หน้าที่ 1 จากทั้งหมด 2 หน้า 12 หน้าสุดท้ายหน้าสุดท้าย
กำลังแสดงผล 1 ถึง 10 จากทั้งหมด 17

หัวข้อ: บุญขอลาบเต่า หรือบุญเลี้ยงบ้าน @ บ้านกู่จาน ยโสธรครับ

  1. #1
    แบ่งปันความรู้และประสบการณ์ สัญลักษณ์ของ หยก ยโสธร
    วันที่สมัคร
    Jan 2013
    ที่อยู่
    ซ.ลาซาล บ้านเกิด อ.คำเขื่อนแก้ว
    กระทู้
    174

    บุญขอลาบเต่า หรือบุญเลี้ยงบ้าน @ บ้านกู่จาน ยโสธรครับ

    สวัสดีครับพี่น้องบ้านมหา โดนๆจั่งสิได้เข้ามาโพสต์กระทู้ เล่าเรื่องราวต่างๆสู่พี่น้องเฮาเบิ่ง ย่อนว่ายากนำงาน
    มื่อนี้มีโอกาศ ขอนำเสนอ " บุญขอลาบเต่า หรือบุญเลี้ยงบ้าน " ที่จัดขึ้นที่หมู่บ้านของผมเองครับ

    เมือบ้านเดือนหว่างหั่นหนิ เห็นรูปอยู่กล้องเฒ่าพ่อเพินถ่ายไว้ เลยเอามาสู่พี่น้องบ้านมหาเบิ่งครับ
    รูปประกอบอาจสิบ่ล่ะเอียดปานได๋ ย่อนบ่ได้ถ่ายเอง อ่านนำคำบรรยายเอาเด้อพี่น้อง

    บุญเลี้ยงบ้าน หรือเลี้ยงปู่ตา สิจัดขึ้นตรงกับวันพุธแรก เดือน 6 ของทุกๆปีครับ พิธีการของแต่ละหมู่บ้านอาจสิแตกต่างกันออกไป
    แต่จุดมุ่งหมายในการจัดงานคือ เป็นการแสดงความรัก ความกตัญญู และความผูกพันของชาวบ้านต่อบรรพบุรุษ
    และยังเป็นการส่งเสริมให้ชุมชนเกิดความสามัคคี ซึ่งนำมาสู่ความมั่นคงของชุมชน
    พร้อมกับเป็นการสร้างขวัญกำลังใจให้พี่น้องชาวบ้าน ก่อนสิลงมือเฮ็ดนาตามฤดูการที่จะมาฮอด

    ทางบ้านผมประเพณีสิแตกต่างจากทางบ้านอื่นกะคือ เครื่องไหว้ปู่ตาจะต้องมีเต่าเป็นส่วนประกอบหลัก สิขาดบ่ได้เลยครับ พ่อปู่เพินมักเต่า
    เมื่อเทียบกับทางมัญจาคีรี ขอนแก่น (บ้าน ผบ. ผมเอง) เพินสินับถือเต่า หลักๆสิเอาไก่เป็นของใหว้แทน สิบ่คือบ้านผม

    เครื่องไหว้ปู่ตา เท่าที่ผมจำได้สิมีดังนี้
    - ต้มเต่า ปิ้งเต่า (ทั้งตัว) ลาบเต่า
    - ต้มไก่ ปิ้งไก่ (ทั้งตัว) ลาบไก่
    - เหล้าขาว
    - ขัน ๕ ขัน ๘
    - บั้งไฟ สำหรับจูดเสี่ยงทาย
    - ข้าวเปลือกจ้าว-เหนียว
    - ใบไผ่ขอดแทนสัตว์เลี้ยง จำนวนเท่ากับสัตว์เลี้ยงของแต่ละครัวเรือน
    - ข้าวควดคีง (ปั้นข้าวเหนียวเท่าลูกไข่ แล้วให้ผู้เฒ่าผู้แก่กวักสิ่งบ่ดี่บ่งามออกจากตัว)

    หลังจากเสร็จพิธี ชาวบ้านที่ไปร่วมงานสิล้อมวงกินข้าวนำกัน ซึ่งอาหารที่กินในมื่อนั่น หลักๆสิแม่นเต่าครับ
    ก่อนสิกินข้าวฮ่วมกัน เพินสิทำพิธีแจกลาบเต้าเด็กน้อยก่อนครับ แจกคนละเคิงทัพพี
    เด็กน้อยสิดีใจหลายช่วงหนิ คือเพินสิคนลาบใส่หม้อใหญ่ๆมา แล้วให้เด็กน้อยเข้าแถวถือถ้วยรอรับแจก
    บางคนได้แล้วเทใส่ถุงเสี่ยงไว้ แล้วล้างถ้วยไปขอใหม่กะมี ตามประสาเด็กน้อย เลยเป็นที่มาของคำว่า " บุญขอลาบเต่า "

    อาจสิถามว่าเอาเต่ามาแต่ใสหลายแท้ จั่งสิพอกันกินเบิดบ้าน คือจั่งซี่ครับ แต่ก่อนหากมีผุได๋ได้เต่ามากะสิขังเลี้ยงไว้
    เฮือนละโตสองโต ฮอดยามเอาบุญเลี้ยงบ้าน กะสิเอามารวมกัน
    แต่ทุกมื่อนี้ เต่าเริ่มสิหายากแล้ว สิเอาเฮ็ดแนวกินถวายให้แต่เจ้าปู่ท่อนั้น ประมาณ 4-5 โต ส่วนกับข้าวสำหรับชาวบ้านสิเป็นไก่แทน

    ก่อนฮอดมื่อบุญเลี้ยงบ้านมื่อนึง พ่อผู้ใหญ่บ้านเพินสิประกาศออกหอกระจายข่าวบอกพี่น้อง ว่ามื่ออื่นสิเอาบุญเลี้ยงบ้านเด้อ
    เฮือนได๋มีไก่ อยากสิเอามาทาน (บริจาค) กะให้ติดต่อทานได้ที่ศาลากลางบ้าน แล้วกะสิมีการเก็บเงินนำลูกบ้านเฮือนละ 20 บาท
    เพื่อที่สิได้นำมาซื้อไก่ (เพราะเต่าหาบ่ได้แล้ว เลยเอาไก่แทน) ให้ได้ปริมาณที่สามารถเลี้ยงพี่น้องได้เบิดบ้าน
    สิใช้ไก่บ้านท่อนั่นเด้อครับ ไก่ตลาดบ่เอา

    บ่ายโมงของมื่อจัดงาน พ่อบ้านแม่บ้านสิพากันไปขนเอาถ้วย เอาหม้อเอาชามที่วัด ออกไปยังดอนเจ้าปู่
    เฮือนได๋มีหอมแดง มีผักซีผักบั่วกะเอาติดมือออกไปนำ พ่อบ้านกะสิแบ่งเป็น 2 กลุ่ม โดยกลุ่มแรกสิทำความสะอาดดอนเจ้าปู่
    อีกกลุ่มนึง สิซอยกันหลกขนไก่ ฟักไก่ ปรุงลาบไว้ถ้าเป็นแนวกินเลี้ยงพี่น้องไทบ้าน
    ส่วนแม่ครัวเพินกะสิซอยกันซอยหอม คั่วข้าวคั่วบักพริก ส่วนข้าวเหนียวสิถือไปจากเฮือน คนละกระติบ จั่งบ่ได้นึ่ง

    มาครับ มาเบิ่งบรรยากาศ ปีนี้คนบ่หลายปานได๋ เฮ็ดแนวกินอยู่ดอนเจ้าปู่เลยครับ แผ่ง 40 ดีกรีไปนำ ได้บรรยากาศขนาด บุญขอลาบเต่า หรือบุญเลี้ยงบ้าน @ บ้านกู่จาน ยโสธรครับ บุญขอลาบเต่า หรือบุญเลี้ยงบ้าน @ บ้านกู่จาน ยโสธรครับ

    บุญขอลาบเต่า หรือบุญเลี้ยงบ้าน @ บ้านกู่จาน ยโสธรครับ

    บุญขอลาบเต่า หรือบุญเลี้ยงบ้าน @ บ้านกู่จาน ยโสธรครับ



    ฝ่ายฟักไก่กะขยันขันแข็ง เสียงฟักไก่ดังปานสนามรบ เขียงไผเขียงมัน พร้าไผพร้ามัน

    บุญขอลาบเต่า หรือบุญเลี้ยงบ้าน @ บ้านกู่จาน ยโสธรครับ

    บุญขอลาบเต่า หรือบุญเลี้ยงบ้าน @ บ้านกู่จาน ยโสธรครับ


    กลุ่มนี้สิเป็นฝ่ายทำความสะอาดรอบๆดอนเจ้าปู่ครับ

    บุญขอลาบเต่า หรือบุญเลี้ยงบ้าน @ บ้านกู่จาน ยโสธรครับ


    ทางก้ำฝ่ายแม่บ้าน เพินกะสิซอยกันซอยหอม แล้วกะเตรียมเอาลาบไก่ใส่ถุงไว้ถ้าแจกตามเฮือน เฮือนละ 1 ถุง
    จั่งสิได้กินทั่วถึงกัน เพราะว่าบางเฮือนเพินกะบ่ได้ออกไปดอนปู่ตาเบิดซูคน อาจสิให้แม่บ้านไป พ่อบ้านถ้าเอางัวเข้าคอก จั่งซี่เป็นต้นครับ

    บุญขอลาบเต่า หรือบุญเลี้ยงบ้าน @ บ้านกู่จาน ยโสธรครับ

    บุญขอลาบเต่า หรือบุญเลี้ยงบ้าน @ บ้านกู่จาน ยโสธรครับ

    บุญขอลาบเต่า หรือบุญเลี้ยงบ้าน @ บ้านกู่จาน ยโสธรครับ


    ประมาณ 4 โมงแลง แนวกินแล้วเบิดทุกอย่างแล้ว เด็กน้อยเลิกโรงเรียน (ผุลังคนบ่แวฮอดเฮือนขี่จักรยานตรงดิ่งมุ่งหน้าสู่ดอนปู่ตาเลย)
    พ่อใหญ่จ้ำเพินกะสิเริ่มทำพิธี เสร็จแล้วกะสิมีการจุดบั้งไฟเสี่ยงทาย ว่าฝนสิตกดีบ่ปีนี้ แล้วกะมาฮอดเวลาที่เด็กน้อยรอคอย นั่นกะคือ แจกลาบเต่า (ไก่) เด็กน้อย
    ท้ายสุดคือการหาข้าวออกกินร่วมกันอยู่ดอนเจ้าปู่นั้นล่ะครับ ส่วนมากสิกินบ่ทันอิ่มดอก ฝนสิตกฮำก่อน เป็นจั่งซี่แทบทุกปีครับ

    บุญขอลาบเต่า หรือบุญเลี้ยงบ้าน @ บ้านกู่จาน ยโสธรครับ

    บุญขอลาบเต่า หรือบุญเลี้ยงบ้าน @ บ้านกู่จาน ยโสธรครับ


    ดีใจครับ ที่ยังเห็นชุมชนรักษาสืบทอดวัฒนธรรมประเภณีไว้ แม้ว่าคนที่ออกไปร่วมงานสิบางตากว่าปีก่อนๆ ย้อนผุลังคนเพินกะติดภาระกิจ
    แต่เพินกะสิส่งโตแทนไปเฮือนละคนยุ ถ้าบ่ไปเลยไทบ้านเพินกะสิว่าให้ ว่าบ้านเพินพาเฮ็ดหยังกะบ่เฮ็ดนำเพิน
    รายละเอียดผมอาจสิอธิบายบ่ได้ดีปานได๋ ย่อนว่าจากบ้านมาย่างเข้าปีที่ 5 แล้ว

    เล็กๆน้อยๆจากทีมงาน ขอบคุณบ้านมหาสำหรับพื้นที่นำเสนอครับ


    แก้ไขครั้งสุดท้ายโดย หยก ยโสธร; 23-06-2013 at 03:12. เหตุผล: รูปซ้ำ

  2. #2
    ศึกษาหาความรู้ สัญลักษณ์ของ อ้ายพจน์
    วันที่สมัคร
    Mar 2012
    กระทู้
    263
    :*-บ่าวหยกสมัยอ้ายเป็นเด็กน้อยทางบ้านอ้าย101กะมีประเพณีแบบนี้อยู่ครับสมัยนี้บ่เหลือแล้วดอนตาปู่คนบุกรุกแปนหมดละโพนนำนากะบ่เหลือรถไถตำหมดแล้วดีครับที่ยังมีกิจกรรมดีๆให้ไทยบ้านเฮาได้ทำร่วมกัน:

  3. #3
    เจ้าหน้าที่ประชาสัมพันธ์ สัญลักษณ์ของ บ่าวเอส
    วันที่สมัคร
    May 2011
    ที่อยู่
    หนุ่มอุบล คนพิบูล
    กระทู้
    316
    ...

    ดีหลายครับ มันเป็นประเพณีวัฒนธรรมน๊อครับ ซ่อยรักษากันใว้ให่ลูกหลาน

    ตอนนั้นกะพาไปกินเข่าอยู่ โพนขามใหย่ บ่อแหม่ติ

  4. #4
    ผู้ช่วยผู้ใหญ่บ้านมหา
    Mr.Reception
    สัญลักษณ์ของ คนตระการ...
    วันที่สมัคร
    Feb 2008
    กระทู้
    4,209
    ประเพณีนี้ อยู่บ้านผมยังมีคือกันครับ สิเลี้ยงปู่ตาก่อนลงนา
    สิเลี้ยงอีกเทื่อกะตอนได้ข้าวเม่า

  5. #5
    ดูแลตรวจสอบเนื้อหา สัญลักษณ์ของ pcalibration
    วันที่สมัคร
    Nov 2008
    ที่อยู่
    เมืองฉะเชิงเทรา(แปดริ้ว)
    กระทู้
    1,883
    บล็อก
    1
    ประเพณีอันดีงามแบบนี้กะยังพอมีอยู่ดอกครับ
    บ้านได๋พ่อใหญ่จ้ำเผิ่นแข็งและปู่ตาเผิ่นฮ้าย(หมายถึงเฮี้ยน)

  6. #6
    แบ่งปันความรู้และประสบการณ์
    วันที่สมัคร
    Mar 2013
    ที่อยู่
    ขอนแก่น ประเทศไทย khonkaen thailand
    กระทู้
    134
    กิจกรรมดีๆแบบนี้ เป็นตาสืบทอดไว้ให้ลูกหลาน นำไปปฏิบัติตามฮีตเก่าคลองหลังอยู่ครับ
    เห็นแล้วกะดีใจ มีแฮงใจนำครับ ที่ชุมชนเพิ่นยังพากันรักษาประเพณีอันดีงามไว้อยู่

  7. #7
    แบ่งปันความรู้และประสบการณ์ สัญลักษณ์ของ คนภูหลวง
    วันที่สมัคร
    Feb 2010
    ที่อยู่
    เมืองเลย
    กระทู้
    359
    ดีดี มีกิจกรรมให้ไทบ้านได้เฮ็ดร่วมกันสร้างความสามัคคีซึ่งตอนนี้หายากแล้ว

  8. #8
    ฝ่ายเทคนิค และถ่ายทอดสด สัญลักษณ์ของ อาวอ้วนเมืองยศ
    วันที่สมัคร
    Apr 2010
    ที่อยู่
    เมืองบั้งไฟ
    กระทู้
    1,513
    ยังมีกันอยู่ทุกหมู่บ้านก็แตกต่างกันไปตามภูมิประเทศ แต่ว่าบ้านผมมันโดนเมืองเข้ามารุกครอบไปแล้ว แม้แต่ที่ปู่ตาตะก่อนตอนนี้กลายเป็นสำนักงานปศุสัตว์จังหวัดไปแล้ว
    จักสุมื่อนี่ไปเลี้ยงไปไหว้กันทางได๋ บ่ได้ออกไปนำยาย มื่อหน้าสิหามาฝากดอกครับ
    สืบสาน สานต่อประเพณีที่ดีไว้

  9. #9
    ร่วมถ่ายทอดความรู้สู่สังคม สัญลักษณ์ของ ไผ่หวาน
    วันที่สมัคร
    Jun 2009
    ที่อยู่
    PATTAYA CITY
    กระทู้
    729
    บล็อก
    14
    ทางบ้านไผ่หวานเอิ้นดอนตาปู่ สลับกันค่ะ คืออาวอ้วนเลยค่ะ ตอนนี้กลายเป็นที่ตั้งของ
    สนง.อบต ไปแล้ว เสียดายต้นไม้ใหญ่อายุหลายปีแฮง

  10. #10
    แบ่งปันความรู้และประสบการณ์ สัญลักษณ์ของ หยก ยโสธร
    วันที่สมัคร
    Jan 2013
    ที่อยู่
    ซ.ลาซาล บ้านเกิด อ.คำเขื่อนแก้ว
    กระทู้
    174
    ทั้งนี้ทั้งนั้น ก็ต้องขึ้นอยู่กับผู้นำชุมชนพร้อมครับ ถ้าผู้นำชุมชนบ่เอาใจใส่ หรือว่าบ่พาพี่น้องไทบ้านเฮ็ด กะคงสิบ่ยังให้เห็นเท่าทุกมื่อนี้

    ดอนเจ้าปู่นี้ถือว่ายังอุดมสมบูรณ์อยู่ครับ มีลิงอาศัยอยู่ประมาณ 500 โต กินบักม่วงยุดอนนั้นล่ะ คนผ่านทางไปมากะซื้อกล้วย ซื้อขนมมาเลี้ยงลิงนำ
    มีลิงบางโตมันขี่ดื้อ มาหาลักกระติบข้าวนำเฮือนคนกะมี อุ้มแลนขึ้นกกไม้ไวปานวอก

หน้าที่ 1 จากทั้งหมด 2 หน้า 12 หน้าสุดท้ายหน้าสุดท้าย

กฎการส่งข้อความ

  • You may not post new threads
  • You may not post replies
  • You may not post attachments
  • You may not edit your posts
  •