เป็นเมนูปิดท้ายแล้ว สำหรับของฝากจากทางบ้านในรอบนี้ครับ
ขอนำเสนอเมนู ป่นกะปอม .... เป็นหยังคือป่นล่ะ คือบ่ก้อย หลายคนถามมา
ย่อนว่ากะปอมมันมีหน่อย ได้มา 2-3 โตกะสามารถเฮ็ดกินแล้วคาบได้
มื่อนี่เหลือกะปอมที่ก้อยบ่ทันเบิด จ่งไว้เหลือยุ 5 โต
วิธีการเฮ็ด และรสชาดมันสิแตกต่างกันกับก้อยบ่อนได๋ ติดตามได้เลยครับ
ก่อนอื่น อุ่นกะปอมปิ้งสุกแล้วที่เอาออกจากตู้เย็นสาก่อน เตาแก๊สนี่ล่ะ ค้านดังไฟ
จากนั้นสับหมุ่นๆครับ เอาใส่ครก จักบักม่วงน้อยใส่ลงไปคือกันกับก้อยนี่ล่ะ
เบิ่งกะน้า กะปอม 5 โตนี่มันสิป่นอิ่มย่อนบ่
จากนั้นตำให้แหลกครับ กะปอมกับบักม่วงสิได้เข้ากันดี
ซอยหอมแดง ผักใบมน (สะระแหน่) เตรียมไว้ใส่ป่นกะปอม
ปรุงรสครับ ใส่พริกผง ผงนัว ซอยหอมแดง ผักใบมน ลงไป ซอยพริกดิบลงนำเพิ่มรสชาด
วิธีการมันสิต่างจากก้อยบ่อนนี่ล่ะ คือเฮาสิใส่น้ำต้มป่น หรือว่าน้ำต้มปลาแดกลงไปนำ
ปริมาณมันสิเพิ่มขึ้น สิได้หลายกว่าก้อยสั่นดอก ยามกินกะจ้ำเอา ห้ามคุ้ย
นี้ล่ะครับ หน้าตาป่นกะปอม สิมีน้ำเอาะเจาะ สำหรับเอาคำข้าวจ้ำ
ถ่ากินหลายคนกะใส่น้ำต้มป่นสีหลายเติบ
ผักกับป่นกะได้ต้มบักเขีย กับบักถั่ว จากโลตัสหน้าปากซอยล่ะครับ
ย่อนว่าผักกะโดนห่อเมี่ยงจี่นูนเบิดแล้ว
แม่ออกมาเห็นบักถั่วขั่นอยากตำมันสั่นเด้บาดหนิ จัดให้ครับ บักเขียเทศกะบ่มี
เลยออกมาหน้าตาแนวนี้ล่ะ
ทอดซิ้นหลอดตื่มให้แม่ออกนำ
หลายคนเพินกะสิว่า .... บ๊า บ่าวหยกมาดู๋เฮ็ดกับข้าวบ้านเฮาแท้
ยอมรับว่ามักครับ มักเฮ็ดอยู่เฮ็ดกิน ยามวันหยุดผมสิเฮ็ดกินเองแทบซุคาบ
มื่อเฮ็ดงานกะปล่อยให้เป็นหน้าที่ของร้านตามสั่งเพิน
บ่ซั่นกะแมนก๊วยเตี๋ยวหน้าปากซอย กินซูมื่อได๋มันกะหน่ายเป็นเด้เนาะ
มาครับกินข้าวงายนำกัน โทรเอิ้นหมู่มากินนำอีกผุนึง เพินได้ปิ้งไตไก่มาตื่ม 2 ไม้
สรุปว่า มื่อนั้น ป่นกะปอม 5 โต กินกันอยู่ 3 คนอิ่มพอดี
เกือบบ่เบิดพุ่นล่ะครับ หรือ ย่อนมันบ่แซบบู๊หนิ
เล็กๆน้อยๆ จากทีมงาน ขอบคุณบ้านมหาสำหรับพื้นที่นำเสนอครับ
:,1- :,1- :,1-
Bookmarks