สวัสดีครับ พี่น้อง ลุง ๆ ป้า ๆ ชาวบ้านมหาครับ มื่อนี้ ครัวเซียงเหมี่ยงฯ มีแนวอยู่แนวกิน มาสู่พี่น้องเด้อครับ กับข้าวง่าย ๆ เมนูเบา ๆ เพื่อสุขภาพ...
โดน ๆ เถื่อเซียงเหมี่ยงฯ ได้เข้าครัว เฮ็ดแนวกิน ย่อนว่าระยะหลัง ๆ เลิกงานค่ำ ๆ บ่ค่อยมีเวลาหาผัก หาปลา มาไว้ถ่าเฮ็ด...
พอดีเมื่อวาน แม่บ้านบริษัท เผิ่นเอาผักขา(ชะอม) มาขาย ผักสด ๆ ราคา ถูก ๆ เซียงเหมี่ยงฯ กะเลยได้มา ๒ กำ คิดไว้ว่า สิเฮ็ด แกงส้มกิน...
เลิกงานมา กะแวะตลาด หาซื้อ วัตถุดิบเฮ็ดกับข้าวมาตุนในครัว ย่อนว่าโดน ๆ ได้ออกไปเถื่อ หากุ้ง เพื่อมาใส่แกงส้ม บ่มี ต้องเลยไป ห้างดอกบัว ได้กุ้งแช่แข็ง เหลือสองแพ็คน้อย ๆ กะยังดีกว่าบ่ได้ :) ...
เริ่มจากพริกแกงส้มครับ เซียงเหมี่ยงฯ จำ ๆ มา ขาดเกินแหน่ บ่พิถีพิถันปานได๋ เอาสะดวก กับความรู้สึกเป็นหลัก ฮ่า ๆ ๆ มี กระชาย กะปิ หอม กระเทียม พริก โขลกพริกกับเกลือให้แหลกก่อน แล้วจั่งใส่ที่เหลือลงไปให้ละเอียดเป็นเนื้อเดียวกัน...
พริกแกงละเอียดแล้ว เซียงเหมี่ยงฯ มีปลาทู อยู่ สองโตในตู้ ต้ม แกะเนื้อ ตำใส่พริกแกง...
เตรียมชะอมไข่ ครับ เด็ดยอด ตีไข่สามใบ เอาไปทอด ตัดเป็นต่อนพอคำ มักคำใหญ่ ตัดใหญ่ ๆ อยากได้หลาย ตัดน้อย ๆ ฮ่า ๆ ...
ตั้งน้ำ ใส่พริกแกงที่โขลกกับเนื้อปลา ลงไป รอเดือดนิดหนึ่ง ปรุงรส กับ น้ำบักขามเปียก น้ำตาลปี๊บ น้ำปลา ชิมรสตามใจชอบครับ แกงส้ม ต้องออกสามรส เปรี้ยวนำ หวานตาม เค็มแต่พอดี เค็มหลายไตทำงานหนัก :) ...
พอดีได้ดอกแคข้างฮั้ว มาหน่อยหนึ่ง ใส่ไปนำ ผักแค ชื่อนี้ดีครับ หมายถึงผักแห่งความห่วงใยและดูแลกัน (Care Vegetable) ฮ่า ๆ ...
จากนั้นใส่กุ้ง จากห้างดอกบัว EXpress
ใส่พระเอกของเมนู ชะอมไข่...
ชิมรสอีกเถื่อก่อนปิดไฟ ตักใส่ถ้วย กินกับข้าวหอมมะลิสุรินทร์ ครับ...
กินข้าวนำกันครับพี่น้อง...
ขอได้รับความขอบคุณจากครัวเซียงเหมี่ยงฯ คือเก่าครับ...
มื่อหน้ามีเวลาเดี๋ยวคิดหาเมนู มาสู่พี่น้องกันอีกครับผม...
Bookmarks