ขอนำเสนออาหารดี ของแซบอีสานแต่พ่อแต่แม่ครับ หม่ำไส้ปลา หรือหม่ำปลาดุก
ส่วนผสม คือ
ไส้ปลาช่อนหรือปลาค่อ
ปลาดุกสด
เกลือ
กระเทียม
ชูรส
ใบหอมหรือใบผักแป้น
น้ำเข่าหม่า
และกระปุกแก้วสำหรับบรรจุ
ขั้นตอนการทำหม่ำปลาดุก หรือหม่ำไส้ปลา
๑) เริ่มจากหาไส้ปลามาจำนวนนึง (ไส้ปลาช่อนปลาค่อ) เอาบี(ดี) ออกหรือไม่เอาออกก็ได้
ล้างสะเด็ดน้ำ หมักหรือเอียบเกลือไว้ห้าหกมื้อให้ไส้ปลาเข่าเกลือหรือเค็มนั่นเอง
๒) พอมั่นใจว่าไส้ปลาเค็มแล้ว กะเอาปลาดุกสดมาจำนวนนึง ตัดหัวเอาใส้ออก แล้วทุบตัวปลาให้เปเป
นำปลาที่ทุบแล้วแซ่น้ำเข่าหม่า(น้ำแช่ข้าวสารเหนียว) ประมาณสองสามชั่วโมง เพื่อให้เนื้อปลาแข่นหรือแข็ง
๓) นำปลามาสับฟักให้แหลก พร้อมทั้งฟักไส้ปลาที่เอียบเกลือไว้ก่อนหน้านั่นใส่นำกัน
ในขั้นตอนนี่ ถ้าอยากให้หม่ำไส้ปลาสีแดงอมชมพูงามเป็นตากินกว่าเก่า ให้เอาหัวปลาที่ตัดออกมาปิ้งไฟแห่มๆ ฟักตื่มลงไป
๔) ตำกระเทียม แล้วนำหัวเนื้อไส้ปลาที่ฟักแล้วนั่น มาคั้นใส่กัน เติมชูรส ใบหอมผักแป้นแล้วแต่มัก คั้นจนคิดว่าได้ที่
แล้วกะบรรจุใส่กระปุกไว้ปิดฝาให้สนิท เป็นอันแล้วเสร็จการเฮ็ดหม่ำไส้ปลาครับ แล้วกะถ่าตักมากิน
ปล่อยไว้ห้าหกมื้อ กะสิเริ่มเป็นหม่ำ โดยสังเกตุสิมีน้ำไหลออกมาแสดงว่าพอกินหรือกินได้แล้ว
กินกับป่นปลาย่างพริกป่นนั่นละครับ จ้ำหม่ำจ้ำปลาย่างป่นจ้ำแจ่ว
สำหรับเนื้อปลา ผู้ที่หมั่นกะเลาะเอาก้างออก ผู้บ่หมั่นกะฟักก้างแหลกๆ ไปเลย
ปริมาณส่วนผสมเนื้อปลาไส้ปลาผู้เฮ็ดกะสังเกตุเอาครับ ซำได๋สิพอดีบ่เค็มหลาย
โดยประมาณกะ 4:1,3:1,2:1 เคิ่งต่อเคิ่งหรือตามมักของผู้เฮ็ดครับ
ปลาสิส้มเองเนื่องจากน้ำเข่าหม่า และกะสิหอมจากกลิ่นของกระเทียมใบหอมผักแป้น
และนัวจากชูรส แซบอีหลีครับ พี่น้องผู้บ่เคยกะลองหากินเบิ่ง
หม่ำปลาดุก หรือหม่ำไส้ปลา สีชมพูอ่อนๆ กำลังหอม
ขาดซอยหัวคิงไค บักเขือขื่น ป่นปลาย่าง
อีกแบบนึงกะวิธีการเดียวกันหรือคล้ายกัน แต่ใช้เนื้อปลาดุกย่างพอก้ามแทน
สิเป็นหม่ำเร็ว เหมาะกับผู้เฮ็ดขาย (เพิ่นเว้าให้ฟัง)
ขั้นตอนผิดพลาด พี่น้องบ้านมหากะซ่อยเด้อครับผู้ฮู้ ผมกะสอบถามผู้เพินเฮ็ดมาอีกเทือนึงคือกัน
Bookmarks