ปีใหม่กลับบ้านลุงจาน(อ้าย) เฮ็ดข้าวหลามให้กินครับ


ข้าวหลามธรรมดาๆ อีกวิธีนึง

ส่วนผสมกะมี ข้าวสารเหนียว กะทิ น้ำตาล เมล็ดถั่วดำ และไม้ไผ่บ้านลำอ่อน ๆ งาม ๆ

วิธีทำ ง่าย ๆ บ่ยุ่งยาก

เริ่มไปตัดไม้ไผ่บ้านอ่อน ลำงามๆ กำลังพอดี เป็นลำที่เกิดปีนี่(ล่าสุด) มาไว้ก่อน

นำในถั่วดำแช่น้ำให้พุหรือนิ่ม และกะหม่าข้าวสารไว้

ผ่าบักพร้าวแห้ง ขูด คั้นกะทิ

เซอะข้าวหม่า มาผสมกับ กะทิ น้ำตาล และในถั่วดำ ซาวให้เข้ากัน

ตัดบั้งไม้ไผ่ และบรรจุส่วนผสมของเข้าหลามลงทีละกระบอก

หางกะทิกะเติมลงไปนำ และเอาฝอยกาบบักพร้าวปิดปากกระบอก

หลังจากนั้นกะดังไฟครับ พอไฟติดกะเริ่มเผาได้เลย

แต่ที่ว่าข้าวหลามแบบง่ายๆ กะคือเพื่อลดขั้นตอนการเผาให้สั้นลง กรณีฟ้าวไปฟ้าวมา

เฮากะเอาบั้งข้าวหลามมาต้มในปี๊บสาก่อน บ่มีปี๊บใช้หม้อหนึ่งแทน

ต้มไปสักระยะหนึ่งโดยประมาณ กะเอาออกจากหม้อมาเผาไฟต่อครับ

ถ้าสิต้มให้สุกเลยโลด กะสิกลายเป็นข้าวต้มบั้งไปซะและกะสิบ่มีกลิ่นหอมจากถ่านไฟ

เอามาย่างผิงถ่านไฟจนมั่นใจว่าสิสุกแล้วละ กะลองผ่าบั้งน้อย

ถ้าบั้งน้อยสุก บั้งใหญ่กะเผาต่ออีกจักหน่อย ก๋าให้เกี้ยเหลืองแห่มเป็นอันเรียบร้อยครับ



ข้าวหลาม แบบง่ายๆ



ข้าวหลามชาวอีสานที่ผมรู้จักและเข้าใจมาตลอด คือ ต้องเฮ็ดตอนปีใหม่ ข้าวใหม่ ไม้ไผ่อ่อนลำใหม่

อากาศหนาวๆ เย็นๆ ได้ผิงไฟไปนำ ถ้าปีใหม่อากาศฮ้อนกะสิบ่เฮ็ดข้าวหลามกิน เพราะสิหนิ่งกันเผา(เกี่ยงกัน)

ถ้าหาไม้ไผ่บ้านอ่อนลำพอดีบ่ได้ ปีนั้นเบิดปีกะสิบ่ได้กินข้าวหลาม

เว้าถึงบ้านผมให้ฟังเด้อครับ พี่น้องบ้านอื่นอยากยามได๋เพิ่นอาจสิเผากินโลด บ่ต้องพิธีลีตองให้มันยาก



ข้าวหลาม แบบง่ายๆ


ข้าวหลามไซสมาตรฐานไม้ไผ่บ้าน ใหญ่ยาว เต็มความจุ บ่เอาเปรียบผู้บริโภค
กินเบิดบั้งเฮ็ดอีหยังต่อบ่ได้นอกจากนอนเวน

ขออภัยพี่น้อง ตอนผ่าออกกินบ่ได้ถ่ายรูปไว้ กะคือเข้าหลามที่เห็นๆ ทั่วไปนั่นละครับ
ขาวๆ เหลืองแห่ม ดำในบักถั่วและหอมข้าวใหม่

ไม้ไผ่บ้านลำอ่อนมันสิติดเกี้ยงามครับ ผ่าออกเป็นท่อนคุ่นลุ่น ผิวเกี้ยขาวเนียนงาม
ส่วนไม้ไผ่แก่กะบ่ฮู้จักนำคือกัน พ่อแม่เพิ่นบ่พาเฮ็ดจักเทือ



ข้าวหลาม แบบง่ายๆ


ไม้ไผ่บ้านลำไหม่ของปี เลือกเอาลำพองามๆ นำมาเฮ็ดบั้งข้าวหลาม



แม่ค้าเฮ็ดขายหรือพี่น้องเฮ็ดแบบได๋น้อ

ขอบคุณบ้านมหา