ในวันขึ้น 15 ค่ำ เดือน 5 ของทุกปี ซึ่งปีนี้(2557)ตรงกับวันที่ 14 เมษายน ชาวตำบลบ้านแก้ง อ.แก้งคร้อ สิมีงานบุญร่วมกัน คือเอาบุญภู บูชาญาปู่ผาแดง ซึ่งได้ทำเป็นประจำทุกปี มีมาแต่ยามได๋กะบ่ฮู่คือกัน เพราะว่าเกิดมากะเห็นแล้ว ชาวตำบลบ้านแก้งซึ่งมีประมาณ 10 หมู่บ้านหรือมีตำบลอื่นมาร่วมบางหมู่บ้าน กะมาร่วมแรงร่วมใจกันทำบุญอยู่ตีนภูผาแดง ที่ซึ่งมีศาลตาปู่อยู่ ทางเข้าอยู่บ้านกุดเก่าน้อยเนาะคับ ผู้ได๋ไปทำการทำงานทางอื่นมักสิมากราบไหว้ญาปู่ ให้โชคให้หมาน เดินทางปลอดภัย พอดีปีนี้ตรงกับมื้อสงกรานต์ กะเลยได้เมือบ้านไปฮ่วมบุญ เอาภาพมาฝากพี่น้องบ้านมหาคับผม มีพิธีการหลายอย่าง ชมภาพกันเลย
มาฮอดยามเซ้าคับ รถบ่หลายปานได๋ คนกะบ่ค่อยหลาย ของมาไหว้กะมีพวงมาลัย ช้าง ม้า ธูปเทียนมาซื้อเอาอยู่ศาลญาปู่คับ ชุดละ 20 บาท ตอนนี้คนยังเบาบาง ตอนบ่ายบ่มีฮอดหม่องจอดรถ
หม่องนี้ เพิ่นเตรียมไว้แข่งบั้งไฟคับ แต่ละบ้านกะเอามาแข่งกัน แต่ว่าบ่ได้อยู่เบิ่ง เพิ่นแข่งตอนบ่าย ผมเมือบ้านก่อน
บริเวณปะรำพีธี หม่องเซาผู้เฒ่าผู้โถและผู้มาร่วมงานคับ
[IMG]
[/IMG]
บรรดาแม่จ้ำกะเข้าประจำศาลาน้อยต่างๆ มีหลายศาลาอยู่คับ คอยรับดอกไม้ พวงมาลัย และกะอำนวยอวยพร แต่ละบ้านกะมีแม่จ้ำหลายคนอยู่คับ
รูปแทนญาปู่ คนเข้าไปปิดทอง จุดธูปเทียนบูชาขอพร
ส่วนแท่นบูชาพระ นิมนต์พระสงฆ์แต่ละหมู่บ้านมาฉันภัตตาหารเพลครับ แต่บ่ได้ถ่ายรูปมา
เข้าทรงญาปู่ผาแดง คนเข้าแถวถวายดอกไม้ ขอพรญาปู่ อั่งหลาย ผมกะเข้าแถวนำขะเจ้าคือกัน
แม่จ้ำบางส่วนกะมานั่งในปะรำพิธี และผู้มาร่วมงานคับผม
คนเริ่มหลายแล้ว รถกะมาหลาย บางคนกะไปพักเซาอยู่นำก้อนหินตีนภูคับ บ่ฮ้อนปานได๋
ไหว้แล้วกะออกมาหาแนวกิน เพิ่นมีโรงทานหลายอย่างอยู่คับ ไปต่อคิวรับได้เลย และกะมากินรวมกันคับผม
สาวบ้านโตบ่คือสาวบ้านเพิ่น หลายสีปานไก่ฟ้าเอาโลด
กลับจากเอาบุญภู กะไปหาปลากับทีมงานคับ เอาแต่ปลาจาระเม็ดน้ำจืดคับ(เปคู) ปลาอื่นบ่เอา ถ่ายรูปมาเบิ่งสองโตคับ เทิงลาบเทิงต้ม
เอาบุญภูแต่ละปีวันที่กะบ่ตรงกันทุกปีเนาะคับ เพราะว่ากำหนดเอามื้อขึ้น 15 ค่ำเดือน 5 ของทุกปีเป็นมื้อบุญ บางปีกะตรงสงกรานต์ บางปีกะบ่ตรง เป็นมื้อบุญที่ร่วมมือร่วมใจของคนในท้องถิ่น ชุมชน เป็นการสืบทอดวัฒนธรรมประเพณีให้อยู่สืบไปฮอดลูกฮอดหลานคับ
ขอบคุณไทบ้านมหาที่เข้ามารับชมคับผม
อ้างข้อความนี้
Bookmarks