อ่อมอิปูครับ

[หยก ยโสธร]

มื่อนี้บ่าวหยกมีแนวกินบ้านเฮามานำเสนอให้พี่น้องบ้านมหาเฮาได้เบิ่งกันอีกเมนู นั้นกะคือ "อ่อมอิปู" ครับ
หลังจากที่ได้นำเสนอป่นอิปูไปแล้วแต่ช่วงต้นเดือน ได้กินปูแทบทุกเมนูเลยกะว่าได้
อิปูเอาแซ่น้ำแข็งลงมาแต่บ้านเฮาตอนปีใหม่พุ้นล่ะ เอาลงมาเฮ็ดสู่อ้ายกินยุ กทม ย้อนอ้ายเพินบ่ได้กลับบ้านนำ

วัตถุดิบ : ปูนา ต้นหอม ผักชีลาว ผักอีตู่ หัวซิงไค หอมแดง พริกแห้ง
เครื่องปรุง : ผงนัว น้ำปลา น้ำปลาแดก เกลือ



หลายเติบครับ ถ่าสิขังใส่คุลงมากะย้านมันตายเน่า เลยเอาแช่ใส่ถังน้ำแข็งมา ฮอด กทม กะเข้าช่องฟิชอีก 3 มื่อ
ย้อนมันบ่ทันมีเวลาเฮ็ดกิน




ล้างปูให้สะอาดครับ บ่ซั่นมันสิหัดดินทราย แกะกระดองปูออก เอาหางช้อนควดมันปูออกใส่หม้อครับ




ส่วนที่เป็นโตของอิปูเฮากะเอาใส่ในครก ตำให้แหลก






จากนั้นตักออก เติมน้ำลงไปจัก 2 ถ้วย กรองด้วยตะแกรงเอากากปูถิ่ม เอาแต่น้ำคาว+มันปูมาอ่อม






ตำเครื่องอ่อมครับ หัวซิงไค พริกแห้ง หอมแดง เกลือนิดนึงแล้วตักใส่หม้อ
ปรุงรสด้วยผงนัว น้ำปลา น้ำปลาแดก แล้วยกขึ้นตั้งไฟ






ล้างผักผักชีลาว ผักอีตู่ ต้นหอม หั่นเตรียมไว้ ปล่อยให้หม้อเดือดแล้วจั่งใส่ผักลงไป








พอผักสุกกะซิมรสชาด แซบแล้วยกลงตักใส่ถ้วยเสริฟได้เลยครับ






เว่าพื้นอ่อมอิปูถ่าได้กบไง (กบจำศิล) ใส่นำหนิเข้ากันปานหยัง แต่น้อยไปก่นปูนำแม่กะได้กบไงมานำ ซูมื่อนี้หายากแล้วครับ
บางสูตรเพินกะใส่ผักแก่นขมนำ น้ำแกงอ่อมสิขมอำลำ แต่แม่บ้านผมเพินบ่มักขม เลยบ่ได้ใส่

กระทู้นี้เอาไว้ซำนี้น้อครับ ถ้าพ้อกันอีกกระทู้หน้า ขอบคุณบ้านมหาสำหรับพื้นที่นำเสนอ ซำบายดีซูคนครับ

[คนตระการ...]

ยากเติบกว่าสิได้กิน พอเฮ็ดแล้ว คือจั่งขั่วไข่เนาะ

[พ่อใหญ่เซียงเบ้า]

พ่อใหญ่เซียงเบ้า หิวเข่าหลายขอจกแล้วกะจ้ำอ่อมอิกะปูก่อนหมู่ กะว่ากินอิ่มแล้วจั๋งสิล้างมือ มา มา หยับเข้ามา กินงายนำกัน 555

[คนของหัวใจ]

ตาแซบขนาดค่ะ ยกนิ้วให้ความอร่อยเมนูนี่

[หยก ยโสธร]

อ้ายคนตระการ : มันปูจับกันเป็นก้อนครับ บ่อยากบอกเลยว่ามันล่วงน้ำ
ใส่น้ำหลายโพด พลาดไปหน่อยนึงครับ

[มาลัยศรี]

อีกเมนูหนึ่งเอาไปลาบเด้อค่ะ แซ่บคั่กหลาย น้องสาวเฮ็ดให่กิน ดึงหูกะบ่ออกพู่นแหล่ว ตั้งไฟอ่อนๆไว่ ไห่มันบกน้ำแล่วกะยกลงจากไฟ ใส่เครื่องลาบคือเฮาลาบหมูนี่ล่ะ แซ่บเด้อเมนูนี่ ลองเมิ่งค่ะ นำมาแบ่งปันกัน

[มะเหมี่ยว]

เมิ่ดไป่น้ออออออออออซิมนำแนจักถ้วย เป็นตาแซบคัก