ผญาอวยพรปีใหม่
ปีห้าหกเบิ๊ดศกแล้ว ปีใหม่ได้มาเถิง
ปีห้าเจ็ดเวียนมาปั้บ เปลี่ยนไปไวฟ้าว
เฮียมเอาพรมาให้ เอาโชคชัยมาส่ง
ประสงค์ใดขอให้ได้ สมด้ามดังใจหมาย
ให้เงินหลายงานหน่อย ลูกน้องซอยนายดึงขึ้น
หมู่พวกยู้ชูดัน ให้ฮูงเฮืองเหลืองเหลื่อม
ผลาเสริมเทพคุ้ม ตุ้มโฮมพากันซ่อย
ได้ลาภลอยคู่มื้อ คือดั่งด้ามปารถนา
การงานให้ก้าวหน้า การเงินกะให้คล่อง
การทองกะให้เฟื่อง การเมืองนั้นให้โด่งดัง
การหยังกะให้เจ้า ได้มีเป็นทุกสิ่งอย่าง
สุขสมหวังคู่เรื่อง บ่เคืองข่องคู่สู่อัน
อายุยืนยาวหมั่น ผิวพรรณงามเปล่งปลั่ง
พลังแฮงบ่เมื่อยล้า ปัญญากว้างเลี่ยนไหล
สุขสดใสซาบซ่า กายาบ่เถ่าบ่แก่
นับตั้งแต่มื้อนี้ ฮอดปีหน้ากะดั่งเดิม
เงินทองไหลหลั่งเพิ่ม เติมเต็มตุงโถงไถ่
ไปทางใดโฮจ้นจ้น คนหุ้มแห่แหน
แฟนกะหลายหมู่กะล้น ความทุกข์จนหนีห่าง
ย่างนำทางได้พบพ้อ ห่อคำแก้วและห่อเงิน
ให้เจ้าเพลินนำกินเล่น ม่วนมันบ่มีเมื่อย
หมิดหมับม้อย เมิดสิ้นอย่าสิมี
สิ่งใดดีให้หลั่งเข้า โพยภัยให่ไกลห่าง
สุขสมหวังคู่ด้าน เงินงานพร้อมคู่สู่อัน
สารพันพรผู้ข่า สาธยายทุกสิ่งอย่าง
ไห้สมดังวาดเว้า สมใจเจ้าคู่สู่คน เด้อ…..สาธุ
Bookmarks