สวัสดีครับ พี่น้องบ้านมหา กลับมาแล้วครับหลังจากหายหน้าหายตาไปโดนเติบ ย่อนว่าเน็ตผมเข้าเว็บบ้านมหาบ่ได้
มื่อนี้ลองเข้าผ่าน Firefox เบิ่งปรากฏว่าเข้าได้ ดีใจบักอย่างคัก
เข้าเรื่องเลยน้อครับ หว่างวันแม่ผมมีโอกาศเมือยามบ้านอีกเทือนึง มีภาพกิจกรรมหาอยากหากินจากทางบ้านเฮามาสู่พี่น้องเบิ่ง
เป็นกิจกรรมที่ผมออกไปยามลอบ ยามไซกุ้งครับ ว่าสิไปใส่เบ็ดย้อนอดีตความหลังเบิ่งจักหน่อย ฝนผั่นตกมาซ่ำ เลยบ่ได้ออกไป
นี้ล่ะครับหมาย นาติดห้วยน้ำไหลพาดคันแท ใส่ลอบยาวนำคันแทเลย น้ำลึกพอสมควรครับ เทิงคันแทกะเพียงหัวเข่าแล้ว
มื่อนี้ผมออกมากับพ่อเฒ่าครับ แนมไปเพินกำลังจับปลาใส่ข้องยุ ฮึแม่นลักจ่มให้ลูกเขยยุกะบ่จัก ยากนำถล้องถ่ายรูป
ยกลังนี้เบิ่งก่อนน๊า มีหยังมาเข้าบ่น้อ
พอได้ป่นยุตั๊วล่ะครับ ซำดามพร้ายุ เต้นตำตาข่ายลอบจนว่าหัวเหลิ่นเบิดเนาะ :,1-
มาเบิ่งผลงานรวมๆครับ ลอบสี่ห้าหลังใส่เรียงกันไว้ มีเต่าน้อยเข้ามานำโตนึง ว่าสิเอาไปปล่อยใส่หนองสายุวัด :,1-
เสร็จจากยามลอบแล้วหันมายามไซกุ้งครับ ใส่ไว้ในฮองห้วยไกล้ๆกันนั้นล่ะ ปีนี้ฝนดีครับ น้ำแก่งมาพึ่งจะบก
ช่วงที่น้ำมาคักๆหม่องที่ผมยามลอบหว่างหั่นแนมบ่เห็นต้นข้าวเลย ฝายนี้กะน้ำหลายจนตู๋ท้องสะพานฝาย
หลายท่านอาจสิบ่เคยเห็นไซกุ้ง ว่าหน้าตามันเป็นแนวได๋ ตามภาพนี้เลยน้อครับ เย็บด้วยดางเขียวเฮ็ดเป็นงาเข้าทั้ง 2 ทาง
มีหลัก 4 หลัก กางอ้าปากไซออกทั้ง 2 ทาง
นั้นละครับ แนมไปทางท้ายฝายสิเห็นใส่ไว้ยุสองหลัง
ลักษณะการใส่ สิกางตั้งขึ้น สลับกับฝาเฝือกกางต่อกันไปเรื่อยๆตามรูป ไซกับฝาเฝือกต้องใส่ให้ติดพื้น (ฝาเฝือกคือดางเขียวกางขึงกั้นไว้ซือๆ)
หันมาทางหน้าฝายครับ ทางนี้กะใส่ไว้คือกันอีก 5 หลัง
เบิ่งผลงานดู๊ครับ ใส่ไซ 7 หลังได้ซำนี้ล่ะ บ่ถือว่าหมานแต่กะได้แล้วงายยุ เข้าเบิดเทิงปลาน้อย เทิงเอี่ยน เทิงปลาบู่ ... ถ้ามื่อได๋ฝนตกกุ้งสิเข้าหลาย
ผู้ที่เพินหาขายเพินสิใส่เป็น 40-50 หลัง ยามแต่ล่ะมื่อได้เป็นคุถัง แต่พ่อเฒ่าเพินหาพอได้กินครับ
นี้แม่นพ่อใหญ่นาข้างๆเพินฮอมสิไปใส่ลอบ เห็นแล้วกะคึดฮอดอีพ่อใหญ่ผม ตะกี้ที่เพินยังอยู่กะหากินเก่งบ่ค่อยคือกัน ระดับนายพรานปลาพุ้นล่ะ
กระทู้นี้กระขอจบไว้ซำนี้อครับ บรรยากาศทางบ้านเฮาเบิ่งยามได๋กะบ่เบื่อ เอาไว้พ้อกันกระทู้หน้ายุห้องอาหารอีสาน สิลาบปลาตองสู่กิน
ขอบคุณพื้นที่บ้านมหา ขอบคุณเอื้อย-อ้ายที่เข้ามายามกระทู้ สุขซำบายดีทุกท่านครับ
Bookmarks