สวัสดีพี่น้องบ้านมหาที่คิดฮอดซู่ผู้ซู่คนจ้า
เมื่อประมาณต้นเดือนพฤศจิกายน 2555 ที่ผ่านมา ขามป้อมได้รับโทรศัพท์จากญาเอื้อยนุช หรือ คนติดเกาะ
สมาชิกบ้านมหาของเฮา ที่พี่น้องทางห้องกล่องขอเพลงคงสิคุ้นเคยกันดี
เอื้อยเลาได้ไปพลัดถิ่นไปติดเกาะอยู่ที่เกาะพงันมาเป็นเวลาเกือบยี่สิบปี
และได้เป็นหนึ่งในสมาชิก "บ้านมหาทะเลใต้" นั้นเอง
ญาเอื้อยเลาแจ้งข่าวว่า ตอนนี้ได้กลับมาตั้งหลักปักฐานอยู่อำเภอศรีวิไล จังหวัดบึงกาฬเป็นการถาวรแล้ว
ถ้าพอสิมีเวลากะแวมายามเอื้อยแหน่เด้อพานะ
อำเภอศรีวิไลห่างจากโตจังหวัดบึงกาฬประมาณยี่สิบสามกิโล เจ้าภาพเพิ่นกะเลยพาไปกินตำบักหุ่งริมโขงบึงกาฬจ้า
พ่อใหญ่จ่อย เอื้อยนุชและบอดี้การ์ด
อ้ายกับเอื้อยเพิ่นบอกว่าหลังจากที่ตัดสินใจสิกลับมาอยู่บ้านเกิดกะเลยมองหาแนวเฮ็ด พอให้สองเฒ่าบ่เหงาพานะ
และแนวเฮ็ดนั้นกะคือร้านหมูกระทะแบบบุฟเฟต์ ที่เอื้อยกับอ้ายได้พากันสำรวจเบิ่งความต้องการของพี่น้องแถวนั้นแล้ว
ขามป้อมกะดีใจและเห็นดีนำจ้า
ชัดๆกับโฉมหน้าบอดี้การ์ดส่วนโตของเอื้อยเพิ่น อ้ายแอ๋ง หนุ่มใหญ่จากชัยภูมิ
หรือฉายา แอ๋งชัยภูมิ ในห้องแชท ห้องกล่องขอเพลงบ้านมหา
อ้ายกับเอื้อยเพิ่นพาแวะไปเบิ่งที่ตั้ง "ร้านหมูกระทะจ้าวเกาะ"
กำลังเป็นรูปเป็นร่างจ้า
จากนั้นเจ้าภาพกะพาเดินทางต่อไปบึงโขงหลง อีกหนึ่งอำเภอของจังหวัดบึงกาฬ
แวะไหว้พระที่วัดภูทอกเพื่อความเป็นศิริมงคลกันก่อนเดินทางต่อจ้า
ฮอดแล้ว บรรยากาศดีขนาดเลยจ้า
แนวกินกะแซบจ้า พี่น้องมีโอกาสได้ผ่านมาทางพี้กะแวะมาซิมเบิ่งเด้อจ้า
ได้เวลาอำลาพาจากเจ้าภาพ กลับมาปฏิบัติภารกิจเจ้าของแล้วล่ะบาดนิ
เพื่อสิได้กลับมาใหม่มื้อเปิดร้าน เจ้าภาพย้ำนักย้ำหนาว่าถ้าบ่มา "เคียด" พานะ
หนึ่งเดือนต่อมา..........
คืนวันที่ 10 ธันวาคม 2555 ขามป้อมกับใหญ่จ่อยไปฮอดประมาณทุ่มกว่าๆ
เห็นอ้ายเพิ่นกำลังทำความสะอาด เพื่อให้ทันเปิดร้านในวันที่ 11 ธันวาคม 2555
ใหญ่จ่อยกะบ่รอซ้า ฟ้าวไปซ่อยเพิ่น จากนั้น "หล้า" สมาชิกบ้านมหา สาวสวยจากชัยภูมิกะมาฮอดไล่ๆกัน
เหตุการณ์หลังจากนั้นกะบ่ได้บันทึกภาพไว้เลยจ้า ย้อนว่ามีอุปกรณ์ประกอบการสนทนาเป็นชีวาส ,285,แล้วกะไฮนาเก้น
สามกษัตรบวกกันกะเลยมุ่นอุ้ยปุ้ยบันเทิงศิลป์ซั่นดอกหวา
ตัดภาพมาที่ตอนเช้าเลยเนาะจ้า เตรียมสถานที่เพื่อที่สิเปิดแบบเป็นทางการตอนแลง
พิธีการทางสงฆ์จ้า เอื้อยอ้ายเพิ่นได้นิมนต์พระมาเจริญพระพุทธมนต์
ทางในครัวกะซ่อยกันคนละไม้ละมือ นานแล้วหลายจนว่าฝ่ายช่างได้เข้ามาซ่อย:l-
เตรียมพร้อมสำหรับต้อนรับลูกค้าสำหรับค่ำคืนนี้
แอบถ่ายบรรยากาศของร้านจากในครัว คนกะเริ่มทยอยกันมาแหน่แล้ว
หลังจากนั้นลูกค้ากะแน่นร้านจนบ่มีเวลาถ่ายรูปมาฝากพี่่น้องเลยจ้า
อำลาเอื้อยอ้ายเพิ่นที่เวลาสามทุ่มกว่าๆ ย้อนว่ามีภารกิจเร่งด่วนถ่าอยู่
อ้ายกับเอื้อยเพิ่นฝากบอกมาว่าพี่น้องบ้านเฮากายไปกายมาทางอำเภอศรีวิไล จังหวัดบึงกาฬ
กะมาเยี่ยมมายามกันแหน่เด้อจ้า
ปล.บ่ต้องแปลกใจถ้าพ่อใหญ่จ่อยเลาสิใส่เสื้อโตเก่า เสื้อเอาบุญเลามีซ่ำนั้น
ขอบคุณพื้นที่แบ่งปันจากบ้านมหาดอทคอม
บักขามป้อม รายงาน
Bookmarks