สุดยอดเลยจ้า ...เป็นตาอยากเฮ็ดนำจ้า
เก็บแตงขาย
ขอบคุณอ้ายนคร แตงเพิ่นหวานดีครับรับประกันได้
ขอบคุณอ้ายคนไกลฯ อยู่ด้านตะวันออกเขาพนมรุ้ง บรรยากาศอินดี้ดีครับ เก็บแตงแล้วสิไปเอาแนวปอเทืองนำเด้อครับ
อนุโมทนานำครับเอื้อย เป็นต้ะปลูกนำเพิ่นยุ่ครับแต่ผมว่าปลูกเองขายเองได้กะดี
ครับ แล้วกะมาถึงโค้งสุดท้ายของการปลูกโมในครั้งนี้
วันที่ 24 กุมภาพันธ์ แตงโมอายุครบ 65 วัน ผมถือโอกาสขาดงานต่ออีกมื้อนึ่งเพื่อมาสังเกตุการณ์เบิ่งเพิ่นเก็บแตงขาย
แล้วกะศึกษาหาข้อมูลไปนำ มีรถพ่อค้ามาจอดถ่าอยู่หลายคันเจ้าของสวนพร้อมคนงานลงมือเก็บแตงแต่เช้า
เก็บแตงไว้เป็นกองๆ ที่เห็นกะสิเป็นแตงลูกใหญ่ๆ ครับ แตงหน่วยใหญ่สุดกะที่เห็นในภาพน้ำหนักอยู่ราวๆ สามถึงสี่กิโลกรัม
คาดว่าน้ำหนักเฉลี่ยต่อลูกบ่หน่าสิเกินไปกว่านี่
ผลผลิตแตงโมแดงในครั้งที่สองโดยปลูกทับที่เดิมกับปีที่แล้ว ผลผลิตบ่เป็นที่พอใจแตงโมหน่วยน้อยหลายกว่าหน่วยใหญ่
แตงโมขนาดหนึ่งกิโลครึ่งถึงสองกิโลครึ่งถือว่าหลายคัก แตงโมเต็มรถวีโก้แค้บพ่อค้าเพิ่นว่าน้ำหนักอยู่ประมาณสามตันกว่า
สามตันเป็นแตงที่เก็บมาจากพื้นที่ปลูกสองไร่ครับ กะตกไร่ละตันครึ่ง เหลือหน่วยน้อยที่ยังบ่เก็บอีกประมาณไร่ละตัน
ผลผลิตการปลูกแตงครั้งนี้อยู่ประมาณสองตันครึ่งต่อไร่ 2.5 ตันต่อไร่
ผมถามพ่อค้าว่าแล้วราคาท่อได่ครับ เท่าไหร่ครับ พ่อค้าตอบว่ายังบ่ฮู้ดอก ประมาณว่าบ่อยากบอก ขึ้นอยู่กับตลาดวะสั้น
ผมถามว่าแล้วราคาเฉลี่ยอยู่ประมาณท่อได๋ เพิ่นกะยังตอบว่านั้นละขึ้นอยู่กับตลาด บ้ะ ตอบยากแถะละ
ฮ่วย เอาจั่งได๋หน่อ อยากฮู้คำตอบเนาะ เอ..ผมเคยอ่านพ้อว่าขายแตงโมหน้าสวนราคาสิบบาทสิบกว่าบาทกะมีแม่นบ่ครับ
เพิ่นตอบว่าถ้าที่เคยหาซื้อบ่มีดอก แล้วที่หาซื้อท่อได่ครับ ใจพ่อค้ากะอยากได้ถูกที่สุดแล้ววะสั้น สี่บาทห้าบาทนี่ละ
หน่วยน้อยกะสามบาท ปีนี่แตงบ่หลายราคากะสิไคแหน่ยุ้ตี้ พ่อค้าตอบ แล้วส่งใสครับส่งตลาดไทบ่ บ้อ..เอาไปลงแผง
แผงใสครับ แผงยุแถวนี่ละ เอ๋า(ในใจ) แล้วขายจั่งได่ครับ หน่วยส่ำนี่ขายจั่งได่ ผมซี้มือไปที่แตงโมหน่วยขนาดประมาณ
สามถึงสี่กิโลกรัมหรือหน่วยในภาพนั้นละครับ ขนาดนี่กะขายสามหน่วยร้อย สามลูกร้อย
แต่วันที่ยี่สิบสองผมมาเบิ่งและกะซื้อแตงกลับไปกิน พอเห็นราคาที่เพิ่นขายหน้าสวนรู้สึกว่าแพงจั้กหน่อย
กะเลยซื้อไปสี่ห้าหน่วยและเจ้าของสวนแตงโมเพิ่นบอกว่ามีพ่อค้ามาเบิ่งแล้วให้ราคาไว้ที่ ห้าบาทสามสิบตังค์
ซื้อขายแบบชั่งกิโลครับ เบื้องต้นว่ากิโลกรัมละ 5.30 บาท สำหรับแตงโมหน่วยใหญ่
ถ้าราคาซื้อขายจริงกันตามนั้นและผลผลิตตามนั้นเจ้าของสวนแตงโมสิได้เงินกี่บาท
แตงโมลูกโตขนาด 3-5 กิโลกรัม จำนวน 1.5 ตันต่อไร่ ขายในราคา 5.30 บาทต่อกิโลกรัม คิดเป็นเงิน 7,950 บาทต่อไร่
ชาวสวนปลูกแตงโมทั้งหมด 6 ไร่ สิมีรายได้จากการขายแตงโม...ลูกใหญ่...เท่ากับ 47,700 บาท หรือสี่หมื่นแปดพันบาทครับ
ขายแตงลูกเล็กอีก ไร่ละตันในราคาประมาณที่ 3.50 บาทต่อกิโลกรัม เท่ากับ 6000 x 3.50 เท่ากับ 21,000 บาท
รวมแล้วชาวสวนสิมีรายได้ในการปลูกแตงโมระบบน้ำหยดจำนวน 6 ไร่ อยู่ประมาณ 70,000 บาทก่อนหักค่าใช้จ่าย
ในเวลาสองเดือนกับรายได้เกินครึ่งของเจ็ดหมื่นบาทถือว่าดีครับพอได้ใช้หนี้ใช้สิน
อุปสรรคปัญหาในการปลูกแตงโม
ปัญหามากมายในการปูกแตงโมเห็นอั่นได่กะเอามาสู่พี่น้องเบิ่งครับ อธิบายด้วยภาพกะแล้วกัน
โรคใบไหม้เถาตายเกิดจากทั้งเชื้อโรคและเพลี้ยแมลงกะยังเกิดให้เห็นอยู่เป็นหย่อมๆ จำเป็นต้องกำจัดแต่แรกด้วยยาเคมีต่างๆ
เต่าทองเต่าแดงเห็นอยู่เต็มสวนแต่ช่วงนี้บ่ต้องกำจัดครับเพราะถึงเวลาเก็บเกี่ยวผลแตงโมแล้ว
ปัญหาของหนูมีอยู่ทั่วทุกวงการ ในรูปนั้นคือผลงานของหนู บ่เป็นหยังเพราะหนูสร้างความเสียหายเพียงเล็กน้อย
ไฮ่หนูขั่วใส่แตงโมอ่อนคือเมนูในมื้อฉลองความสำเร็จหลังขายแตง
สิ่งที่ได้มากกว่าลูกแตงโม
ในขณะเฝ้าสวนแตงกะขุดแปลงกล้าเบี้ยผักปลูกผักปลอดสารเลี้ยงปลาในกระชังไปนำเป็นการประหยัดค่าใช้จ่ายในครัวเรือน
ลูกชายเจ้าของสวนแตงลาออกจากงานที่กรุงเทพขึ้นรถตู้กลับบ้านลงหน้าเถียงนามาตั้งหลักใหม่ที่บ้านเกิด
แล้วเสร็จจากแตงโมเพิ่นกะสิลงแตงกวาอีกงานหนึ่งครับ ขอให้รวยๆ
ชาวสวนบ่นิ่งนอนใจนอกจากการช่วยเหลือโตเองด้วยยาอินทรีย์เคมีแล้วเพิ่นกะยังต้องพึ่งลูกเทพ
ในรูปเป็นเทพอินคาครับ ฮ่าๆ เทพหญ้าคา
หุ้นไล่กาเดี่ยวนี้หาเบิ่งยาก ผมมาเห็นแล้วกะประทับใจ มีความสุขกับการมาเบิ่งมาศึกษาการการเกษตรต่างๆ ประทับใจ
กับบรรยากาศยามเช้าแลงนำท่งไฮ่ท่งนาและหลายๆ ภาพที่เห็น มีความสุขดีครับ ขอบคุณผู้อ่านทุกๆ ท่าน
เป็นอีกทางเลือกหนึ่งที่น่าลองเบิ่ง คันบ่อได้ผลคือเผิ่น กะพอได้กินเอง แบ่งพี่แบ่งน้องไป
ขอบคุณอ้ายทิดจ่อย ลองไป่น้อครับหรือว่าขายจนรวยแล้วน้อ
น้องชายกับหลานมายามกะเลยพามาเบิ่งไร่แตงโมของพี่จันทร์จ้าวเก่า
ภาพบ่ค่อยชัดย่านคนหรือย่านแสงบุ๊ชัมซุงน้อยอันเก่า กะดาย
ปีนี่เพิ่นปลูกถัดจากที่แปลงเก่าครับ ปีที่แล้วเพิ่นปลูกแปดไร่สอบถามว่าได้กำไรไร่ละเกินหมื่นนิดหน่อยครับ
ส่วนสวนที่ติดถนนทางลูกรังกะว่าได้กำไรไร่ละหมื่นคือกัน แต่ปีนี่แตงโมเพิ่นบ่ปานได่ครับ หน่วยน้อยหลาย
พี่จันทร์หรืออ้ายจันทร์คนบ้านโคกเมือง ปราสาทเมืองต่ำ จังหวัดบุรีรัมย์
ผมว่าผลงานการปลูกแตงโมของอ้ายเพิ่นอยู่ในขั้นดีทีเดียวสิได้มาเฮียนคูนำเพิ่นยุ่คึดว่า
ปีนี่เพิ่นปูกสองแปลงครับ แปลงในรูปที่เห็นเป็นการปลูกแบบน้ำราดหรือปล่อยน้ำไปตามร่องบ่ต้องคลุมผ้าพลาสติก
ไถดินแบบเป็นก้อนโข่โหล่เข่เหล่แบบบ่เรียบร้อยเพิ่นบอกว่าให้มือแตงมีที่เกาะว่าซั่น
แตงโมกะให้ผลผลิตดีในระดับหนึ่ง ราคาขายปลีกตกลูกละหกสิบถึงร้อยบาท คิดเป็นกิโลกะอยู่ประมาณ
กิโลละสิบห้าบาทสำหรับแตงโมเหลืองสายน้ำผึ้ง
ปีที่แล้วบ่ได้กินแตงโมเพิ่น ปีนี่ชิมแล้วเหมาเพิ่นสองเข่งครับ เข่งละ 250 บาท นับได้สิบสี่หน่วย หน่วยละสองถึงสามโล
คิดเป็นราคาต่อกิโลกรัมกะตกประมาณกิโลละ 7 บาทนิดๆ แตงโมแดงที่ตลาดไทราคาอยู่ราวๆ กิโลกรัมละสิบห้าบาท
ที่โลตัสสิบห้าถึงยี่สิบบาท แตงโมเหลืองยุ่โลตัสกิโละสามสิบห้าบาท แตงโมไร้เมล็ดเกินสี่สิบห้าบาทต่อกิโลกรัม
แตงโมจากไร่ของพี่จันทร์รสชาดหวานกรอบชิมแล้วให้ความรู้สึกดีครับ กิโกรัมละเจ็ดแปดบาทเข่าท่าดียุ่
ป้าสงบมาซื้อร้อยนึ่งเพิ่นเก็บให้หกหน่วยครับ ป้าเพิ่นดีใจบอกว่าได้เยอะเนาะถ้าซื้อที่อื่นไม่ได้ขนาดนี้นะ อึ่มครับ
ร้อยบาทได้แตงโมหกลูกครับประมาณยี่สิบโล
ไผผ่านไปผ่านมาหรือมาเที่ยวปราสาทเมืองต่ำปราสาทเขาพนมรุ้งกะแวะมาชิมมาซื้อที่แผงหรือที่ไร่ได้เด้อครับ
แตงโมพี่จันทร์บ้านโคกเมือง ต.จรเข้มาก อ. ประโคนชัย จ. บุรีรัมย์ หรือปราสาทเมืองต่ำนั้นละครับ
หมู่บ้านนี้เพิ่นสิปลูกแตงโมหลังทำนากันหลายเติบนึ่งพุ้นละและเริ่มเก็บผลผลิตช่วงกลางเดือนกุมภาพันธ์เป็นต้นไป
หรือพี่น้องท่านได่อยากหันมาปลูกแตงโมเป็นอาชีพเสริมหลังการทำนากะสอบถามหรือขอคำปรึกษากับอ้ายเพิ่นได้
ขออนุญาติอ้ายบ่าวคนเดิมลงเบอร์โทรอ้ายจันทร์เพิ่นเด้อครับ กะคือเก่าละบ่มีผลประโยชน์อิหยังนำเพิ่นดอก
แค่ทำหน้าที่เป็นนักข่าวไทยบ้านยามมีโอกาสหาข้อมูลมาให้พี่น้องชาวไทยผ่านทางหน้าเวบบ้านมหา
โซคดีอย่างหมานกะสิได้กินบักโมหน่วยปลายฟรีนำเพิ่นหน่วยสองหน่วยส่ำนั้นละ
เบอร์ 082 205-0402 เด้อครับ สำหรับผู้อยากไปซื้อมากินกะลองโทรถามเบิ่งก่อน ผู้จัดทัวร์กะดี
ปล. ลดขนาดภาพ
แก้ไขครั้งสุดท้ายโดย หนุ่มลาวสาวขะแมร์; 02-06-2018 at 11:08.
ขนแตงโมไปฝากป้า
ต้นปี 2561 ที่ผ่านมาบ้านพ่อตามีชาวสวนแตงโมจากทางอำเภอบ้านกรวดละหานทราย
มาเช่าที่นาปลูกแตงโมในราคาไร่ละสามสี่ร้อยในเวลาสองสามเดือน
เบิ่งแล้วผู้ปลูกมีต้ะเซียนฝีมือระดับท้อบเท็น ใบแตงเถาแตงเขียวงามเป็นตาเบิ่งเป็นตาออนซอนครับ
ช่วงเพิ่นเริ่มเก็บแตงสบจังหวะผมกลับไปจ่ายเงินค่าที่นานิละครับคันจำบ่ผิด
เลยเลาะป่าแตงเพิ่น ป่าแตงรวมหลายร้อยไร่ครับเพราะใกล้ๆ กันนั้นเป็นหนองน้ำชุมชนที่ทางการพึ่งมาขุดลอก
ทางผู้นำท้องถิ่นเพิ่นเลยเอ่ยชวนเกษตรกรชาวสวนแตงให้เข้ามาปลูกแตงตรงบริเวณดังกล่าว
จุดประสงค์เพื่อเป็นตัวอย่างเพื่อกระตุ้นชาวบ้านเกษตรกรในชุมชนให้ได้ศึกษาเรียนรู้อาชีพอื่นๆนอกเหนือจาก
การทำนาเพียงอย่างเดียว โดยผู้ปลูกได้มาเช่าที่นาของชาวบ้านในราคาไร่ละสามร้อย เท็จจริงประการใด
ผมได้ยินมาแบบนั้นกะเว้าไปตามที่ได้ยินมา
ผมไปเลาะป่าแตงไปอ่อเซาะกินแตงนำเพิ่น
อ่อเซาะแปลว่า บ่มีตังซื้อแต่เห็นคนอื่นกินกะอยากกินนำเพิ่นยืนแนมเพิ่นกิน เว้าตามภาษาทางบ้านผม
เพิ่นสิเคียงตาละว้าเพิ่นเลยเอิ้นกินนำ ชิมแล้วโอ้บักแตงหยังมาหวานคัก บักแตงโม ครับฮู้อยู่ว่าบักแตงโต
ถามไปถามมาว่ามารับจ้างเหมาแบกแตงขึ้นรถตันละสองร้อยห้าสิบบ้อ ส่อเพิ่นและจดไว้ยามสิใช้จักเสียใสซ้ำ
หลายๆคนซ่อยกัน รถคอกเพลาลอยคันหนึ่งตกสี่ตันกำเงินพัน
แตงโมขนาดสามสี่โลเก็บจากไร่กว่าๆ ได้เต็มคอกวีโก้ตอนเดียว ยังเหลือหน่วยสองโลและหน่วยปลายอีกเต็มไฮ่
ยอมรับว่าสวนนี้ปลูกแตงได้ดกคัก เทียบกับที่ผมซอมมาสองสามปี เจ้านี้ฝีมือการปลูกถือว่าระดับตัวพ่อครับ
คนงานเก็บแตงพากันทดสอบคุณภาพของแตงโดยคัดเอาหน่วยที่ใหญ่ทรงผลดีผิวดีและเสียงดี
เพิ่นว่าลองเบิ่งว่าดินน้ำอากาศทางนี้สิดีบ่และฝีมือการปลูกของผู้ปลูกยังคงเส้นคงวาอยู่บ่ สงสัยนำกันมาหลายปี
บักแตงโมแตงโมกินรี 188 โอเว่อร์ไซด์ขนาดหกโลปาดออกเนื้อดีเนื้อทรายแดงจ่ายว้ายและหวานดีคักบ่เลี่ยน
ช่วงเก็บแตง ทั้งรถกระบะรถหกล้อ รถฟอร์จูนเน่อร์ของเฒ่าแก่หลั่งวึ้นๆ เต็มท่งนาป่าแตง บางเฒ่าแก่มานอนเฝ้า
ช่วงหลังปีใหม่ปีนี่ตามชาวสวนแตงเพิ่นเว้าให้ฟังเพิ่นว่าปีนี่ช่วงนี้แตงตายราคาสิได้จักบาทบุ๊ถึงสี่บาทซ้ำบ่
คนปลูกแตงหลายคักครับเลยทำให้แตงล้นตลาดตามเพิ่นว่า
เห็นกองบักแตงเพิ่นบ่ขนขึ้นรถเลยถาม แตงซุมนี้คือบ่ขนขึ้นรถนำหมู่ละครับ อ๋อซุมนี่แตงปัด อิหยังครับแตงปัด
เพิ่นเหลียวเบิ่งหน้า แตงคัดออกแตงพ่อค้าบ่เอา มันคือหน่วยงามๆอยู่ละครับมีตำหนิหม่องได๋ เพิ่นชี้ให้เบิ่งนี่เด
เปลือกแตงมีรอยหนอนแทะด่างหน่อยเดียว บางลูกเบี้ยวบ่ได้รูปทรงเล็กน้อย เบิ่งแน่นี้แค่นี้เขากะบ่เอาให้ข่อยเด้
ปีนี้ขายแตงยากคัก แล้วเฮ้ดจั่งได่ละครับบ่เป็นคันรถพุ้นติที่เห็นเป็นสิบๆกอง กะพุ้นแหล้วขายโลสองบาท
เอาไปขายตี้ละเจ้ามีหม่องขายบ่ มาเอาไปขายให้นำแน่ ฮึบักโมสุกโลสองบาท อยากได้อยู่หั่นแล้วครับ
อยากได้กะมาเอา ครับมื้อผมสิเมียพุ้นละมื้ออื่นมื้อหนึ่ง สิมาเอาจักพันเงินยุ่สิเอาไปฝากพี่น้องทางรังสิต
ขอซื้อเพิ่นสองหน่วยพอได้มากินบ้านเพิ่นเก็บให้เป็นหาบจนได้กลับมาเอารถยู้ไปเข็น
ผมเอารถไปขนแตงตอปิโดปัดกิโลละสองบาท ซื้อเพิ่นพันหนึ่งเพิ่นทั้งขายทั้งแถมได้เจ็ดร้อยโลบ่เต็มดากรถ
เหลือเงินสองร้อยตื่มให้เพิ่นเป็นพันสอง ได้แตงโมตอปิโดกินรีเป็นตันจนพูนท้ายรถ
ย่างเลาะเบิ่งป่าแตงเลาะเบิ่งนาพี่น้องจ้ายฝั่งนี้ ดินดีคักเป็นครับเป็นดินร่วนปนทราย ดินแบบขุดปูยามแล้งได้กิน
ผมคิดว่าเป็นเหตุผลหนึ่งที่ทำให้การปลูกแตงได้ผลผลิตต่อไร่หลาย
ขนบักแตงโมไปแลกบักม่วงกะล่อนกับผักกุ่มดองกับลุงป้าทางประโคนชัย
มาแวะยามพี่น้องทางบ้านน้อยอุบลบ้านขลุงไผ่ โนนสุวรรณ แจกพี่น้องแจกนักเรียนแล้วแตงยังบ่บกจากดากรถ
ย่ายพี่น้องนำทางเติมน้ำมันกะแจก แวใสกะขนลง มาถึงโรงงานไล่แจกพี่น้องจนเบิดรถ
ไผได้กินกะว่าแตงแซ่บหวานดีคัก บ่มีไผว่าหน่วยขี้ล่ายจักคน ปีหน้าสิได้นำจอบเพิ่นอีกยุ่
เจ้าของป่าแตงนี้ซื่อพ่อใหญ่กล้า เซียนแตงกล้า บ้านกรวด สายตรีแปดเด้อครับไผอยากปลูกแตงไปถามเอา
มาโล้ดมาสิพาปลูกบ่หลุบดอก เพิ่นซวนครับ เฉพาะเพิ่นเองเช่าที่นาห้าสิบไร่ปลูกแตงโมกินรีกับแตงโมตอปิโด
แตงโมเหลืองบ่ปลูกเพิ่นว่ามันขนย้ายยากกว่าแตงโมแดง กะสิหว่างไร่ละหมื่นนิละปีนี้บ่มีเกินนี้ดอก
ปีนี้เพิ่นว่าเมล็ดพันธุ์แตงโมตกกิโลกรัมละหกพันบาท
พอป่าแตงวายยังเหลือลูกเล็กลูกน้อยให้ไทบ้านเจ้าของนาไปเก็บมากินอีกจนหมู่บ้านละแวกนั้น หยึ่งบักแตงโม
ครับข่าวคาวสวนแตงทางอีสานใต้ปีนี้ ปีหน้าสิหามาฝากและมาเว้าสู่ฟังใหม่ครับ
Bookmarks