ผมได้อ่าน กระทู้ "ไม้สะหยัว" คือส่วนไดของบ้าน ของเอื้อยแมงสะดิ้ง
กะมีอ้ายพี่ เข้ามาตอบกันเป็นที่เข่าใจ เอิ้นคือกัน บ่คือกันกะแล้วแต่บ้านไผบ้านเพิ่นสิเอิ้น กะถึกเบิดเนาะครับ
แต่ปัญหาที่ผมคิดกะคือ ผู้ที่เคยได้เลื่อยไม้ ไปซื้อไม้เฮ็ดบ้าน เคยเบิ่งเพิ่นเฮ็ดบ้าน อ่านแล้วกะเข่าใจง่าย
แต่ผู้เกิดใหม่บ่โดนปานได๋ ยุคที่ไม้เบิดป่า บ้านไม้กลายเป็นบ้านปูน กะสินึกออกยากจักหน่อย และบ้าน(ไม้) หลังหนึ่งกะประกอบด้วยส่วนต่างๆ
หรือไม้ชิ้นต่างๆ มากมาย เฮ็ดจั่งได๋ สิฮู้กันเบิด สำหรับผู้อยากฮู้เนาะครับ
ผมกะอยากซอยตอบคำถามของท่านผู้นั่นทั้งหลาย แต่กะติดตรงที่ภาษาบ้านผมกับภาษาบ้านพี่ๆ กะสิคือกันแน่ บ่คือกันแน่ และผมเองกะฮู้จักส่วนต่างๆ ของบ้านบ่ดีพอ
ผมกะสิขอตอบเป็นรูปภาพกะแล้วกัน ผมสิวาดรูปคล้ายๆ บ้าน ให้เบิ่ง เป็นคล้ายโครงสร้างบ้านพื้นฐาน พยายามเฮ็ดให้เห็นภายในโตบ้าน และใส่หมายเลขกำกับไว้ให้
เป็นบ้านบ่ทันแล้ว ขาดอีกหลายส่วน จั่งค่อยแก้ไขเพิ่มเติมไปเรื่อยๆ เนาะครับ ผมกะเพิ่งลองวาดเทือแรก เหตุผลเพราะอยากมีแนวมาฮ่วมนำพี่น้องบ้านมหา
กะเลยขออนุญาตท่านผู้เข้ามาอ่านมาชม ขอโพสท์ ก่อน แล้วจั่งคอยแนะนำ ติชมบอกผมมาว่าขาดเกิน ผิดถึกหม่องได๋ ผมสินำไปแก้ไข
แล้วกะขอเชิญพี่น้องอ้ายพี่ เข้ามาใส่ซือส่วนต่างๆ ของบ้านตามหมายเลขให้ผมแน่ แล้วผมสิ อัพเดทเป็นรูปคือตัวอย่างให้ครับ
ตัวอย่างเป็นการการเอิ้นส่วนต่างๆ ของบ้าน ตามภาษาที่ทางบ้านผมเพิ้นเอิ้นกัน ได้กลับบ้านผมกะสิสอบถามและนำมาแก้ไขให้ถูกต้องอีกเทือนึง
ตัวอย่างที่สอง นี่กะเอิ้นตามพี่น้องทางเมืองตะลุง เมืองแปะ เพิ่นเอิ้น บ่ทันเรียบร้อย หนุ่มเมืองแปะกะเข่ามาเพิ่มหรือแก้ให้เด้อครับ แล้วผมสิอัพรูปให้ใหม่
และขอเชิญพี่น้องอีสานทุกท่าน อ้ายหนุ่มตระการ มาใส่ซือทางบ้านอ้ายนำเด้อ
อ้ายกะเม็งสะเร็น ภาษาทางสุรินทร์ กูย ส่วย กะขอเชิญเด้อครับ
ทางเมืองเลยเอิ้นว่าจังได๋ พี่น้อง ย้อ ภูไท ไทยโคราช เชิญมาให้ความรู้ซึ่งกันและกัน รวมทั้งอีสานทุกมุมโลกครับ มาเว่าซือบ้านสู่กันฟัง
ความรู้บ่หลายแต่กะอยากมีส่วนร่วมนำเสนอ ผิดพลาดกะขออภัยให้เด้อครับ
ภาพยังน้อย เบิ่งยาก สิแก้ไข ขออภัยอีกเทือหนึ่ง
Bookmarks