ขวานหอน ขวานอีมุ้ย axe-horn axe

[หนุ่มลาวสาวขะแมร์]

สวัสดีปีใหม่ ปี ๒๕๕๖ ครับพี่น้องบ้านมหา

สวัสดีอ้ายเซียงสีฯ ครูเล็ก แมงสะดิ้ง อ้ายสุดสาคร อ้ายอีหยังฯ พี่ๆ เวบมาสเตอร์ที่เคารพและพี่น้องบ้านมหาที่รักทุกท่านที่ผมยังบ่ได้สวัสดีปีใหม่เด้อครับ

หยุดปีใหม่ไปหลายมื้อไปแล้วกลับบ่ได้ย้อนรถป้ายแดงเต็มถนนบ่มีหม่องให้รถเก่าแล่น ค่อยคลำทางมาหลายมื้อจังฮอด

เข้ามาบ้านมหาเห็นอ้ายพี่น้องโสเว้ากันถึงงานพาแลงที่สิฮอดนี่

ผมกะเลยสิขอเตรียมอุปกรณ์ป้องกันโตคือกัน เพราะต้องเดินทางข่วมสองสามจังหวัดไปเอาบุญใหญ่


มาซ่อยผมเลือกแน่ครับพี่น้องว่าอันได๋ดี









ขวานหอน อุปกรณ์เครื่องมือของพี่น้องชาวอีสาน ใช้ในการปั้มตัดโค่นต้นไม้ ถากเสาเฮียน เสาจวน ผ่าฟืนนึ่งเข่า หรือปู่ตาบางท่านกะใช้เปิดปีก

หมากขวานตีจากเหล็กอย่างดี เหล็กแหนบสิบล้อที่ผมเคยได้ยิน จักแม่นบ่แม่น ด้ามเฮ็ดจากเหง่าลำไม้ไผ่บง

ไม้ไผ่ด้ามขวาน ตามที่ผมสัมภาษณ์พ่อใหญ่พ่อตาผู้สันทัดกรณีเพิ่นว่า ถ้าทนสู้ไม้ไผ่บงลำงามๆ แก่ๆ บ่ได้ แล้วแต่มักไผมันเนาะ

หอน หรือ หงอน หรือสิว่าเขากะได้ แต่มีเขาเดียวเด้ เฮ็ดจากไม้เหมียดแอ่ เพิ่นว่ามันค่อยหมั่น ในรูปเป็นขวานเก่าพึ่งถ่ายด้ามใหม่

หอน มีหน้าที่คอยถ่วงศูนย์ หรือสร้างการ Balance ยามเหวี่ยงและเพิ่มน้ำหนักในการจิกตัด (เดาไปตามความรู้สึกผมเด้อครับ)






หรือว่าขวานอีมุ้ยดีน้อ บ้านผมเอิ้นขวานอีมุ้ยครับ ใช้เหน็บหลังผ้าคำม้ายามขึ้นโคก ลงท่งเลี้ยงควายพอได้ถากกกไม้ให้เป็นรูปหัวใจกับซือผู้สาว

ขวานอีมุ้ย บ่มีหอน ทุกท่านรู้จักกันดี หลายพี่น้องอาจสิเอิ้นหรือเรียก "ขวาน" ซือๆ

หมากขวานกะตีจากเหล็กอย่างดี เหนียวแข็ง ด้ามขวานเฮ็ดจากไม้เนื้อแข็ง ในรูปเป็นไม้พยุงครับ ซูมใส่ขวานผัดไปชัดตอเฟียงกล้องกะดาย


การใช้งาน "ขวาน" ในสมัยนี่กะสิห่างๆ สังเกตุได้ว่าขวานทั้งสองด้ามบ่ค่อยได้ฝนหรือได้ลับคมพอปานได๋



นี่ละขะน้อยแนวสิได้เหน็บแอวไปงานพาแลงทางบางพลี