พักสมองสะพายกล้องส่องไฮ่นา

[ทิดจ่อย]

มื้อวานหลังเลิกงานพอมีเวลาว่างเล็กน้อย เลยหาวิธีให้อ๊อกซิเจนเพิ่มวิตามินให้สมอง
ที่เหนี่อยล้าจากการนั่งในห้องสี่เหลี่ยมแคบๆ ซึ่งมีแต่ความวุ่นวายสับสน
มีแต่ศัพท์สำเนียงเสียงบ่น พร้อมกับหน้าตายุ่งๆ ของเจ้านายและเพื่อนร่วมงาน
บางมื้อกะมีเสียงบรรยายวิธีการใช้งานของผลิตภัณฑ์เครื่องใช้
เครื่องอำนวยความสะดวกของเซลจากบริษัทห้างร้านที่แวะเวียนเข้ามาบ่อได้ขาด
โดยการสะพายกล้องออกไปเยี่ยมท่งนาและไฮ่มันที่ปลูกไว้ตั้งแต่ก่อนสงกรานต์




ดอกไม้ป่าออกดอกสวยงาม จักแม่นเผิ่นซื่อหยังกะบ่อฮู้ แต่บ่อว่าเผิ่นสิซื่อหยังนั้นบ่อ
สำคัญ ถึงสิซื่อว่าโคลนตมเผิ่นกะยังทำหน้าที่เป็นดอกไม้ให้คนได้ชิ่นชม ให้มวลหมู่แมลง
ได้ไต่ตอมดูดน้ำหวานหล่อเลี้ยงชีวิต


ยอดเครือเขืองกำลังป่งยอดดั้วสีสดใสงามตา เสียงนกทา ตั๊ก ตาด ต้า!
เลาะปลายนาทางหัวไฮ่ ฟังแล้วใจอิ่นอ้อยคือเผิ่นเอิ้นหาคู่เคียง


ยอดบักอึข้างฮั้วไฮ่มัน เอาไว้กินหน่วย


พอเมื่อจวนสิ้นแสงตะวันแลงลับค้อย เลยถอยโค้งเบิ่งท่งนา
ตามรุกขาป่าไม้นกเขาคู เอิ้นหาคู่ เคียงคู่ข้างหาซ่นห่มนอน
นกกะปูดปืดฮ้องคองทางฝนสิเล่ง เส็งนำดงป่าไม้คือเสียงฮ้องแอ่วลำ


เครือหมากส้มลมตามคันนากำลังออกดอก ฮอดยามเกี่ยวข้าวกะเอาหมากมาตำส้ม


ก่อนสิกลับบ้านกะเลาะเก็บผักคุณทกตามป่าดอนหัวนา


พ้อผักกะเดากะเก็บผักกะเดา


ค่ำมืดแล้วกะยังบ่อฮอดบ้าน เลาะเก็บผักตำนินและผักไส่ข้างฮั้วอีก
มีเหยี่ยวหมูเหยี่ยวหมากะหย่ามันเถาะล้างออกกินได้เหมิด



ผักที่เก็บได้กะนำมาล้างลวกโฮมกันจักแนวขมแนวบ่อขม ลวกใส่กันกินคือพระวัดป่านี้ล่ะ


กับข้าวมื้อนั้นกะสิแสนสมถะ กินแต่พออยู่ได้ ได้ออกไปเลาะท่งไฮ่ท่งนากะมีความสุขแล้ว
กะผ่านพ้นไปมื้อหนึ่ง เพื่อสิหลับนอนแล้วลุกขึ้นต่อสู้ในมื้อใหม่อีกเถื่อ
ชีวิตกะมีส่ำนี้ล่ะพี่น้อง เป็นชีวิตที่บ่อหรูหรา กะเป็นแค่คนจนๆ ธรรมดาคนหนึ่ง


บักถั่วนำภาช์กะหาเก็บเอาข้างทางไปไฮ่นั้นล่ะ จักของไผดอก ตื่นเซ้ามากะบ่อเห็นเผิ่นนำมาเว้าควมเดล่ะ 5555
ไปผู้เดียวบ่อมีผู้ถ่ายรูปให้กะเลยบ่อได้เห็นหน้าคนนำเสนอเนาะพี่น้อง
ขอบคุณบ้านมหาที่ให้โอกาส ให้พื้นที่ได้นำเสนอบางส่วนของวิถีชีวิตน้อยๆ ชิวิตหนึ่ง
เพื่อแลกเปลี่ยนเฮียนฮู้กับเพื่อนๆ ขอบคุณหลายๆ ครับ

[นู๋น้อย]

ภาพคือน้อยแท้ เบิ่งบ่ สะใจเลย อาจารย์อ้าย ^_^ มักๆอีกบ่ดน จะได้คืนเมือสีเกดเฮา แล้ว ฮิ้วววววววว

ป.ลิง ทดลองใช้ชีวิต มาเกือบทุกรูปแบบแล้ว แนวใด๋กะสู้ชีวิตจนๆแบบบ้านๆเฮาบ่ได้ดอก อาจารย์อ้าย แบบว่ามันบ่ใซ่ อ่ะ ...5555 ความสุขที่ยั้งยืนคือ ชีวิตที่พอเพียงในแบบที่ตนพอใจ ....

[lungyai1123]

เพิ่นว่าผักข้างครัวฮั้วกินได้มันแมนแท้เน๊าะลงไปท่งนากะสิบ่อึดแหล่วปลาแหมหนิส่ำขึ้นโคกไฮ่สวนกะบ่อึดแนวอยู่แนวกิน

[สาวเมืองยศ]

เป็นตาอิดสาเนาะความสุขแนวนี่หาได้ยากแท้แหล่วในสังคมเมือง พุข่าล่ะยากไปใช้ชีวิตแนวนี่หลายแต่กะคือสิได้แต่ฝัน ฝัน ฝันแล้วกะฝัน

[commo]

เป็นชีวิตที่คุ้นเคยมาตั้งต่ะน้อยแล้ว เห็นยามได๋กะฮ่ำฮอนยามนั้น ขอบคุณอ้ายทิดจ่อยที่เอาบรรยากาศที่โหยหามาให้ได้หายคึดฮอด ชีวิตคนเมืองกำลังสิโหม่มลึดซุมเฮาเหมิดแล้ว ซ่อยกันเติมความทรงจำเก่าๆอีสานบ้านเฮากันเอาไว้อย่าให้หลงลืม ฮีตเก่าคองหลังกันเด้อคับ เว่ามาหล่ะกะคึดฮอดเครียบักส้มลมเด้พี่น้องเอ้ย...

[suny]

เห็นแล้วอิจฉาพุได้อยู่ใกล้บ้านเนาะครับ บรรยากาศดีคักเก็บผักเก็บหญ้า หัวไฮ่ปลายนามากินกับป่น ค่ำมาพร้อมหน้าพร้อมตาพี่ๆน้องๆ ยามได๋น้อเจ้าของจังซิได้อยู่ใกล้บ้านนำเพิ่น

[หยก ยโสธร]

มักบรรยากาศหลายครับ
ข้างฮั้วไฮมัน ปลูกบักแตงโมไว้นำเด้อครับ