ก้อยกะปอม VS ห่อเหมี่ยงจี่นูน 2556 ครับ

[หยก ยโสธร]

เป็นเทือแรกครับ ที่ได้กินในปีนี่ พอดีน้องชายหมู่เพินลงมาเล่นนำอ้ายเพินช่วงปิดเทอม
เฒ่าแม่เลยใด้ฝากแนวกินบ้านเฮาติดไม้ติดมือลงมานำ ฝากหลายกะบ่ได้ครับ น้องเพินมารถตู้
ของคนละ 3-4 ลัง แทบสิบ่มีหม่องให้คนนั่ง
มาเบิ่งครับ ว่าเฒ่าแม่เพินได้หยังมาฝากแน
มีจินูน แมงขี่เต่า หอมแดงปลูกเอง พึ่งจะกู้จากสวนใหม่ๆ บักม่วงน้อย ผักใบมนหรือสะระแหน่ที่เก็บจากสวน
หน่อไม้ถุง แล้วที่ขาดบ่ได้คือกะปอมกับแง่ครับ เพินปิ้งสุกมาเรียบร้อยแล้ว ย่านลูกชายบ่มีเวลา
ส่วนผักติ้ว กับผักกะโดน ไปแบ่งเอานำหมู่เอาเด้อ แม่หาให้บ่ทัน ว่าซั่น










ชมกันต่อสำหรับเมนูแซบแห่งปีครับ ก้อยกะปอม มีแง่ปนมานำ แม่เพินว่าปีนี้หายากแฮง เทือสิได้มา
หลานน้อยไปหากับหมู่ตั้งว่า 2 มื่อ เลิกงานมาฮอดห้องกะสองทุ่มแล้ว จัดการเอากะปอมที่ปิ้งสุกแล้วมาอุ่น
ใช้เตาแก๊สนี่ล่ะครับ มันเดิกแล้ว แบ่งเฮ็ดกิน 2 คาบ ยอมกินเอาครับ



จากนั้นสับเป็นต่อนน้อยๆครับ ระวังมันฟ้งหนีเด้อ แห่งมีหน่อยยุ



สับแล้วๆเอาใส่ครกครับ ได้หลายเติบยุดอกครับ



หันมาสับบักม่วงครับ บักม่วงน้อยนี้สุดยอดแล้ว เข้ากันคัก บักม่วงที่เฮาเอาหน่วยสุกมันบีบในออกแล้วเอาข้าวเหนียวยัดนั่นนา
สับมุนๆพอประมาณ อย่าใส่หลายมันสิส้มโพด



จากนั้นเอาบักม่วงใส่ในครก ตำให้แหลกเข้ากันดีกับเนื้อกะปอม



พอแหลกแล้วกะซอยหอมแดง สะระแหน่ ใส่ลงไป ปรุงรสด้วยน้ำปลาแดก ผงนัว พริกผง
คนให้เข้ากัน ซิมเบิ่ง แซบแล้วตักใส่จานหาพาข้าวออกสู่กันเลยครับ
ไผมักเผ็ดกะหักบักพริกดิบตื่ม ไผบ่นัวกะเจ้าน้ำปลาแดกนำ หอมเข้ากันปานหยัง









หันมาทางเหมี่ยงจี่นูน
ส่วนประกอบกะมี บักม่วง หัวสิงไค หอมแดง ใบผักติ้ว จินูน แล้วกะปลาแดกเครื่อง



เอาส่วนประกอบทั้งเบิดมาห่อด้วยใบกะโดน จ้ำปลาแดกเครื่องอีกเทือนึงแล้ว ปุ้มใส่ปากเลยครับ



มาเด้อกินข้าวแลงนำกัน ก่อนกินกะฟาด 037 ลงไปสาก่อน คนละ 2 ป๋อง ออกฮ้อนท้องวาบๆ ชั่วโมงนี่เอาพิซซ่ามาแลกกะบ่ยอม
เล็กๆน้อยๆจากทีมงานครับผม

[eakinjan]

กินนำแหน่ครับ คิดอยากมาหลายปีแล้ว แต่หากินบ่ได้

[ตาหมัย]

คือเป็นตาแซ่บคักแท้ขอจักจานแนครับเห็นแล้วนํ้าลายใหลเด้อพี่น้อง

[หนุ่มโบ้]

บ้านเพินบ่อึดแนวกินเนาะ มีแตของแซบ อยากกินนำแด้

[พล พระยาแล]

อย่าบอกเด้อว่าถ่ายด้วยกล้องที่ซื้อมาใหม่.....อิอิ

เมนูนี้บ่ได้กินดนแล้วครับ.....ดึกไปทางกรุงเทพฯ แนเด้อ

[หยก ยโสธร]

รูปแนวกิน ทุกเมนูที่ผมเอามาลง ถ่ายด้วยกล้อง Compack ครับผม
บ่ได้ตั้งถ่ายคักปานได๋ เทิงถ่ายเทิงเฮ็ดไปนำ พอได้รูปมาฝากพี่น้องเฮาสั่นดอกครับ

ถ้าสิเอา DSLR มาคล้องคอ กองก้นถ่ายรูปจักยามได๋สิได้กิน ย่านถืกบักกอกแม่ออกก่อนยุ ท่อนี่เขากะจ่มพอแฮงแล้ว

ประกอบกับย่านกล้องถืกน้ำ ถืกบักพริกปลาแดกนำแน มันสิแสบสั่นดอกครับ

เอาไว้ถ่ามีโอกาศไปเที่ยว หรือหาเวลาว่างได้เลาะถ่ายดอกไม้ดอกใหล่พุ่นล่ะ
สิเอารูปมาฝากดอกเด้อครับ


ปล.: เป็นหยังใช้กล้อง DSLR ถ่ายรูปแนวกินจั่งได้กองก้นวาติ ย่อนว่าหม่องเฮ็ดอยู่เฮ็ดกินผมบ่มีโต๊ะอาหารครับ ปูสาดเฮ็ดเดิ่นข้างๆบ่อนนอนนั่นล่ะ ยามหามุมกล้อง เลยต้องกองก้นเอานั่นนา

[ณัฐ ภูไท]

อยากกินแมงจี่นูนขั่วเป็นตะแซ่บน้อกับเหมี่ยงผักกะโดนแมงขี่เต่ากะเป็นตะแซ่บน้ออยากินยุแนวกินทางบ้านเฮานานๆๆได้กินกะคักยุครับ

[พ่อใหญ่เซียงเบ้า]

เบียร์เย็นๆ กับก้อยกะปอม คั่วแมงจี่นูน แจ่วบอง ... สงกรานต์นี่พ่อใหญ่เซียงเบ้า
ว่าสิกินไวน์แดงแกล้มซอยจุ๊แจ่วเพี้ยขมๆลองเบิ่งคือสิเข้ากันคัก ไผ๋อยากแซบนำกันกะลอง
นัดหมายมาได๋เด้อครับ

[อ้ายพจน์]

:b-b:b-bรายการอาหารมาทางเรืออยู่ตั้วละบ่าว

[หลอดปอดป่อง]

อยากไปอยู่นำเด้ มีแต่แนวแซบๆ เป็นตาอ้วน ตาพี 55