นึ่งไก่ (ในหวด) ส่งจากทางลาซาลครับ

[หยก ยโสธร]

สืบเนื่องจากวันอาทิตย์ที่แล้ว หมู่ฮักหมู่แพงเพินเข้ามายาม จ่มอยากกินนึ่งไก่ กะเลยมีเมนูมาฝากพี่น้องบ้านมหาได้เบิ่งกัน
ย้อนว่าหอพักบ่มีซึง (ลังถึง) กะเลยได้นึ่งใส่ในหวด เทิงย้านไก่บ่สุกกะปานนั้น ชมภาพกันเลยครับ

วัตถุดิบ
- ไก่สด 1 ตัว
- กระเทียม หัวซิงไค ใบบักกรูด รากผักชี
- พริกไทเม็ด
- บักนาว พริกสด ต้นหอม ผักชีจีน สำหรับตำน้ำจิ้ม

เครื่งปรุง
- เกลือ ผงนัว ซอส ซีอิ้วขาว รสดี น้ำมันหอย น้ำปลา
- น้ำตาล สำหรับตำน้ำจิ้ม

มื่อนี่ผมได้ไก่เนื้อมาครับ โตนี่โลเคิ่ง อย่าหลงซื้อไก่ที่ไข่สุดแล้ว โตเหลืองๆ ที่ขายนำตลาดมาเด้อครับ มันเหนียว หย่ำบ่แหลก
ผมหลงซื้อมาเทือนึง ว่าแม่นไก่แม่สาวไข่ใหม่ตี๊สั่นดอก เอามาแกงใส่หน้อไม้ส้ม พี่น้องเอ๊ย... เทิงกินเทิงให้ เสียดายหน่อไม้ส้ม




ขั้นแรกตำเครื่องสำหรับหมักไก่ก่อนเลยครับ เกลือ พริกไท กระเทียม รากผักชี




เตรียมแนวหมักไก่ครับ ผงนัว ซอส ซีอิ้วขาว รสดี น้ำมันหอย น้ำปลา




ล้างไก่ให้สะอาด เอามีดแหลมแทงนำอกไก่ เผื่อน้ำมักสิได้เข้าในเนื้อครับ จากนั้นตักเครื่องที่ตำไว้มาลง พร้อมกับปรุงรส หมักไว้จัก 15 นาที
ทุปหัวซิงไค กับใบบักกรูดยัดเข้าไปในท้องไก่นำเด้อครับ




15 นาทีผ่านไป เอาหม้อนึ่งใส่น้ำขึ้นค้างไฟ เอาน้ำฮวด (ราด) หวดที่เฮาสิใช้นึ่งไก่ก่อนครับ เผื่อบ่ให้เนื้อไก่ติดหวด
ถ้าไผสิใช้หวดนึ่ง แนะนำว่าให้ใช้หวดแยกกันกับที่เฮาใช้นึ่งข้าวเด้อครับ ถ้าเอาหวดที่ผ่านการนึ่งแนวกินแล้วมานึ่งข้าว
สิเฮ็ดให้ข้าวเงือย ข้าวบูดไวพร้อม หวดหน่วยนี้ผมเอาไว้สำหรับนึ่งผัก นึ่งปลาโดยเฉพาะครับ

อย่าลืมเอาถ้วยน้อยฮองก้นหวดนำเด้อ ฮองเอาน้ำนึ่งไก่ เอาไว้ใส่น้ำจิ้มนำ ...
ไก่เต็มก้นหวดจุ้มบุ้ม สุกบ่น้อพี่น้อง เทิงเฮ็ด เทิงลุ้น




ระหว่างที่ถ้าไก่สุก เพื่อบ่เป็นการเสียเวลา เฮากะหันมาตำแจ่วถ่าเลยครับ หมู่กะยายน้ำบักตูมไปนำ
ผริกสด กระเทียม น้ำตาล ผงนัว เกลือนิดนึง ตำรวมกันให้ละเอียด




จากนั้นปรุงรสให้ เปรี้ยว เค็ม หวาน ตามแต่ผุมัก อย่าลืมหยอดน้ำนึ่งไก่ลงนำ สิได้นัวๆ






ซอยต้นหอม ผักชีลงนำ สิได้น้ำจิ้มนึ่งไก่ ครับ




30 นาทีผ่านไป มาครับบาดทีหนิ มาลุ้นนึ่งไก่ สิสุกบ่ ผลออกมาเกินคาดครับ สุกทั่วตัว เปื่อยดีปานหยัง




ฉีกขาออกแบ่งใส่จาน แซบๆนำกัน




ทิ้งท้ายด้วยน้ำบักตูมตราลูกโลก โดนๆเทือหมู่พวกมายามน้อครับ ... ผบ ว่าเมนูนี้ผ่าน อาทิตย์หน้าจัดให้อีกแนเด้อว่าซั่น




เล็กๆน้อยจากทีมงาน ขอบคุณพื้นที่สำหรับนำเสนอครับ