หวัดดีครับ พี่น้องบ้านมหา หว่างสงกรานต์หว่างหั่นบ่ได้ลงเมือบ้านนำเพิน อีแม่เพินฝากแนวกินบ้านเฮาขึ้นมานำพี่ชาย
มื่อนี้สินำเสนอเมนูก้อยกะปอมให้พี่น้องบ้านมหาเฮาได้เบิ่งกันครับ เป็นเทือแรกในฤดูการปีนี้น้อ
วัตถุดิบ - เครื่องปุรง
- กะปอม หอมแดง ผักใบมน(สะระแหน่) บักม่วงน้อย พริกสดสำหรับเฮ็ดลูกโดด
- พริกผง ผงนัว น้ำปลา น้ำปลาแดก
ตัดภาพมาตอนปิ้งสุกแล้วน้อครับ ผมบ่ลอกหนัง สิใช้วิธีลนไฟแล้วเอามือลูบเกล็ดออกเอา มันโตน้อยเดี๋ยวสิบ่พอกันกิน
จากนั้นกะผ่าท้องเอาพุงออก ล้างให้สะอาดแล้วปิ้งให้สุก
จากนั้นสับเป็นชิ้นน้อยๆครับ เอาใส่ครก พร้อมกับบักม่วงน้อยซอย ตำให้เข้ากันแล้วตักใส่กาละมังน้อย (ถ้าคนใส่ครกย้านมันบ่เบิด)
พ่อครัวครับ ลงมือเองคือเก่า ตอนนี้ทีมงานเพินยกให้เป็นพ่อครัวประจำวง(เหล้า)แล้ว
ซอยผักหอมไว้ใส่ก้อย
ปรุงรสครับ พริกผง ผงนัว น้ำปลา ผักหอมซอย ลูกโดดพร้อม
หยอดน้ำปลาแดกต้มขวดนี้ลงนำ สิได้นัวลึก อีแม่เพินต้มลงมาให้จากยโสธรพุ่นล่ะ เอาแช่ตู้เย็นไว้
ฮ่วยบัดได๋แท้ผิดขวดตั๊วหนิ ... ต้องขวดนี้ครับ มันจั่งแมนน้ำปลาแดกต้ม
แล้วกะคนให้เข้ากันครับ ซิมเบิ่งแซบแล้วกะเสิร์ฟได้เลย เทิงเผ็ด เทิงส้ม เทิงแซบ (เมนูแสบดาก )
แนวกินตื่มครับ ปิ้งไก่ ตำบักหุ่ง แกงหน่อไม้
มาครับ กินข้าวสวยนำกัน มีทีมงานมากินนำกันหลายคน ย้อนว่ากินผุเดียวมันบ่แซบ
ว่าสิเอิ้นใส่อ้ายอี๊ด(คนภูหลวง)กะบ่ได้หยุดตรงกัน เอาไว้โอกาศหน้าน้อครับ
ขอฝากอีกนิดนึงน้อ มีโอกาศได้ขยับขยายออกมาอยู่บ้านแล้ว มีพื้นที่สะดวกในการเฮ็ดกับเข้ากับน้ำสมใจอยาก :,1-
ทางสิรารมย์ บางปะกง บางนาตราด กม. 43 พุ้นล่ะ แต่ก่อนนี้เฮ็ดอยู่ห้องเช่า กลิ่นกับข้าวเต็มห้องยุ
แต่ปานนั้นกะยังคุมเฮ็ดย้อนเบื่อกับข้าวถุงเนาะครับ
ต่อเติมยังบ่ทันแล้วดอกครับ พื้นที่ครัวกะบ่ทันได้แล้ว อาศัยเดิ่นหน้าบ้านเป็นหม่องเฮ็ดแนวกินซะก่อน
พึ่งย้ายเข้าอยู่ได้บ่ถึงเดือน ฝากโตเป็นน้องใหม่ในทีมงานทางบางปะกงแนเด้อครับ :b-b
Bookmarks