ก่อนอื่นต้องสวัสดีชาวบ้านมหาก่อนน้อครับ เนื่องจากว่า วันที่ 29 ที่ผ่านมา ผมได้มีโอกาสไปเยี่ยมประเทศเพื่อนบ้านของเฮาครับ
นั่นกะคือ "บ้านเหียง ประเทศลาว" พอดีว่าบ้านเหียง ได้จัดบุญเดือน ๔ ขึ้นครับ พี่น้องชาวไทยเฮาที่อยู่ใกล้ๆกับชายแดน เผิ่นกะลงไปทุกปี
ในปีนี้ ผมกะเลยถือโอกาสไปเยี่ยมชมเบิ่งครับ สำหรับการเดินทางกะออกจาก"ช่องตาอู" (ติดเขต อําเภอบุณฑริก จังหวัดอุบลราชธานี ) เดินมาขึ้นรถโดยสาร ระยะทางจากช่องตาอู - บ้านเหียง
กะประมาณ 10 กิโล กว่าๆ ผมกะเอา 55 ค่าเฮ็ด passport แม่นบ่ครับ ผมกะบ่มั่นใจ กะคนละ 100 บาท
คนที่เคยไปปีที่แล้ว เขาบอกว่าแค่ 20 บาท ค่ารถกะ 20 บาทคือกัน เอาเป็นว่าผมเล่าด้วยภาพเลยน้อครับ กล้องบ่ได้เอาไปนำครับ เนื่องจากอยู่ช่องตาอู จนท เผิ่นบ่ให้ถ่ายรูป
กะเลยบ่มั่นใจว่า ถ้าเอาไปบ้านเหียงนำ สิถ่ายได้บ่ กฎหมายบ้านเมืองทางพู้นกะจักเป็นแนวได๋น้อครับ เกิดว่าไปถ่ายรูป สุ่มสี่สุ่มห้า ละถืกจับ ถืกยึดกล้องขึ้นมา
มันกะบ่คุ้มกัน ภาพจากกล้องเด็กมือถือเด็กน้อยล่ะครับ ชัดบ่ชัดกะทนเบิ่งเอาเด้อครับ
แผนที่พอคร่าวๆครับ
-เริ่มจากขึ้นรถอยู่ที่ช่องตาอูครับ รถกะสภาพอย่างที่เห็น เป็นรถคันน้อยๆครับ ผมนั่งหลังคา ช่วงแรกลงเขาล้วนๆครับ ย่านกะย่าน
แต่พอลงจากเขาแล้วกะขำอย่างแฮงครับ แบบว่านั่งรถคันน้อยๆ เก่าๆ ได้นั่งหลังคา ทางกะทางแดง ไง่กู่นๆๆ ฟังหมอลำลาวไปนำ ได้อารมณ์สุดๆครับ อิๆๆ
หลังจากนั้นอีกบ่โดน กะมาฮอดแล้วครับ บ้านเหียง ลักษณะของเฮือน กะยังเป็นเฮือนไม้อยู่ครับ ทางเป็นทางลูกรังครับ
ซักฮูปแหน่
ทางเจ้าภาพเผิ่นกะต้อนรับด้วย ลาบเนื้อ ต้มเนื้อ ครับ แต่ผมบ่กล้ากิน ถ้าว่ารังเกียจกะบ่แม่นครับ คือบ่ค่อยสะอาด แมงวันเขียวกะตอมคั้กคัก แค่เป็นห่วงสุขภาพจะของครับ กะเลยไปหากิน "เฝ๋อ" ครับ (เฝ๋อ คือ ก๋วยเตี๋ยว บ้านเฮาครับเผื่อมีคนยังบ่ฮู้)
ถามร้านแรกถ้วยละ 40 โอ้วว แพงแฮง ร้านที่ 2 พอฟัง ถ้วยละ 30 แต่กะผิดหวังหลายๆ เฝ๋อใส่ปลาหมึกครับ ถั่วกะบ่มี
อีกเรื่องหนึ่งที่ผมอยากเว่าให้ฟังกะคือ น้ำแพงแฮงครับ เนื่องจากว่า ร้านค้าแถวนั้น ต้องข้ามฝั่งมาซื้อของจากฝั่งไทย ละเอาไปขายอยู่หั่นอีก
โออิชิ ขวดละ 35 บาท
สปอนเซอร์ 20 บาท
Big Cola 25 บาท
แพงบ่ครับ แต่น้ำผมเบิดเกือบ 200
พอตกกลางคืนกะเลาะเที่ยวงานครับ มีหมอลำคณะใหญ่ พร้อมด้วยลำวง แต่ผมยอมรับว่า งานเขาใหญ่กว่าบุญบ้านแถวๆบ้านผมอีหลี มีของขายทั่วๆไป
เสื้อผ้าแพงกว่าบ้านเฮาหลายๆครับ การละเล่นไฮโล กุ้งไก่ เต็มทีบครับ
-ฮ้านหมอลำครับ นั่งเบิ่งคาวนึง เริ่มอยากนอนครับ เป็นลำเรื่อง ต่อกลอน
กะเลยมาเบิ่งรำวงต่อ ซื้อโต๊ะนั่งกินเบย โต๊ะละ 700 บาท ได้เบยลังนึง กะน้ำแข็งถุงนึง เก้าอี้โตละ 15 บาท แก้วน้ำ แก้วละ 10 บาท :b-b
เป็นได๋ครับราคา เพลงที่เขาเล่นกะมีแต่เพลงลูกทุ่งบ้านเฮานี่ล่ะครับ ส่วนเรื่องตีกัน กะบ่ค่อยมีให้เห็น แต่ผมกะเกือบโดน พอดีนั่งเฝ้ากระเป๋าให้หลานๆ
โต๊ะข้างหลังผม ถืกขวดฟาดหัวแตก ผมกะเลยเซาม่วน แต่ตามคำเว่าของคนแถวนั่น ส่วนมากการทะเลาะวิวาท สิมีแต่คนไทยครับ ไทยมาตีคนลาว ละกะไทยตีกับไทย
สรุปแล้วเบิดคืน มีแค่เหตุการณ์เดียวครับ นอกนั้นกะเต้นกันจนซอดแจ้งพู้นล่ะครับ ผมเยาเลย 55
-รำวงครับ
-จากนั้นกะเดินทางกลับบ้านครับกันครับ บ่ได้นอนเลย 6 โ มงมาถ่ารถอยู่ทางเข้าบ้าน ถ่าบ่โดนรถกะมาครับ สถาพรถตามรูปครับ อิๆ โดนใจผมหลาย
-พอใกล้ฮอดช่องตาอู กะเป็นทางขึ้นเขาล่ะครับ ด้วยสภาำำพรถที่บ่เอื้ออำนวย สุดท้ายกะได้ซุกตามระเบียบครับ
ไง่ขนาด มาฮอดบ้าน หัวแดงเบิด 55
ในที่สุดกะมาฮอดประเทศไทยแล้วครับ มีแฮงหลาย ปีหน้าฟ้าใหม่ ค่อยว่ากันอีกเทื่อนึง หลายๆคนกะสิหลาบยุว่าจัก
สิ่งที่ผมเห็นได้ชัดเจนที่สุดกะคือ อาหารการกินของเขา ยังหล้าหลังยุหลาย รวมไปถึงคุณภาพชีวิต บางสิ่งบางอย่างยังบ่ถูกสุขลักษณะยุ
เด็ด !! แต่พวงมาลัยรถนี่ล่ะครับ เฮ็ดผมขนลุกเลย เห็นรถที่แล่นผ่าน
แนมไปบ่เห็นคนขับ ผมตกใจ นึกว่าผีหลอก ที่ไหนได้ คนขับนั่งยุข้างซ้ายพู้นๆ
สุดท้ายผมกะต้องขออภัย หากอ่านแล้วสับสนแหน่ หรือเนื้อหาอาจจะยาว รูปกะบ่หลาย แต่กะต้องขอขอบคุณเด้อครับ ที่หลงเข้ามาอ่าน 55 :*-
อ้างข้อความนี้
Bookmarks