กำลังแสดงผล 1 ถึง 4 จากทั้งหมด 4

หัวข้อ: อ้อยต้อยต่อนผญา (บั้นสัจจะ)

  1. #1

    อ้อยต้อยต่อนผญา (บั้นสัจจะ)

    อ้อยต้อยต่อนผญา (บั้นสัจจะ)

    สัจจะมั่น อธิษฐานตั้งเที่ยง บ่หาความหลอกล้อ มาเว้าหล่ายพลาง

    สัจจะเว้า คำใดบ่มีเปลี่ยน ความจริงบอกเจ้าแล้ว ความแม่นให้เจ้าแล้ว ยังแท้ตั้งแต่โต

    อ้อยต้อยต่อนผญา (บั้นคัสิบสิ-ซาวสิ)


    สิบสิฮ้าง ซาวสิฮ้าง อย่าได้ห่างไกลกัน ขอให้พอเหลียวเห็น ให้ส่วงใจแลงเช้า

    สิบสิได้ ซาวสิได้ ให้ได้เผิ่นเหมิดใจ คันบ่มาเหมิดใจ ส่ำได้ผีมาซ้อน

    อ้อยต้อยต่อนผญา (บั้นโส)

    โสทุกข์แล้ว โสยากบ่กลัวหยัง วาสนายังมี สิค่อยดีมื้อหน้า

    โสได้แล้ว บ่วางนางให้ชายอื่น แม่นสิมีหมื่นชู้ สิโสแย่งยาดเอา

    อ้อยต้อยต่อนผญา (บั้นเห็นว่า)

    เห็นว่าข่อยผู้ฮ้าย ครองวัตรกะยังงาม เห็นว่าข่อยฮูปทราม ฮีตครองกะยังฮู้

    เห็นว่าข่อยผู้ฮ้าย อย่าฟ่าวหน้ายแหนงวัง บาดห่าบุญมันยัง สิฮุงเฮืองมื้อหน้า

    อ้อยต้อยต่อนผญา (บั้นอดสา)

    อดสาเยื้อน กินขิงต่างข่า อดสามักอ้าย ซามได้แต่งดอง

    อดสาเลี้ยง ช้างเฒ่าขายงายังมีค่า ดีกว่าเลี้ยงช้างน้อย ขายแล้วแม่นขาดทุน

    อ้อยต้อยต่อนผญา (บั้นอย่าสิมา)

    อย่าสิมาลวงล้อ ให้คึดต่อนำหลาย อย่าสิมาตั้วชาย ให้คึดนำแลงเช้า

    อย่าสิมาปลูกดอกหว่าน แทนหนานผักบั่ว ของเก่าบ่ทันกู้ สังมาปลูกใหม่แทน

    อ้อยต้อยต่อนผญา (บั้นอัศจรรย์)

    อัศจรรย์ใจเจ้า ดวงเดียวบ่คือเผิ่น หัวใจเดียวแท้ๆ เอาชายเข้าได้หมื่นคน

    อัศจรรย์ใจแข้ หางยาวๆสังบ่ได้ฮองนั่ง บาดกระต่ายหางก้อมๆ สังมาได้นั่งฮอง

    อ้อยต้อยต่อนผญา (บั้นอย่าสิลัย)

    อย่าสิลัยเสียถิ่ม ทางเฮาเคยท่อง อย่าสิละพี่น้อง หนีไปย่องผู้เผิ่นดี

    อย่าสิลัยข่อยถิ่ม คือแตงกลางไฮ่ เจ้าหากกินหน่วยแล้ว สิลัยถิ่มแต่เครือ

    อ้อยต้อยต่อนผญา (บั้นเอายาวไว้)

    เอายาวไว้ คือคลองน้ำใหญ่ ไขใส่ท่งแห้งๆ นากว้างกะชุ่มเลิง

    เอายาวไว้ คือถนนสายใหญ่ ทอดแต่บ้านข่อย เถิงเฮือนเจ้า ได้ท่องเที่ยว

    เอายาวไว้ คือสายแม่น้ำใหญ่ น้ำอาศัยขี้ฝ่า นทีกว้างจังบ่เขิน

    อ้อยต้อยต่อนผญา (บั้นเฮียมนี้)

    เฮียมนี้ เป็นดังดวงดอกไม้ บานอยู่กลางดง ฝนบ่ตกลงโฮย สิหล่นขูคาต้น

    เฮียมนี้ เป็นดังแนวนามกุ้ง บ่สมเฟือยฮากไข่นุ่น ปูปลามันบ่สมฮากไม้ บ่มีได้กล่อมสอง

    เฮียมนี้ เป็นดังสาขา ไม้ลำเดียวบ่มีคู่ ไม้หากมีแต่ต้น เครือสิเกี้ยวกะบ่มี


  2. #2
    ผู้ช่วยผู้ใหญ่บ้านมหา สัญลักษณ์ของ sompoi
    วันที่สมัคร
    Mar 2007
    ที่อยู่
    japan
    กระทู้
    6,363
    บล็อก
    23
    โอว..สามารถๆอิหลีค่ะท่าน ขอบคุณสำหรับวิทยาทานอิกแร่วค่ะ
    เบิ่งทรงคือสิหาวเป็นผญาเนาะนิเนาะ ฮ่าๆๆๆ

  3. #3
    ศึกษาหาความรู้ สัญลักษณ์ของ lungyai1123
    วันที่สมัคร
    Oct 2008
    กระทู้
    381
    บล็อก
    63
    ม่วนๆครับได้อ่าน,ได้ฟังได้เห็นผญ๋าแนวนี้กะย้อนบ่าวหัวเขียงหนิหละ
    บ่ค่อยได้เห็นผุได๋มาแนวนี้

  4. #4
    ศึกษาหาความรู้ สัญลักษณ์ของ suny
    วันที่สมัคร
    Nov 2008
    ที่อยู่
    ภูมิลำเนา มหาสารคาม ทำงาน ประจวบ
    กระทู้
    848
    ม่วนหลายคัก ซิได้มาหัดนำยุเด้อ มักยุครับผญาแต่จะของยังบ่เป็นอิอิอิ

กฎการส่งข้อความ

  • You may not post new threads
  • You may not post replies
  • You may not post attachments
  • You may not edit your posts
  •