รำพันปั้นข้าวจี่

[จำปา]

โอน้อ..ยามเมื่ออยู่ไกลบ้าน..สถานถิ่นแดนกำเนิด
เกิดอยากกินข้าวจี่ปั้น..คือวันมื้อเมื่ออยู่เฮือน
บ่แชเชือนรอช้า..ฟ้าวหม่าข้าวเหนียวนึ่ง
สุกแล้วปั้นโฮยเกลือไห่นัวแซบ..พร้อมไม้เสียบจี่ฮ้อนๆ
อย่าไห่ไหม้..ทาไข่พร้อมหอมฮวยๆ


อากาศหนาวๆ นึกอยากกินข้าวจี่คืออยู่บ้านเฮาค่ะ
รับประกันความแซบโดย ซานต้าชวนชิม:l-

[paula]

รับรองความอร่อยโดย ลุงซานต้า น่าลอง

พี่จิลองเอาเนยทาแทนไข่แม่ะน้องจำปา คงซิแซบไปอีกแบบเนาะ อื้อๆๆๆลองๆๆ ต้องลองดู

[บ่าวหัวเขียง]

สุกแล้วขอ แม่นข้าวจี่
สุขอีหลี ต้องมีคนป้อนข้าวจี่ เด้อเอี้อยจำปา...555

[นู๋น้อย]

เข้าหน้าหนาว นั่งผิงไฟปิ้วข้าวจี่ทาไข่ :l-โอ้ยยยแซบบบ

[พล พระยาแล]

มักข้าวจี่ธรรมดาบ่ทาไข่ครับ เพราะบ่มักของคาวปานใด๋...5555

[จำปา]

พี่ปุ้ย..กะลองทาเบิ่งค่ะ ตั้งแต่น้ำมันหมูกะเคยทามาแล้วค่ะ หอมแซบไปอีกแบบค่ะ

บ่าวหัวเขียง..กินเองกะได้ดอกใหญ่แล้ว คิคิ

นู๋น้อย..ก่อนจี่ข้าวข่างกองไฟกะทาครีมหนาวๆแนเด้อ เดี๋ยวหน้าสิแห้งคือข้าวจี่เด๋ อิอิ

พล พระยาแล..คันเป็นข้าวใหม่บ่ทากะหอมแล้วค่ะ วาแล้วกะขอข้าวใหม่มากินก่อนนา อิอิ

[ทิดจ่อย]

แนมเห็นข้าวจี่ปั้น ถวิลหลังก้ำบ้านเก่า แท้นอ
คำญาคูเผิ่นกล่าวเว้า ให้อีสานเฮามั่นจั่งข้าวเหนียว

เผิ่นนั้นว่า


คิดฮอดบ้านเขตถิ่นดินอีสานเฮาน้อ
ยากนำควมขัดสนจั่งได้ไกลเมืองบ้าน
คนอีสานเฮานี้ทุกข์ทวีซ้ำตื่ม
ผืนแผ่นดินแห้งแล้งบ่อปานแห้งแอ่งน้ำใจ
เก้าสิแล้งสิบสิแล้งเพียงภายภาคภูมิสถาน
อั่นน้ำใจเฮาคนอีสานอย่าสุมียามแล้ง
ให้ฮักแพงพงษ์เซื้อเครือเดียวอย่างหลุดหล่ากันถ่อน
กุณาผองพี่น้องพงษ์เซื้อส่อยกัน
อย่าได้หมางเหม็นฮ้ายอีสานคำน้ำขอดแอ่ง
ขอดกะขอให้ขอดตั้งแต่อุแอ่งน้ำจิตใจเจ้าอย่าขอดนำ
อีสานคำเฮาแห้งให้โฮมแฮงเฮาแต่ง
อีสานเฮาแห้งแล้งเฮาแฮงป้อมส่อยกัน
ให้เจ้ามามาต้อน อีสานคำมาโฮมพวก
เชิญเจ้ามาเหนี่ยงคั้น ข้าวเหนียวปั้นส่อยกัน
อันแนวนามข้าวเหนียวนั้นให้คือตังกับขี้สูด
ปั้นให้แข็งแก่นไว้ ปานนั้นจั่งเผื่อพอ
อย่าได้ไลลืมก้ำอีสานคำก้ำบ้านเก่าเฮาเดอ
เสียงแคนดังอิ่นอ้อยคอยเจ้าให้ต่าวมา.....อ้ายน้องเอย