ทอดผ้าป่าสงกรานต์ปี 2556 บ้านหนุ่มลาว-สาวขะแมร์(บ้านดอนแดง)

[หนุ่มลาวสาวขะแมร์]

.......

เอาบรรยากาศการแห่ผ้าป่าต้นดอกเงินและเล่นน้ำสงกรานต์ของชาวบ้านดอนแดง บ้านของหนุ่มลาวฯ มาให้เบิ่งครับ

หลังจากหลวงพ่อและผู้ใหญ่ผู้ซ่วยไปบอกบุญลูกหลานญาติพี่น้องยังที่ต่างๆ ช่วงหลังปีใหม่

ว่าอยากขอผ้าป่าแล้วนำเงินที่ได้ไปสร้างหอระฆังหลังใหม่ เนื่องจากหอเก่าเป็นไม้อายุห้าสิบหกสิบปี เก่าผุพังตามกาลเวลา

และสงกรานต์มื้อนี่กะถึงเวลานำผ้าป่าไปทอด




ตอนเช้าหนุ่มลาว-สาวขะแมร์ ไปใส่บาตรจังหันวัดกับอีแม่





รับพรอุทิศส่วนกุศล





รับเศษหลวงพ่อ กินข้าวงายอยู่วัดกับญาติพี่น้อง
อาหารหวานคาว ข้าวต้มโค่น ข้าวต้มผัด ข้าวหนมหมก





แล้วจากช่วงเช้าที่มีพิธีรดสรง ถวายสมณศักดิ์(แบบอีสาน)แก่พระหลวงพี่
พอหลวงพ่อ หลวงพี่ ฉันเพลเรียบร้อย กะฮอดเวลาที่หมอลำซิ่งออกเสตท พร้อมกับหางเครื่องข้างบนข้างล่าง
งันกลางเวนเดินวัดใต้ฮ่มสั่มสา(ฉำฉา) กลางคืนมันระวังยาก ซุมเด็กน้อยหมู่บ่ได้หาผ้าป่ามาตีกันหน้าฮ้าน
ลูกเต้นซาแม่ ผัวเต้นซาเมีย กลางเดิ่นวัด เป็นความม่วนซืนที่บ้านผมรักษา(ทิ่มบ่ขาด)เฮ็ดมาแต่โดนนานครับ
งานวัดบ่เต้นอยู่วัดกะจักสิไปเต้นใสเนาะ พี่น้องผู้อ่านโปรดเข้าใจแน่เด้อ
ลำซิ่งสามหมื่นมื้อสงกรานต์ถือว่าจ้างแบบพอแล้ว จ้างมาลำแต่เช้า แต่เริ่มได้เที่ยง ฝอยฮอดบ่ายโมงค่อยลำ
มีแต่ฮ้องเพลงหมอลำกะดาย ถือว่าซอยกันไป เฮ็ดจังได๋ได้ มาข่อนม่วนมื้อเดียวกัน





เวลามีจำกัดต้องฟ่าวเล่ง หน้าฮ้านยกมือเก่เด้ๆ มีแต่บ้านเดียวอ้อยต้อย
เว้าเรื่องม่วนละแวกนั้นบ่มีบ้านได๋ม่วนเกินบ้านผมครับ มักม่วนตั้งแต่หลานฮอดพ่อใหญ่แม่ใหญ่
ม่วนบ่ผิดไผ แต่อาจสิยากแน่แต่เขยไภ้ที่มาจากทางอื่น ที่ยังบ่ชินกับความม่วนแบบลาวๆ





สมควรแก่เวลา ตาเวนบ่าย หมอลำกะเริ่มคร้านลำแล้วเพราะต้องฟ่าวไปลำแลงงานหน้า
ประกอบกับหางเครื่องหน้าฮ้านลูกหลานหยอกกัน เป็นโอกาสให้เจ้าหน้าที่ อปพร. ประกาศปิดงาน
สิประกาศปิดงานกะบ่ถามผู้เพิ่นหาผ้าป่ามาแน่ละนี่กะดาย ผู้ลางคนมือค้างเก่เด้ โอ๊ยเซ็งเป็ด ละว่า

บ่เป็นหยังยังมีถ่าอีกเสต็ป





และกะมาฮอดเวลาแห่ผ้าป่า
วงกลองยาวประจำหมู่บ้าน คณะเทพวิจิตร ที่เคยดังในอดีต เริ่มเคลื่อนที่ออกจากหน้าวัด
บรรดาพี่ป้าหน้าอาอดีตนางรำวงกลองยาว ได้ยินเสียงกลองฟ่าวออกมาทำหน้าที่โดยบ่ต้องมีค่าจ้าง ขอให้กลองดัง





ญาติมิตร ชาวบ้านทยอยมาฮ่วมขบวนพร้อมต้นดอกเงิน





สาวขะแมร์กะแบกมานำหมู่ หาบ่ได้หลายคือเพิ่น อาศัยหน่อกล้วยต้นใหญ่ๆ เอ้ไว้






ต้นผ้าป่าทยอยมาจากคุ้มต่างๆ รถแห่พระ องค์ประจำหมู่บ้าน





พี่น้องมาฮวมกัน





สาวกรุงเทพฯ สาวบ้านนา ไผอยากเห็นไผให้มาเบิ่งเอามื้อนี่ละครับ


.....

[หนุ่มลาวสาวขะแมร์]

......



ออนซอนต้นผ้าป่าครับ ดอกเต็มต้นเทิงแหล่ซ้ำ เทิงแดงจ้ายว้าย





ต้นผ้าป่ามีแต่ต้นงามๆ เพราะพี่น้องเพิ่นตั้งใจเฮ็ด และเฮ็ดออกมาจากจิตใจที่ศรัทธาเป็นที่ตั้ง





แล้นนำแต่ถ่ายรูป ขออุ้มต้นดอกเงินนำแน่
ต้นผ้าป่าของสาวขะแมร์ พับอย่างงามตั้งแต่ต้นเดือน ตั้งใจสิเฮ็ดให้งามเพื่อบูชาพระสัมมา
สุดท้ายเฮ็ดบ่แล้วญ้อนกิจกรรมหลายแต่เช้าฮอดบ่าย จับเสียบจับเสียบ อุ้มแล่นนำกลอง
บ่เป็นหยัง อีกสี่ห้าปีข้างหน้าค่อยแก้โตกะได้





พระพุทธรูป(ไม้) คู่บ้าน เห็นมาแต่เกิดครับ ให้ลูกหลานได้สรงน้ำเพื่อศิริมงคลกับตัวเอง





เฮียนนี่ลักไก่ เล่นถ่าอยู่หน้าบ้านกะของ บ่ได้ย่างไกลคือหมู่ ขาดทุนเด้อสิบอกให้
เฮียนตำรวจเด้อขะน้อย หนุ่มๆ กะดายว้า





จั้นเข่าอีพ้อ อย่าให้มันขาดต่อง บุญบ้านเฮา





เพิ่นมีถนนข้าวสาร ถนนข้าวปุ้น นี่"ถนนข้าวเบีย" ดอนแดงบ้านผมครับ





เต็มที่มื้อนี่ชั่วโมงนี่ชั่วโมงเดียว





แออัดยัดเยียดด้วยลูกสาวชาวบ้าน





อีแม่พาลูกสาวมาแห่ผ้าป่าแล่นน้ำสงกรานต์
ให้ทวย "สาวซ่ำน้อยแถวหน้าอายุสามสิบ" พี่น้องเซือหรือบ่เซือ สาว ว กับสาว อ
ผมบ่ค่อยพลาดงานบุญงานทานของหมู่บ้าน เพราะอยากมาแห่ผ้าป่านำพี่นำน้อง





นี่กะน้องๆ ลูกๆ หลานๆ ครับ ลูกสาวจูงมือแม่มาม่วน
อยากให้พี่น้องเห็นว่ามีตั้งแต่เด็กน้อยฮอดผู้เฒ่าผู้แก่ที่มาร่วมขบวนแห่ผ้าป่าสงกรานต์นำกัน


.....

[สาวเมืองยศ]

เป็นตาม่วนเนาะบาดสงกรานต์บ้านข่อยคือจังเงียบป่านเป่าสากแท้น้อ

[หนุ่มลาวสาวขะแมร์]

......



หมู่บ้านน้อยๆ แต่ยามแห่ผ้าป่า เฮียนนึงมีจักคนออกมาแห่นำกันเบิด วงเหล้าเบียร์เซาไว้ก่อน ขบวนแห่ยาวเคิ่งกิโล
งานนี่ไผบ่มานำหมู่เป็นหนอนเด้อ สิบอกให้





เข้าวัดบ่หลมฮึได๋น้อคือมาออกันอยู่หน้าประตูโขง ประตูโขงวัดสระจันทร์





ผู้สาวซุมนี่ซุมเดียวกันนามสกุลเดียวกัน มาพ้อกัน ได้ยินเสียงกลองห่าว ให้เอาคักๆ ซะเถาะอ้าย เพิ่นว่า
ถ้าแม่นรถจอดอยู่ใกล้ๆ ละมึง..หลังคามุ่นแน่ๆ สีลมกะสีลมเด้อ





เก็บกดจากการเดินทาง รถติดแต่กรุงเทพฯ ฮอดบ้านไผ่
ดึกเอาคักๆ อ้าย ผ้าป่าบ้านเฮา โดนๆ อีหลวงพ่อใหญ่สิพาเอาเทือนึง





เข้ามาญองดินทราย โอ๊ฟ้อนกันในวัดอีก
พี่น้องเซือบ่ครับว่าคนบ้านผมเพิ่นมักม่วน ตั้งแต่แห่หลวงพี่ไปฮดน้ำตอนเช้า สวยบ่ายมาลำซิ่ง บ่ายฮอดค่ำแห่ผ้าป่า
ม่วนมาราธอนบ่มีบ้านได๋คือ





สาวหล่าเสื้อเขียว เห็นเพิ่นญ้อนแต่ออกจากหน้าวัดจนวนมาอยู่ในวัด เกิบบ่ใส่เต้นบ่เซาจักเทือ ม่วนแบบบ่ปันพี่ปันน้อง
ถ้าแม่นมีปริญญาด้านศิลปะวัฒธรรมพื้นบ้าน สาขาการฟ้อนรำหรือฟ้อนอ้อมบ้านให้
ผมว่าไทบ้านผมสิได้ปริญญากันค่อนบ้านครับ อีหล่านี่สิได้ฮอดด็อกเตอร์ แถมเกียรตินิยม
มีความสามารถแบบนี่บ่ให้ บัดไปให้ละให้หมู่เอาเงินซื้อเอา ปริญญากะดาย ให้ว่าซะเถาะ


......

[หนุ่มลาวสาวขะแมร์]

......

ได้ยินเสียงเอิ้นอีก…………... "เอ่อ...อ่า ถ่ายไปโพสท์บ้านมหา(คือเก่า)"
ถ่าหมู่ฟ้อนกะฟ้อนบ่ลงเป็น แล่นมาศาลา พี่น้องกำลังสิถวายผ้าป่า











ต้นดอกเงินมาตั้งโฮมกัน
สิได้จักแสนสองแสนคือปีก่อนๆ อยู่เนาะ พอได้หักค่าหมอลำ









ถวายผ้าป่า ต้นดอกเงินแล้ว กะกรวดน้ำรับพรครับ





ถวายแล้ว สาวแบงค์กะทำหน้าที่นับเงิน เซ็กบัญชี





หนุ่มแบงค์ เหลียวเห็นบ่น้อ ไฟคือบ่แจ้ง





ต้นดอกเงิน สาวขะแมร์ ตั้งใจสิเฮ็ดงามๆ คือในเน็ต หัดพับจนว่า แต่ปรากฏว่าประกอบเป็นต้นบ่ทัน ยัดลงในขันแล่นนำขบวน
ได้ฮ่วมผ้าป่านำหลวงพ่อ นำไทบ้าน สองหมื่นห้าครับ
และขะน้อยกะขออนุญาตพื้นที่บ้านมหาดอทคอมแห่งนี้ขอขอบบุญขอบคุณ อนุโมธนา สาธุ ไปยังท่านผู้ใจบุญที่ร่วมเป็นประธาน
เป็นรองประธานและกรรมการให้ผมหนุ่มลาว-สาวขะแมร์ ได้ต้นผ้าป่ามาทอดนำพี่นำน้อง
ขอให้บุญกุศลที่ได้จากการถวายจตุปัจจัยผ้าป่าต้นดอกเงินเทือนี้กลับไปยังท่านผู้ใจบุญทุกท่าน ขอให้ท่านมีแต่ความสุขเด้อ สาธุ





เพลมื้อใหม่กะยังนับเงินบ่แล้ว ได้เงินสองสามหม้อโล ถามยอดพี่ผู้ใหญ่ เพิ่นว่าได้ห้าแสนปลายครับ
โฮ้….ได้หลายคัก ได้หลายเป็นประวัติการณ์ ได้หลายกว่าทุกเทือที่ผ่านมา

เป็นความภาคภูมิใจของพวกเฮาชาวบ้านครับ เป็นผ้าป่าที่หามาโดยญาติพี่น้องไทบ้านล้วนๆ อาศัยขอโฮมบุญจากญาติมิตร
จากหมู่พวกเพื่อนฝูงที่ทำงานของแต่ละคน ผู้หน่อยผู้หลาย มาโฮมกัน
แม้นสิหน่อยหลายนั่นบ่สำคัญปานได๋ดอก
เทือนี่หน่อย เทือหน้าอาจสิหลายกะได้ เทือนี่บ่ได้มา เทื่อหน้าเพิ่นอาจสิมาต้นใหญ่กว่าหมู่ไผสิฮู้
สำคัญที่จิตศรัทธาของพี่น้องทุกคน ที่ซอยกันเฮ็ดกันหาจนได้ผลเกินที่คาดไว้
บ้านผมเป็นหมู่บ้านขนาดร้อยซาวครอบครัว ชาวบ้านเคิ่งนึงกะอาสัยหากินถูไถอยู่ตามเมืองใหญ่อุตสาหกรรมครับ

ทางกรุงเทพฯ ทางบ้านคุ้มต่างๆ ร่วมแรงร่วมใจกัน บ่มีกะกู้ ธกส หม่องเก่านั่นละมาโฮมบุญ

ถ้าแม่นตัดหนี้สินทิ่มได้ ทุกคนกลับไปอยู่บ้านคือแต่พอแต่แม่ หมู่บ้านนี่สิมีแต่ม่วนอยู่เบิดปีละครับ อีกบ่โดนกะบุญบั้งไฟ

เป็นการกลับบ้านอีกเทือนึงที่ผมมีความสุขที่สุด


นำมาโพสท์มาเว้าสู่พี่น้องบ้านมหาได้เบิ่งฟังนำครับ
อันได๋ดีบ่ดีผู้ข้าฯ ผู้เป็นน้องนุ่งกะขออภัยเด้อ กบาทเอ่ย


.......

[คนตระการ...]

อนุโมทนา สาธุ นำเด้อครับ...ม่วนพร้อม ได้บุญนำ

[pcalibration]

ขออนุโมทนาสาธุนำเด้อ..หนุ่มลาวฯ
ได้เทิงบุญได้เทิงหม่วนเนาะ หม่วนเอ้เล่(รวมกันหม่วน)
เว้าเรื่องหม่วนบ่หว่าทางได๋เป็นคือกันเหมิด..มันเป็นนำเปิง
:,1-:,1-:,1-

[พ่อใหญ่เซียงเบ้า]

พ่อใหญ่เซียงเบ้า คึด ... อยากไปเป็นเขยบ้านนี่ แต่ว่าย้านบาปกะผ่องนั้น ย้อนว่าเฒ่าแล้ว
แต่ยังบ่แก่ 555
ขออนุโมทนาสาธุ ในกุศลผลบุญนำแน่เด้อครับ เพิ่นว่า คนสิงาม งามน้ำใจ ใช่ใบหน้า
คนสิสวย สวยจรรยา ใช่ตาหวาน คนจะแก่ แก่ศีล ใช่อยู่นาน คนสิรวย รวยบุญทานใช่บ้านโต ฯลฯ
เพราะฉนั้นหมู่บ้านนี่มีแค่คนงามๆ คนที่มีความสุข เพราะบุญกุศลที่ได้ร่วมกันเฮ็ดกันสร้างครับ

[lungyai1123]

มาได้หลายคักยุดอกผ้าผ่าบ้านเพิ่นพี่น้องป้องปายกะออกมาทอดผ้าป่าาพ้อมเพียงกันดี

[พล พระยาแล]

นี่ล่ะครับบ้านเฮา ยามเล่นเป็นเล่น ยามงานเป็นงาน มีความสุขตามอัตภาพครับ ขออนุโมทนาสาธุครับ