ย่างไปตลาด ไปพ้อหอยจูบครับ เลยคึดอยากอ่อมหอยใส่ผักอีเลิดหอมๆคือสิแซบ
หอยนี้แม่ค้าเพินว่าเอามาแต่ร้อยเอ็ด เป็นร้านประจำครับ เลยไว้ใจเพิน
เพินสิเมือร้อยเอ็ดอาทิตย์ละเทือ เพื่อเอาของบ้านเฮามาขาย ขายเบิดเพินกะเมือเอาใหม่
แต่ถ้าแมนหอยกรุงเทพผมกะบ่กล้าซื้อกินดอกครับ บ่แมนขี่เดียดเด้ ย่านสารพิษมานำน้ำสั่นดอก
วัตถุดิบครับ
- หอยจูบ - ผักอีตู่
- ผักอีเลิด - หัวซิงไค
- พริกแห้ง - หอมแดง
- กระชาย - เข้าเบีย (ข้าวสารเหนียวแช่น้ำนานหนึ่งคืน)
เครื่องปรุง
- น้ำปลา
- น้ำปลาแดก
- ผงนัว
บักหอยจูบครับ หน่วยใหย่เติบ ซื้อเพินมาถ้วยนึง 30 บาท จัดการต่อยก้นหอยออก
ยามกินมันจั่งบ่ได้เอาไม้กิ้ม
ตำเครื่องแกงครับ เอาหอมแดง พริกแห้ง ข้าวเบีย กระชาย โขลกรวมกันให้ละเอียดแล้วตักใส่หม้อ
ทุปหัวซิงไคใส่ลงไปนำ
จากนั้นเติมน้ำลงไปครับ ปรุงรสด้วยน้ำปลา น้ำปลาแดก ผงนัว แล้วยกขึ้นตั้งไฟ
ให้ใช้ไฟปานกลางเด้อ แล้วกะพยายามคนหม้อดู๋ๆ บ่ซั่นข้าวเบียสิใหม้ติดก้นหม้อ
พอบักหอยสุก (สังเกตุฝาหอยสิหลุดออก) และข้าวเบียสุกดีแล้ว จั่งใส่ผักลงไป
ปิดฝาหม้ออีกจักคราว พอผักยุบแล้วกะซิมเบิ่ง แซบแล้วกะหาพาข้าวออกสู่กันกินเลยครับ
ได้ซุปหน้อไม่ส้ม กับต้มไข่มาตื่ม ตบท้ายด้วยบักนัดหวานๆ
แนวกินอาจสิบ่หลาย ย่อนเฮ็ดกินกับ ผบ สองคนครับ
มื่ออื่นว่าสิลาบโตนี้ล่ะ มีไผกินนำบ่พี่น้อง
เล็กๆน้อยๆจากทีมงาน ขอบคุณบ้านมหาสำหรับพื้นที่นำเสนอครับ
อ้างข้อความนี้
Bookmarks