี้ถี่
    ทางปากฮ้องพืดพึ้ง ใจเลี้ยวใส่กะปู

    ไผสืหลิงเห็นไส้ ตอหนามแม่น้ำใหญ่
    คันแม่นตีนบ่ไปถืกต้อง บ่มีฮู้ดอกว่าตอ

    ไผสิหลิงเห็นฮู้ ภายในปล้องไม้ไผ่
    ลางเทื่อด้วงอยู่หั่น สิไปฮู้ฮ่อมใด๋

    อ้อยต้อยต่อนผญา (บั้นมาหลูตน)

    มาหลูตนโตข่อย หักใจ ห้ามบ่อยู่
    ปากข่อยว่าบ่ฮักเจ้า แต่ใจข่อยบ่ห่างหนี

    มาหลูตนกาเด่ อยากเทียมหงส์ตระกลูใหญ่
    แต่ว่ากาจั่งข่อย มันแสนต้อย ต่ำสกุล

    มาหลูตนเป็ดเด่ อยากนอนคอนซ้อนไก่
    ตีนเปื้อนเปินเป๋อ ตีนเปื้อนเปิ่นเป้อ ปีนขึ้นกะหมื่นลง

    อ้อยต้อยต่อนผญา (บั้นย่านแต่)

    ย่านแต่ทางนาน้อง บ่สนใจกล้าแก่
    พันธุ์ข้าวใหญ่คือจั่งอ้าย กินแล้วอิ่มดน

    ย่านแต่ทางพุ้นโค้ง สับหลีกหลบหนี
    เว้ากันมาเหมิดปี สิหลีกหนีบ่เอาอ้าย

    ย่านแต่ทางน้องนั้น บ่ฮักพี่คือควร
    ย่านแตสายคออวน สิแบ่งใจหลายด้าน

    อ้อยต้อยต่อนผญา (บั้นว่าแต่)

    ว่าแตทางข่อยได้ สิปูเสื่อให้มานอน สิเอาหมอนมาให้พิง เต้าปูนสิแถมพร้อม

    ว่าแต่ทางข่อยฮ้าย เจ้าแห่งโพดเหลือหลาย ตกลงสิมาขอ เจ้าผัดมาขอเลื่อน

    ว่าแต่หัวใจเจ้านั่น บ่แบ่งเป็นสอง ข่อยสิมีจิตเดียว ฝากใจไว้นำเจ้า

    ว่าแต่ไฟมันฮ้อน ใจข่อยแห่งกว่าไฟ ว่าอยากเด็ดดวงใจ ผู้เจ้าพาให้มันฮ้อน

    อ้อยต้อยต่อนผญา (บั้นเว้าชู้ต่างบ้าน)


    เว้าชู้ต่างบ้านมันลำบากเหลือหลาย มันบ่คือบ้านเดียว ค่มากะเห็นหน้า

    เว้าชู้ต่างบ้าน คันแม่นเผิ่นบ่หลายใจ คันแม่นนางบ่หลายชาย กะบ่มีแนวย่าน

    เว้าชู้ต่างบ้าน ย่านแต่เผิ่นปันใจ บ่จักไผสิมาชม บ่จักไผสิมาฮัก ยาดเอาไปซ้อน

    เว้าชู้ต่างบ้าน ย่านแต่เผิ่นหลายใจ ยามบาดเฮาหนีเมื่อ เผิ่นกะมีชายซ้อน

    อ้อยต้อยต่อนผญา (บั้นว่าบ่มี)

    ว่าบ่มีชายชู้ หัวกะไดลังมาเกลี้ยงมีนลีน แท้น้อ
    ชายหย่างเข้ามื้อฮ้อย ชายหย่างออกมื้อฮ้อย ตั้วได้ว่าบ่มี

    ว่าบ่มีความเว้า เจ้าเอาหยั่งมาว่า ว่าบ่มีผู้ถ่า แม่นไผแท้นั่งอยู่นำ

    ว่าบ่มีชายซ้อน เชิงแพสังมาก่าน หรือว่าลูกเจ้าด้าน
    หรือว่าหลานเจ้าดื้อ แพเจ้า จั่งก่านเชิง

    อ้อยต้อยต่อนผญา (บั้นว่าสิ)

    ว่าสิปลูกดอกซ้อน ซ้อนดอกกระดังงา แม่นว่ามีหลายชาย สิยาดเอาจนได้

    ว่าสินำเงินพร้อม นำคำมาแต่ง ว่าแต่เจ้าเปิดป้องให้ สิเอาเฒ่าสู่ขอ


  2. #2
    ผู้ช่วยผู้ใหญ่บ้านมหา สัญลักษณ์ของ sompoi
    วันที่สมัคร
    Mar 2007
    ที่อยู่
    japan
    กระทู้
    6,363
    บล็อก
    23
    ม่วนๆทุกบั้นเลยค่ะ เริ่มเข้าใจง่ายขึ้น อ่านบ่มีสะดุดเลยค่ะ :*- ซวดๆๆ

  3. #3
    ศึกษาหาความรู้ สัญลักษณ์ของ lungyai1123
    วันที่สมัคร
    Oct 2008
    กระทู้
    381
    บล็อก
    63
    ม่วนทุกบททุกตอนหละบ่าวหัวเขียงดีๆหามาให้แนกะดีแนวหนิหละ
    แก้เซ็งได้ดีเลยที่หนึ่งเลยขอปรบมือให้ เด้อซวดๆๆๆๆๆๆๆๆๆๆๆๆๆๆๆ

กฎการส่งข้อความ

  • You may not post new threads
  • You may not post replies
  • You may not post attachments
  • You may not edit your posts
  •