ไก่ไต้น้ำ ...

[หยก ยโสธร]

สวัสดีครับ พี่น้องบ้านมหา ... โดนเติบครับ ที่บ่ได้ส่งกระทู้ในเวปบ้านมหา ย่อนคายากนำเวียกนำงาน
มื่อนี้พอมีเวลาเลยแวะเข้ามาจอบ ถือโอกาศเอาเมนู "ไก่ไต้น้ำ" มานำเสนอให้พี่น้องได้เบิ่งครับ

เมนูนี้เหมาะสำหรับเฮ็ดเป็นเมนูฆ่าเวลาสำหรับเป็นกับแกล้มครับ ย่อนมันช้า หลายขั้นตอนนำ ถ้าเฮ็ดกินยามหิวๆมันบ่ทันใจ
หน้าตาเมนูสิออกมาแบบได๋ วิธีเฮ็ดเป็นแนวได๋ ติดตามได้เลยครับ

วัตถุดิบ-เครื่องปรุง
ไก่สด ตะไคร้ หอมแดง กระเทียม พริกแห้ง พริกแกง กะเพรา...เกลือ ผงนัว รสดี ซอส ซีอิ้วขาว น้ำปลา น้ำมันหอย


ขั้นตอนแรกครับ ได้ไก่สดมาแล้ว ย่างไฟนิดนึงเพิ่มสีสัน หลังจากนั้นล้างให้สะอาด สับให้พอดีคำ






จากนั้นตำเครื่องแกง มีพริกแห้ง ตะไคร้ หอมแดง กระเทียม เกลือนิดนึง โขลกทุกอย่างให้แหลกจั่งใส่พริกแกงลงไป










ใบกะเพราครับ






เมื่อเตรียมเครื่องทุกอย่างได้แล้ว กะเอาไก่ที่สับไว้ลงในหม้อนึ่งที่สะอาดครับ
จากนั้นปรุงรสด้วยผงนัว รสดี ซอส ซีอิ้วขาว น้ำปลา น้ำมันหอย คนให้เข้ากัน "โดยที่บ่ต้องใส่น้ำลงไป"






ฮอดขั้นตอนสำคัญครับ สุกบ่สุกกะสิขึ้นอยู่กับขั้นตอนนี้ล่ะ
หลังจากที่เฮาปรุงรสเรียบร้อย ให้หาผ้าขาวชุบน้ำบิดหมาดๆมาวางรอบปากหม้อนึ่ง แล้วเอาหม้อที่ก้นขาวๆใส่น้ำมาวางทับลงไป
พยายามอย่าให้มีช่องว่างครับ บ่ซั่นไอน้ำสิระเหยออกหม้อสิไหม้ ถ้าบ่มีผ้าขาวกะเอาใบตองกล้วยลนไฟวางรอบๆปากหม้อหลายๆชั้นแทนกะได้






จากนั้นยกขึ้นตั้งไฟ ตอนแรกใช้ไฟอ่อนก่อนครับ เพราะถ้าใช้ไฟแฮงในหม้อนึ่งเฮาบ่มีน้ำ มันสิไหม้หม้อก่อน
แล้วค่อยจอบเบิ่งน้ำในหม้อครับ เอานิ้วจุ่มเบิ่งถ้าน้ำในหม้อเริ่มฮ้อนให้เอาแนวตักน้ำออก (ห้ามยกหม้อออก) แล้วเปลี่ยนน้ำใหม่ลงไป
หลังจากเปลี่ยนน้ำแรกน้ำสองแล้วจั่งเร่งไฟให้แฮงขึ้น ถ้าไก่หนุ่มเปลี่ยน 4-5 น้ำกะสุกแล้ว ถ้าไก่หยาบกะเปลี่ยน 7-8 น้ำ




สำหรับมื่อนี้ผมซื้อไก่พันธ์นำตลาดมาเฮ็ด กะเลยเปลี่ยน 6 น้ำพอ ... หลังจาก 6 น้ำผ่านไปยกหม้อออกเบิ่งผลงานครับ
น้ำพอดีซด บ่แห้งปานได๋




ใส่ผักกะเพราลงไป คนให้เข้ากันแล้วตักใส่จานเสริฟได้เลยครับ





หน้าตาสิออกมาแนวนี้ล่ะ เป็นกับข้าวกะแซบ กับแกล้มกะดี สำหรับเมนูนี้บางท่านเพินกะเอิ้นไก่กลั่น
หลักการกะคือ ให้น้ำที่ค้างยุปากหม้อนึ่ง ระเหยกลายเป็นไอแล้วหยดลงมาหาไก่ที่อยู่ในหม้อนึ่ง




ลากันด้วยภาพนี้ครับ ข้าวจ้าวหอมมะลิจากทางบ้านเฮา กินกับไก่ไต้น้ำ ...แซบๆนำกัน




ขอบคุณพื้นที่บ้านมหา ขอบคุณเอื้อยอ้ายที่เข้ามายามกระทู้ เอาไว้พ้อกันอีกกระทู้หน้า อยู่ดีมีแฮงซูผู้ซูคน ซำบายดีครับ

[lungyai1123]

อื้อมันกะเป็นตากินเป็นตาแซบกับข้าวกะสิไคใส่กับแกล้มกะสิเข่าท่า

[pui.lab]

ว้าววว น่ากินมากๆเลยน้อง คั่วไก่ ผัดไก่ เผ็ดๆ มักหลายเอื้อย

[สาวเมืองยศ]

โอ้...คือมาเป็นตาแซบแท้ล่ะบาดนี่ กินกับข้าวเหนียวฮ้อนๆเนาะคือสิแซบ

[มาลัยศรี]

เป็นตากินคั่ก สิเอาไปเฮ็ดกินคักๆสงกรานต์สิฮอดนี่ล่ะ ขอบคุณค่ะที่หาเมนูเด็ดๆมาไห่

[pcalibration]

อยากกินของแซบต้องใจเย็นๆเนาะบ่าวหยก
หว่าแต่ต่อนใต้น้ำกินกับน้ำใต้ต่อนได้บ่น้อครับ5555

[น้องนา]

มักหลายค่ะไก่ใต้น้ำ ขอบคุณสูตรนำเด้อจ้า

[หลอดปอดป่อง]

เป็นตาแซบหลายครับ กลิ่นคือสิโชยไปทั่วหอพักเลยน้อบ่าวหยก 55