ลาบไก่บ้าน อ่อมไก่บ้านใส่หน่อไม้ส้ม

[หยก ยโสธร]

เป็นอีกเมนูครับ ที่ได้จัดตอนกลับบ้านหว่างหั่น ชมกันเลยครับ

ทีมงาน นั่งโสแหล่กันสาก่อน ลงมะติว่าสิกินไก่ หรือเป็ด .... สรุปว่าลาบไก่บ้านเป็นเมนูที่มีคนเห็นด้วยหลายสุดครับ



หมอแดงๆนี่ว่า เป็ดหรือไก่กะได้ ผมกินได้เบิด พะนะ



ค่ำแล้ว ค้างน้ำฮ้อน หลกขนลนปีก แยกเนื้อหน้าอกไก่ ขาโอ้งไก่ กับเครื่องในไว้ถ่าเฮ้ดลาบ







เอาอ่อมไก่ก่อนน้อครับ หน่อไม้ส้ม อีแม่เฮ็ดเอง ส้มพอดีปานหยัง



สับไก่สำหรับสิอ่อมใส่หม้อ ตำเครื่องอ่อม มีพริกแห้ง หอมแดง หัวซิงไค เกลือหน่อยนึง ใส่ลงไปในหม้อ ปรุงรสด้วยนำปลา น้ำปลาแดก ผงนัว แล้วยกขึ้นตั้งไฟขั่วแบบบ่ต้องใส่น้ำสาก่อน



สังเกตุหน่อไม้ส้มเริ่มยุบ ไก่เริ่มสุก จั่งเติมน้ำลงไป มักจ้ำกะใส่หน่อย มักซดน้ำกะใส่หลายเติบ รอให้น้ำเดือด ซิมเบิ่ง แซบแล้วกะหยุมผักอีตู่ลงไป ยกลง ตักใส่ถ้วยเสริฟได้ครับ







หันมาทางลาบไก่ครับ
แร่เอาตะเนื้อ ฟักหมุ่นๆ เครื่องในซอยเอาบางๆ หยอดน้ำหน่อยนึง เกลือ น้ำปลาแดก ผงนัวอย่างละหน่อย (บ่ต้องหนัก ถ่าปรุงบาดคนลาบอีกเทือนึง) แล้วยกหม้อขึ้นตั้งไฟ ลวนเนื้อให้สุก แล้วพักไว้ให้เย็น



ระหว่างรอไก่เย็น กะหันมาซอยใบบักกรูด หอมแดง ผักซีจีน ต้นหอม ไว้ใส่ลาบ



พอเนื้อไก่ที่ลวนไว้เย็นแล้ว เฮากะปรุงๆได้เลยครับ พริกผง ข้าวขั่ว บักนาว น้ำปลา ผงนัว ผักที่หั่นไว้ ใส่ลงไป คนให้เข้ากัน ซิมเบิ่ง แซบแล้วกะตักใส่จานเสริฟได้เลยครับ





ตอนหาพาข้าว ถ่านกล้องเบิดพี่น้องผม เลยบ่ได้รูปวงพาข้าวมาสู่เบิ่งซ่ำ
ขอบคุณเวปบ้านมหา สำหรับพื้นที่นำเสนอ
แซบๆนำกันเด้อครับ :,1- :,1-

[pui.lab]

เห็นลาบไก่แล้ว พี่ก็ขอตัวไปลาบก่อนบาดนิได้เวลากินข้าวแลง เดี่ยวเอาลาบไก่ทาง ปตท โอีะ ตปท. มาส่ง เอิ๊กสส์

[พวงพยอม]

ลาบไก่น้องหยก ยโสธร เป็นตาแซ่บน้อจ้า ถ่ากินลาบไก่จากน้องปุ้ยนำเด้อจ้า

[พ่อใหญ่เซียงเบ้า]

เว้าพื้นลาบไก่ กินยามได๋กะได่ถึงหูออก ย้อนว่าแซบสุดยอด กินกับผัก บักลิ้นฟ้า ยอดกอกอ่อน ใบบักตูม
เข้ากันคักขนาดครับ

[Aksorn]

อ่อมไก่ใส่หน่อไม้ส้มเป็นตาแซบบ่ได้กินโดนแล้ว ขอบคุณที่ลงรูปให้อยากนำ

[คนตระการ...]

เว่าพื้นไก่บ้าน เฮ็ดจั่งไดกินกะแซบๆๆๆๆ กับแกล้มกะได้ กับข้าวกะดี

[คุณฉุยเลย]

ผู้บ่าวไทบ้านเฮ็ดกินเก่งเนาะ บ่ต้องยากซุมแม่ครัวเลย จัดการเองได้ บรรยากาศเป็นตาม่วนคัก

[suny]

เห็นแล้วแลงนี้ซิไปหามาลาบกินยุดอกครับ เป็นตาแซบคักทั้งอ่อม ทั้งลาบ

[thedon]

แนวมักเลยครับ ลาบไก่บ้าน เทื่อหน้าซวนไปกินนำแหน่เด้อ 5

[pcalibration]

ขื่นชื่อหว่าไก่ ไก่บ้านหือไก่วัด กะแซบคือกันเด้อพี่น้อง..5555บ่เกี่ยวกับสมภาร.
กินกันแบบวิถีบ้านนอกคอกนา บ่หรูหราแบบไฮโซ หน่าสิมีเหล้าโทนำเนาะ..หนุ่มหยก..
:b-b:b-b:b-b:b-b