สวัสดีปีใหม่ครับพี่น้องบ้านมหาสู่ผู้สู่คน หลังหยุดยาวปีใหม่บอร์ดบ้านมหากะเป็นสีเงียบๆ
บ่อค่อยมีการเคลื่อนไหว คือสิเญาคักเนาะ ผุลางคนกะอาจมีกิจกรรมสวดมนต์ข้ามปี
ผุลางคนกะอาจสิกินเหล้าข้ามปี กะบ่อว่ากันแล้วแต่ถนัดไผมัน เผื่อบ่อให้บ้านมหาเงียบ
เหงาเกินไป กะเลยเอากิจกรรมตะของหยุดปีใหม่มาให้เบิ่ง
วันหยุดกะบ่อได้ไปไสอยู่กับสวนผักตามเคย ไปดูแลสวนผักผสมผสาน
ปลูกคะน้าไว้ในแปลงพริก ตามแต่เวลามี ว่างยามใด๋กะไปเฮ็ด
ตามธรรมดาของคนขยัน (บู๋ยยยยย) คนบ่อมีทางไปซั่นดอก
บรรยากาศยามค่ำ
ผักคะน้าในป่าพริก รดน้ำครั้งหนึ่งได้ผักสองอย่าง แล้วกะบ่อเปลืองพื้นที่นำ(สูตรคนขี้คร้าน)
บักพริกกะมีหม่องงาม หม่องขี้ล่าย กะคือคนเฮาล่ะเนาะ
พรวนดินหม่องที่ยังพรวนบ่อแล้ว
พรวนดินบักพริกไปพ้อเต่าโตหนึ่งขึ้นจากสระน้ำมาวางไข่ใส่ร่องพริก (ลาภปาก สิได้กินเต่าแม่ไข่ อิ อิ)
พรวนดินแล้วเอาเฟืองปก เพื่อให้ความชุ่มชื้นอยู่ได้ดน แล้วกะฮดน้ำ บ่อต้องฮดทุกมื้อ (ประสาคนเข่คร้าน)
มื้อใหม่มาเบิ่งหม่องเต่าไข่ว่าสิขุดเอาไข่ไปหมก คึดได้ว่าบ่อเคยกินเต่า
เห็นแต่ฮอยเผิ่นควักดินถมไว้ กะเลยจัดการก่นพริกหม่องหั่นออก
ย้านว่าเวลาฮดน้ำพริกสิเฮ็ดให้ไข่เต่าเน่า กะกั้นดินไว้เฉพาะรอเบิ่งมื้อเผิ่นฟักเป็นโต
เพราะทุกมื้อเต่านาตามธรรมชาติเหลือหน่อยแล้ว
ยามกลับบ้านกะได้ผักเมือกินนำ ใส่ตะกร้าจักยานแองกี้เบิ๊ดคันน้อย
ขอบคุณบ้านมหา ขอบคุณผุ้ติดตาม ขอบคุณธรรมชาติที่บ่อให้อดตาย
Bookmarks