หน้าที่ 1 จากทั้งหมด 2 หน้า 12 หน้าสุดท้ายหน้าสุดท้าย
กำลังแสดงผล 1 ถึง 10 จากทั้งหมด 18

หัวข้อ: ไปหาส่อนกุ้งมาป่น

  1. #1
    ดูแลตรวจสอบเนื้อหา สัญลักษณ์ของ หนุ่มลาวสาวขะแมร์
    วันที่สมัคร
    Aug 2012
    ที่อยู่
    รังสิต
    กระทู้
    558

    ไปหาส่อนกุ้งมาป่น

    ขอคั่นเวลาพี่น้องช่วงฮายซีซั่น ขึ้นภูลงห้วยหลาย ย่านพี่น้องหิวเข่าอยากกินเข่า สิพาพี่น้อง
    ไปส่อนกุ้งมาก้อยมาป่นครับ



    ไปหาส่อนกุ้งมาป่น

    เอ๋า...แม่นอีหยัง ห้อยย้อยย้ามย้าง



    ไปหาส่อนกุ้งมาป่น

    แนวใส่กุ้งครับ ซื่อว่าจังได๋บุ๊…..เอ๋าเอิ้นว่าจังได๋กะพากันเอิ้นพากันตั้งเอาโลด ผมเอิ้นบั้งใส่กุ้ง
    สาวขะแมร์เพิ่นเอิ้น ตรูด๊ะตรัยกุง
    ของพ่อสาวขะแมร์เพิ่น เอาไว้ไปใส่กุ้งนำหนองฝายน้ำล้น พอได้ส่งลูกสาวเรียน ว่าซั่น
    ตอนนี้เซา เลิกใส่แล้วละครับ ย้อนลูกสาวเรียนจบ ประกอบกับกุ้งกะดับแนวไปนำ
    เป็นตาดับอยู่กุ้งกะดาย เฮ็ดหลายเอาฮ้าย



    ไปหาส่อนกุ้งมาป่น

    มาเบิ่งหลักการขั้นตอนของอุปกรณ์แนวหาอยู่หากินอันนี้
    สิเคยผ่านหูผ่านตาพี่น้องมาแน่สู่คน หลายๆ ท่านพี่น้องบ้านมหากะเคยได้กินย้อนมาแล้ว
    ผมขออธิบายเพิ่มเติมเสริมตื่มนิดหน่อย

    อุปกรณ์ที่นำมาเฮ็ดมาทำกะมี ลวด ตาข่ายพลาสติก หรือสิเฮ็ดแบบประยุกต์ใช้ขวดโค๊กแป้บซี่
    แล้วกะมีเชือก มีฟองน้ำหรือโฟม

    การทำเริ่มจากเอาลวดมาขดให้เป็นวงกลมๆ ขนาดขวดโค๊กนี่ละ แล้วกะตัดเอาตาข่ายพลาสติก
    มาม้วนเป็นกรวยแล้วหยิบใส่ขดลวด กลายเป็นงาครับ งาข่องงาไซจังซั่นเนาะ เฮ็ดงาไว้หลายๆ อัน
    หลังจากนั่นกะตัดเอาตาข่ายมาม้วนพันรอบงา หยิบ(เย็บ)ใส่กันอีก
    ถ้าอยากให้ดี กุ้งเข่าไปแล้วออกบ่ได้กะต้องใส่งากลางอีกอันนึง เหลือทางปลายบีบเปๆ
    หยิบใส่กันโดยจ่งเป็นป่องไว้หน่อยนึง
    ไว้เทเอากุ้ง เวลาเอาไปใส่กะเอาไม้ไผ่น้อยๆ ไม้จิ้มฟันหรือไม้ขัดหมกขัดไว้
    บ่ให้กุ้งออกเมื่อบ่ทันถึงเวลาออก

    แบบประยุกต์แบบคนเวลาหน่อย กะเอาปากขวดพลาสติกมาปาดหยิบใส่ปากใส่ก้นเลยกะได้
    หรือเฮ็ดจากขวดไปเลยกะได้
    แต่แบบนั้นบางคนเพิ่นกะติว่ามันบ่ซ่าง ถ้าผมเฮ็ดกะสิเป็นแบบขวดนั่นละครับ
    เหล็กซีเผาไฟแทงๆ เอาโลด

    สรุปตามรูป กะคือ
    1) ปากป่องเข้าหรืองา
    2) งากลางหรืองาใน กันบ่ให้กุ้งออกได้ง่ายๆ
    3) โฟมเฮ็ดเป็นทุ่นลอยน้ำพอได้สังเกตุเห็นยามโยนลงน้ำ
    4) ไม้ขัดหมก ถ้าเป็นแบบปากขวดพลาสติก กะสิง่ายขึ้น เปิดฝาปิดฝาเอาโลด
    5) สีฟ้าๆ นั่น สมมติเป็นเก้อนเหยื่อเนาะ

    ส่วนที่เห็นพอลางๆ อยู่ข้างในตาข่ายดำนั่นกะงูเขียวครับ นำขี่โก๋เข้าไปออกบ่ได้
    งูเขียวหมู่นี่กัดไผแล้วแผลสิเปื่อย เพิ่นว่าอย่าเอาไว้และอย่าปล่อยเด้อ..
    โอ้ย ฟังแล้วงง เฮ็ดนำบ่ถืกดอก


    ฮู้ขั้นตอน เฮ็ดแล้วกะเอาไปใส่(กุ้ง) ตั้วบาดนี่ ว่าสิไปส่อนบ่ส่อนดอก
    ย่านถึกปลิงค่าว เอาอันนี่ละ

    เอาไปโยนใส่น้ำไว้ซือๆ แม่นกุ้งตาบอดกะบ่มาเข่าให้เด้ละ ต้องมีเหยื่อล่อแหม๋



    เฮ็ดเหยื่อก่อน สูตรเหยื่อของผม เริ่มจากจกเข่าเหนียวใหม่ สีใหม่ๆ หนึ่งสุกใหม่ๆ
    มากี่ขางไฟแห่มๆ
    แล้วกะจกปลาแดกต่อนงามๆ มาปิ้งข้างกัน

    ไปหาส่อนกุ้งมาป่น



    ไปหาส่อนกุ้งมาป่น

    ปิ้งต่อนปลาแดกปลาค่อน้อย เปิดออกมาหอมฮ่วย ถ้าแม่นใส่ผักอีตู่ลงไปเทผงนัวสิหลายๆ
    บ่ต้องไปหากุ้งหาบักพริกหน่วยมากะพอ



    ไปหาส่อนกุ้งมาป่น

    แกะลงใส่ครกขณะยังฮ้อนๆ ครกไม้แบบนี่สิดีหลายกว่า ครกตำบักฮุ่งบ่แนะนำครับ
    ย่านครกแตก



    ไปหาส่อนกุ้งมาป่น

    โอ้...เมื่อยครับ ยากนำถ่ายรูป เข่ากี่เย็นเบิด ตำกะบ่แหลกเป็น
    นึกถึงตำเข่าเบีย(แบบข้าวกี่)ใส่อ่อมเด้อพี่น้อง ใจบ่ฮักอีหลีบ่ได้กิน



    ไปหาส่อนกุ้งมาป่น

    ซำนี่กะเอาเถาะ...เมื่อย...กุ้งมันมีแข่วอยู่ดอก ขอให้หอมฮ่วยๆ เป็นพอ
    ตำแล้วกะเอามาปั้นเป็นก้อนน้อยๆ พอหลวมปากงาครับ
    ก้อนท่อในบักกอกใส่ตำบักฮุ่งเนาะ แล้วกะผึ่งแดดพอก้ามจักหน่อย

    หลายขั้นตอนบ่เป็นตาได้กินง่าย...ตากแดดก่อนซั่นมื้อนี่ มื้ออื่นค่อยว่ากันใหม่
    มื้อนี่มีอีหยังกะกินกันไปก่อน..แน่ะหมกต่อนปลาแดกกะเบิด สิจ้ำหยังละ



    ไปหาส่อนกุ้งมาป่น

    เอาเหยื่อใส่บั้ง ไปฮอดฝั่งห้วยฝั่งหนอง อย่าลงไปใกล้ฝั่งหนองเด้อครับ
    "มันสิเป็นหยัง" บ่เป็นหยังดอกมันสิมื่นขาเปียกน้ำซั่นดอก
    พ้อหม่องฝั่งเดิ่นๆ โยนเวิ่นลงไปเลย นั่นเห็นแต่โฟมลอยอ่องล่อง จำหม่องไว้
    "เฮ็ดบ่เป็นตาได้กินเอาฮ้าย" ได้กินอยู่ หากินมากะแบบนี่ละ



    ไปหาส่อนกุ้งมาป่น

    โอ้...เงาขี่ฝ่ามาคักแท้ เป็นตาได้กินบ่น้อ อีพ่อเอ้ย...
    เอ๋าไหนๆ กะเตรียมมาแล้ว โยนลงไปพู้นละ ขาวๆ น้อยๆ ข้างเงาขี่ฝ่าพู้น จื่อไว้



    ถ่าให้ตาเวนคล้อยไปยามมันค่อยบ่ฮ้อน เอาไม้ส่าวมาทาวยกขึ้นมา มิดจั้ด
    บ่มีกุ้งฝอยเต้นให้เห็นจักโต ครับหว่างแล้งๆ หวั่งฮั่น น้ำนำห้วยฮ่องหมู่นี่แห้งเบิ้ด
    กุ้งกะสิดับแนวไปนำตี้ หรือว่าเหยื่อผมมันผิดสูตร

    ความเว้าว่าใส่กุ้งจนได้ส่งลูกเรียน ซ่ำนี่บ้อ
    โอ้ยขะน้อยหาอยู่หากิน บ่ม้มจ้ำหมกต่อนปลาแดกอีแม่ดอกพี่น้องเอ้ย

    ไปหาส่อนกุ้งมาป่น

    นี่ละครับ ผลงานผม สิได้ไปหายิงบ่างคือพ่อใหญ่หนิงหน่องเพิ่นว่านั่นละ



    แต่พ่อสาวขะแมร์ เพิ่นกะว่าเหยื่อสูตรของเพิ่นคักแท้เด้ละ

    มาครับพี่น้อง ผมสิพาไปพิสูจน์ เอาไปพิสูจน์ทางสารคามพู้นมันจั่งคักกะใจ
    ของเพิ่นกะสิตั๋วได้แต่กุ้งกะเหมนนั่นละ ผมว่า

    อย่าแซ่น้ำไว้โดนหลายละ เพิ่นเอินใส่ "เป็นหยังละพ่อ" กุ้งสิแหย่(เบียด) กันตาย ว่าซั่น
    "มาคือคุยโพ้ดคุยโพแท้บู้ละ"


    ไปหาส่อนกุ้งมาป่น

    ใส่เหยื่อแล้วโยนต้ามลงไปคือเก่า โงมาดังไฟไฟบ่ทันลุกดีซ้ำ
    กลับมาเอาไม้ส่าวทาวยกมาเบิ่ง



    ไปหาส่อนกุ้งมาป่น

    เอ้า...สิแม่นความเพิ่นฮึได๋



    ไปหาส่อนกุ้งมาป่น

    บ่แม่นเพิ่นคุยดอกพี่น้อง ของจริง
    กุ้งฝอยโตเป็นๆ ขี่ฝอยขีหนังเงี่ยเส้นเดียวกะบ่มีให้เลียกออกยาก
    อีพ่ออีแม่มาเห็น เพิ่นละว่า เฮ่อเฮ้ย..ป๊อบบบบเอย...กะซะมาเอาง่ายเอาดายแท้ ว่าซั่น



    ไปหาส่อนกุ้งมาป่น

    ได้กุ้งมาแล้วกะคร้านตี้ละเพิ่น เทใส่กาละมัง หยอดน้ำใส่นำ ย่านมันตาย ตามปะสาคนอยู่เมือง
    เอ็นดูสัตว์เล็กสัตว์น้อย บาดกลับมาเบิ่งกุ้งสิป่นใส่สวย ต้ายเบิด...อีเปิ่งกะดาย



    ไปหาส่อนกุ้งมาป่น


    มากินขั่วกุ้งนำกันครับพี่น้อง ป่นกะจักอยู่ใสดอก แล่นหาบักกอกอยู่
    ว่าลูกสิมา อีพ่อลาวนึ่งไก่ไว้ถ่า บักม่วงอกร่องสุก



    สูตรเหยื่อกุ้งพ่อสาวขะแมร์ขอเพิ่นนำมาเว้าสู่พี่น้องฟัง

    ตามเพิ่นบอก กะมี ข้าวเย็น(ข้าวเหนียวนึ่ง) นึ่งอุ่นหลายเทือจนเหนียว เอามากี่เป็นเข่าเบีย
    ต่อนปลาแดกโหน่งห่อใบตองปิ้งหอมๆ ใบตองกุงตองซาดแม่นถึกกัน
    ฮำอ่อนขั่วหอมๆ
    กากบักพร้าวที่คั้นเอากะทิแล้ว ขั่วหอมๆ

    นำส่วนผสมทั้งสี่ย่างมาตำใส่กัน ตำจนแหลกปานเฮ็ดเข่าเขียบพู้นเด้ครับ
    ซำผมเฮ็ดต๊ะลอยมันกะบ่ลอยมาใกล้ เพิ่นว่า

    ตำแล้วกะเอามาหล่อเป็นก้อนอ้อล้อแอ้แล้ ดากสองสามแดด
    สามารถเก็บและนำไปใช้ได้โดนหลายเดือน


    ลองเบิ่งครับ ซำนี่ละถ้าเพิ่นบ่ตั๋วผม เทือหมานคือของเพิ่นว้า
    พ้อหนองมีกุ้งบั้งสองบั้งกะป่นบ่เบิด

    สำหรับผมเรื่องหาอยู่หากิน บ่เป็นนำบ้านเขาดอก
    เบิดปีเบิดซาดเฝ้าอยู่แต่ในโรงงาน ดมกาวอยู่นี่ละ



    ขอขคุณบ้านมหา
    แก้ไขครั้งสุดท้ายโดย หนุ่มลาวสาวขะแมร์; 03-12-2012 at 14:11.

  2. #2
    ศึกษาหาความรู้ สัญลักษณ์ของ จ่ายงค์ อุดร
    วันที่สมัคร
    Aug 2012
    กระทู้
    32
    บล็อก
    1
    บ้านผมเอิ้นว่า " ไซกุ้ง" ครับได้สดๆเฮ็ดกุ้งเต้นแกล้มเบียร์ ผมกะว่าคักเติบอยู่ครับ

  3. #3
    ศึกษาหาความรู้ สัญลักษณ์ของ คุณฉุยเลย
    วันที่สมัคร
    Jan 2012
    ที่อยู่
    พระนครศรีอยุธยา
    กระทู้
    380
    บ้านผมเอิ้นตุ้มใส่กุ้ง แต่ว่าอี่พ่อเพิ่นใช้ไม้สานเอา คล้ายกับตุ้มใส่เอี่ยนครับ เอาปลาร้าแบบเหม็นๆหมักกับฮำ แล้วปั้นใส่ดินเหนียวเป็นก้อนๆ เป็นเหยื่อครับ

  4. #4
    ร่วมถ่ายทอดความรู้สู่สังคม สัญลักษณ์ของ ไผ่หวาน
    วันที่สมัคร
    Jun 2009
    ที่อยู่
    PATTAYA CITY
    กระทู้
    729
    บล็อก
    14
    โอ้...เมื่อยครับ ยากนำถ่ายรูป

    สู้ ๆ หล่า เพื่อบ้านมหาดอทคอมเฮา

  5. #5
    แบ่งปันความรู้และประสบการณ์
    วันที่สมัคร
    Feb 2009
    ที่อยู่
    สวิส....พะนะ
    กระทู้
    563
    ออนซอนเด้เนาะ...หากินหมานยุตั้วล่ะอ้ายเเบบนี้เอื้อยสาวขะแมร์บ่ออึดแนวอยากแนวกินดอกอิอิอิ

  6. #6
    ร่วมถ่ายทอดความรู้สู่สังคม
    วันที่สมัคร
    Mar 2007
    กระทู้
    1,212
    เทออกจากไซ สดๆ เต้นซวดซวด กำหว่านเข้าปาก หวานดีคักขะน่อยเอ้ย

    หือสิ บีบบักกอกสุกใส่โฮยเกียจักหน่อย บ๊ะ สุดยอด

  7. #7
    เจ้าหน้าที่ประชาสัมพันธ์
    ช่างภาพอิสระ
    สัญลักษณ์ของ ฅนภูค่าว
    วันที่สมัคร
    Feb 2010
    ที่อยู่
    นครโคราช บ้านเกิดกาฬสินธุ์
    กระทู้
    1,206
    หากินง่ายตั๊วะหละเนาะอาว(สำหรับฅนดู๋ ขยัน ฅนหากินเป็น) ขี่คร้านจังขะน้อยนี่แล้วซาด ไคแนแต่ถ่าซื้อนำไทพี่น้องเพิ้นเอามาขายให่หมกละซาว ขอบคุณครับอาวที่สอนวิซาให่ เมือยูบ้านยามได๋สิลองเอาไปหากินยูดอก บาดห่าคึดดู๋แมะ.... :*-

  8. #8
    ฝ่ายบริหารระดับสูง สัญลักษณ์ของ พล พระยาแล
    วันที่สมัคร
    Mar 2008
    กระทู้
    6,430
    ฮ่วย...หากินหมานแถะน้อบาดเนี่ย ขอบคุณกระทู้ดีมีสาระ อีกแล้วครับท่าน....ฮิ้วววว

  9. #9
    ศึกษาหาความรู้ สัญลักษณ์ของ suny
    วันที่สมัคร
    Nov 2008
    ที่อยู่
    ภูมิลำเนา มหาสารคาม ทำงาน ประจวบ
    กระทู้
    787
    ป้าดมาเป็นตาหากินง่ายเนาะครับ ผมอยู่ใกล้น้ำยุ สิลองเฮ็ดลองเบิ่ง เทือได้กินสิส่งข่าวเด้อครับ ขอบคุณสำหรับสูตรการเฮ็ดกับสูตรเหยื่อ

  10. #10
    กุ้งฝอยเป็นตาออนซอนเนาะค่ะ อุปกรณ์แบบนี้สงสัยแบบใหม่แมนบ่น้อค่ะ เพราะมีขวดพลาสติกแล้วแบบเก่าๆดั้งเดิมอิสานใช้หยังจับกุ้งน้อค่ะ
    LET IT BE...

หน้าที่ 1 จากทั้งหมด 2 หน้า 12 หน้าสุดท้ายหน้าสุดท้าย

กฎการส่งข้อความ

  • You may not post new threads
  • You may not post replies
  • You may not post attachments
  • You may not edit your posts
  •