ผญา (ลาผุสาวไปหาเฮ็ดเวียก)

[บ่าวหัวเขียง]

ผญา (ลาผุสาวไปหาเฮ็ดเวียก)
บ่าวหัวเขียง...บ่อยากพลัดพรากหน้า จำห่างนางหนี เห็นกันมาหลายปี บ่อยากหนีไกลเจ้า การมายู้งานหลวงมาไล่ แม่นว่าโตบ่อยู่ใกล้ แต่ใจอ้ายกะอยู่นำ "ยุเด้"
สาวเครือฟ้า...เจ้าอย่าปล่อยข่อยไว้ กลางไฮ่เป็นหมู่กา เจ้าอย่าป๋าข่อยไว้ กลางนาเป็นหมู่ไก่ เจ้าอย่าปลงข่อยไว้ ลัยถิ่ม ให้เปลี่ยวพลอย เด้ออ้ายเด้อ
บ่าวหัวเขียง...บ่อยากพลัดพรากน้อง อ้ายจำจ่องใจไป พอยามตาเว็นสาย อ้ายสิไกลลัยเจ้า คันแม่นบุญเคยสร้าง ผลาเฮาเคยได้ฮ่วม คันแม่นคาดสิได้ร่วม ไปแล้วกะต่าวคืน "ดอกนาง"
สาวเครือฟ้า...ไกลขอให้ไกลแต่บ้านฮั้วไฮ่นาสวน ไกลขอให้ไกลแต่มวลหมู่เฮือนกับเล้า ส่วนว่าวาจาเว้าสองคนเฮาอย่าได้ห่าง ต่างคนแม่นสิอยู่ต่างบ้าน ความเว้าอย่าห่างกัน "เด้ออ้าย"
บ่าวหัวเขียง...ไกลอ้ายกะไกลแต่หน้าสิมั่นมาบ่ให้ห่าง จิตอ้ายกะอยู่ผี้ ใจอ้ายกะอยู่นี้ สิไปพุ้นแต่ฮ่างคิง "ตั่วนาง"
สาวเครือฟ้า...อย่าสิลัยเสียถิ่ม ทางเฮาเคยท่อง อย่าสิละพี่น้อง หนีไปย่องผู้เผิ่นดี "เด้ออ้ายเด้อ"...อย่าสิลัยความเว้า เฮาเคยจาจนฮุ่ง เว้ามื้อใด๋กะจนแจ้ง เว้ามื้อใด๋กะฮอดเช้า โตอ้ายอย่าสิลืม
บ่าวหัวเขียง...บ่ได้ลัยลาน้อง ไปมีสองซ่อนอื่น แม่นสิมีหมื่นสาว แม่นสิซาวยอดฟ้ามาเลี้ยง กะบ่เอา "ดอกเครือฟ้า"
สาวเครือฟ้า…"ย่านเด้อ้ายย่านเด้" ย่านคองคอยอ้าย คือกบเขียดคอยฝน คือคนจนคอยรวย ย่านแต่ตายบ่เห็นซ้ำ "นั่นแหล่ว"
บ่าวหัวเขียง…"หล่าเอ้ย" คันแม่นคึดฮอดอ้าย ให้เหลียงเบิ่งเดือนดาว ขอให้สายตาเฮา กล่อมกันอยู่เทิ่งฟ้า "เด้อคนงาม"
สาวเครือฟ้า...คันแม่นคึดฮอดน้อง ให้เหลียวเบิ่งเมฆา ก้อนขี้ฝ้ามันไหล กะดังใจของฟ้านั่นหละ "เด้ออ้ายหัวล้าน โอ๊ะ อ้ายบ่าวหัวเขียง"

[เขย ตระการ]

ม่วนยู่คับอ้าย จัดมาอีกแนเด้อคับ