พอก้อมแก้ม

[ทิดมี]

เว่าภาคพื้น คำก่าย กลอนสลับ
บ่ออาจ พรรณานับ กวยก่าย เกินอ้าง
สมมุติวางแผนไว้ ทางในบ่ใสส่อง
จาพอหยอก นุงน้อง สยองห่าว อ่าวความ
เว่าพื้นผหญานี่ โตเฮียมมีซำหางอึ่ง
อึ่งกะแมนอึ่งน้อย คองจ้อยอึ่งยาง
ขอฮวมทางจาเว่า ผหญา นำ อย่าซ่ำตืม เด้อ..
ขอเป็นน้ำ แอ่งน้อย เย็นจ้อย ฮวมกระบวย แนถ่อน...

ขอหยอกเว้า..พอเป็นวาดว่า
คำผยาส่งซ้อน กลอนแก้กาพย์กวี
บ่อฮอนมีประสงค์ตั้ง โวหารลวงหลอก
เพียงแต่หยอกกล่าวต้อย เติมแต้มตืมคำ
........................................ทิดมี......

ขออีกจั๊กหน่อย
เฮียมขอปากกล่าวต้าน เผยผ่านกลอนผญา ก่อนแหลว…
เฮียมเพิ่งวาจาไข ขีดเขียนลงแต้ม
แกมกลอนต้าน คำขานคุ่มขวาง(คุ่มควง)
ชนทั้งปวงอ่านแล้ว เห็นพร้อมให้ต่อเติม
พอได้เสริมสอนสร้าง วิถีทางคลองเก่า
มรดกแต่เค้า โบราณเฒ่าเพิ่นวามา
ถึงคราวหน้า ให้คนส่าลือไกล
ทุกขอบแคว้นแดนได่ สิส่องใสเสมอแก้ว
ว่าแนวได๋ดีนั่น.. มาแบ่งปันน้องและพี่
ผู้มีดีอย่าเสี่ยงส่น เอาไปซ่นเสี่ยงอ่ำ
อีกฝ่ายก้ำ กะทุกซำเทียวทาง
อย่าได้วางทำเสย...เพิกเลยคันผิดเพื้ยน
ให้เจ้าลงมามุ่ง หาแนวปรุงมาเติมต่อ…
นัวบ่อพอ แซ็บซ่อย ให้เกลือก้อยตืมตาม
เปรียบเสมือนข้าวและน้ำ โภชนะอาหาร
หากมีหวาน เค็ม ขมพองส้ม..รมจริงแท้(รม=มาจาก คารมการเว่านัวหัวมวน)
พากันแปลฯ แปลงสร้าง หาทางเติมตืม
อย่าฟ้าวลืม-ละไว่ไลถิ่มห่างกัน...พี่น้องเอ๊ย...

[pcalibration]

ถ้าอ้ายทิดมีส่ำหางอึ่ง ข้าน้อยกะสิพอส่ำหนวดเต่า..55555
สำเนียงพื้นชนเมืองแต่เก่า เดิมดาเค้าปางผุ้นแต่หลัง
มรดกมูลมังแต่ดนมาพี้ ทุกมื้อนี่เหินห่างวางป๋า
บ่หัวซาลืมไลไขป่อง บ่มีหม่องขานเว้าเหล่าลืม
พากันปลื้มจังกึมแดเกี่ยว ปลายต้นเสี่ยวมูลพ่อบ่เติม
:,1-:,1-:,1-

[เเมงสะดิ้ง]

ถึงสิส่ำหางอึ่ง หรือสิส่ำหนวดเต่า
ผุข้ากะได้แต่นั่งเฝ้าแนมจอบอ่าน
บ่อาจหาญกล้าต้อยนำเพิ่นแหล้ว
คั่กหลายๆ จ้า ทั้งหางอึ่งและหนวดเต่า
^___^

[ทิดมี]

ขอต่ออีกแน.........
แม่ฮ้างนี้ หายากนานพบ
ไผ บ่ ทำบุญหลาย สิ บ่หวนเห็นพ้อ
พี่หากพอใจเล่น นำสาวแม่ฮ้างห่าว
แม่น สิ สาวจ้อยๆ เป็นปุ้ม สิกวาดหนี พุ้นแหล่ว

[ทิดมี]

พี่นี่ แนวควายตู้ หากิน บ่ คือเพิ่น
ประสงค์หาแต่หญ้า สวนฮ้าง จั่งค่อยคือ
พอได้เห็นสวนฮ้าง ดีใจ เต้นเข้าใส่ นั่นแหล่ว
พี่นี้ แนวขโมยฮ้าย เห็นไห น้ำลายเหี่ย
ตาเสียดพุ้นเสียดพี้ ในห้อง เบิ่งแต่ไห
คัน บ่มีฝา แอ้ม สิโจมไห โดดลงล่าง
พี่ สิอุ้มก่างก้าย โตนเข้าป่า มอน นั่นแหล่ว

[suny]

ขนาดซ่ำหางอึ่งซ่ำหนวดเต่ากะคักซ่ำนี้ เนาะอ้ายพี ทิดมี
ถ่าแม่นมีซ่ำแข้ซิแลได้บ่อนจังได๋น้อ....อิอิอิ

[lungyai1123]

เว่านำเพิ่นบ่ทันเป็นจักเทือย้อนบ่มีคารมหนิหละพี่น้องอยากไปห่ำไปเฮียนนำผู่ฮู้อยู่

[ร้อยหมื่นพันไมล์ไกลบ้าน]

มีแต่แนวฮ่างเนาะค่ะ ทางนี้บ่ฮ่าง แต่อยากตอบนำค่ะ :)

ยึดวาจาเจตนาอ้าย สืบสายกลอนผญา
สุดปัญญาบ่แหลมคม เป็นคารมวาจาต้าน
หากมีการผิดพลาดได๋ ขออภัยความบ่ฮู้
ขอผู้รู้ให้บอกกล่าว สืบกลอนลาวให้ลูกหลาน แนเด้อค่ะ

[ทิดมี]

ได้อยู่บ่อ มีปัญหา ผยามีไว่จ่าย-แจก อีสานสานเฮามีแต่แนวแบ่งปัน
ผยาว่สนหลายการจ่าย สิเน้นแบบ ตาเห็นครับ ส่วนเนื้อหาบ่จำเป้นต้อง สัมพันกันเสมอ
สิ่งสำคัญคือ การออกเสียง หรือวลี สูง-ต่ำ ยกตัวอย่าง ของน้อง(ขออนุญาตเด้อ) "ร้อยหมื่นพันไมล์ไกลบ้าน"
ยึดวาจาเจตนาอ้าย สืบสายกลอนผญา
คำวา สืบ-สาย มันออกเสียงต่ำคือกัน
สมุติเด้อ
ยึดวาจาเจตนาอ้าย สืบต่อกลอนผญา เสียงมี ลง-ขึ้น
หรือ
ยึดวาจาเจตนาอ้าย เกี้ยวกายกลอนผญา
***ลองเบิ่งครับ ผมจำเพิ่นมาคือกัน***
ผิดพลาดขอ อภัย ต่อท่านผู้รู้

ขอหยอกเว้า..พอเป็นวาดว่า
คำผยาส่งซ้อน กลอนแก้กาพย์กวี
บ่อฮอนมีประสงค์ตั้ง โวหารลวงหลอก
เพียงแต่หยอกกล่าวต้อย เติมแต้มตืมคำ
........................................ทิดมี......

[เเมงสะดิ้ง]

โอล่ะหน่า...มาอ่านแล้ว ดีอีหลี อิ อิ อิ
...พี่น้องเอ่ย...