หน้าที่ 2 จากทั้งหมด 4 หน้า หน้าแรกหน้าแรก 1234 หน้าสุดท้ายหน้าสุดท้าย
กำลังแสดงผล 11 ถึง 20 จากทั้งหมด 36

หัวข้อ: บ้านในฝัน 2

  1. #11
    นักการภารโรง สัญลักษณ์ของ บ่าวคนเดิม
    วันที่สมัคร
    Jan 2006
    ที่อยู่
    Amphoe Det Udom
    กระทู้
    3,148
    เว้าเป็นตะแซ่บแท้ละท่าน...ใส่ภาพยนต์วัว นำยุบ่

    ภาพบ่ขึ้นเด้อท่าน

  2. #12
    ดูแลตรวจสอบเนื้อหา สัญลักษณ์ของ หนุ่มลาวสาวขะแมร์
    วันที่สมัคร
    Aug 2012
    ที่อยู่
    รังสิต
    กระทู้
    558


    หนี้ ธกส


    ครับอ้ายบ่าว

    พ่อตาบ่หมานข้าว ข้าวเต็มยุ้งยังขายบ่ออก แต่ปีนี้เพิ่นพอหายใจทั่วท้องขายยูคาตามคันนาได้ขาดแสนบ่หลายครับ
    ยูคาเป็นราคาตันละพันสามร้อยบาท พาพ่อตาเอาเงินขายยูคาไปเข้า ธกส บ่แม่นไปฝากครับไปตัดดอกและตัดต้น
    หนี้หลายแสนหลายปีมาแล้วแล้งฮัดได้จ่ายแค่ดอก ปีนี้ได้ตัดต้นเป็นปีแรกพอยิ้มออก ไปเห็นบรรยากาศหน้า ธกส
    ประจำอำเภอ อิพ่ออิแม่เอ๋ย คนครับ หลายต้ะผู้เฒ่าคนรุ่นพ่อรุ่นแม่พ่อใหญ่แม่ใหญ่ นั่งตากแดดถ่าเต๊มเดิ่นลาน ธกส
    เขามาทำอะไรพ่อ ธกส เขานัดมามาชำระหนี้รายเดือนรายปีแล้วแต่ บางคนกู้เป็นล้านไปออกรถเขามีที่เยอะก็กู้ได้เยอะ
    ถ้าตัดเฉพาะดอกไม่คืนเงินต้นบ้าง กลุ่มคนที่ค้ำประกันก็ต้องมาเซนต์ให้ด้วยต้องขนกันมา ป้าดเห็นต้ะอิอ้อนยุ่โลตัส
    แถวยาวเหยียดมื้อสิ้นเดือน ธกส แห่งคักปานเอาบุญ เคยได้ยินแต่ว่ายามจ่ายหนี้เงินล้านของหมู่บ้านมีนายทุนไปกางโต้ะ
    จ่ายดอกร้อยละห้าแบบหักดอกทันที ยืมหนึ่งหมื่นได้เก้าพันห้าไปจ่ายคืนเงินล้าน ชำระหนี้ได้บ่กี่มื้อกะกู้กลับมาใหม่
    แล้วกะเอาไปจ่ายคืนนายทุนเป็นอันว่าจกถ่งกะของพันเดียวสำหรับจ่ายคืนเงินล้านแต่ละปี เงินต้นยังเหลือคงเดิม

    ขับรถกลับมาเห็นคะเจ้าเอารถไถดันต้นบักโกใหญ่ล้ม อ้าวพ่อทำไมเขาโค่นต้นตะโก เขาว่าจะทำถนนเข้านานะเห็นว่า
    ปีนี้จะลงอ้อย ทำไมละพ่อ ข้าวไม่มีราคาหลายยุ้งจำนำไม่ผ่าน ข้าวไม่ได้คุณภาพปนเยอะเขาไม่ให้จำนำยุ้งฉาง ฮั่งว่าละ
    เห็นต้นบักโกใหญ่ล้มรากชี้ฟ้า น้ำตาสิไหลครับ คือบ่พากันจ่งไว้ถ่าลูกหลานเบิ่งแน้น้อสิพากันตัดกันโค่นให้มันเบิดทุกต้น
    พุ้นบ้อต้นไม้ในไร่ในนามันแฮ่งหาเบิ่งยาก มันจำเป็นนะไม่ตัดเวลารถเขาไถพรวนดินก็เกะกะแถมเป็นร่มอ้อยมันไม่โต
    ต้นไม้มีกี่ต้นตัดโค่นลงเหมิดต่อไปสิได้อิหยังย้อมแห แล้วกะไปซื้อเขากินไข่มดแดงผักกะโดนส้มผักก่ามฮางมิ้มหมู่นั้น


    มันสิคือบ่น้อว่าอยากกลับมาอยู่บ้านยุ่ซองมาเป็นต้ะคิดยากนำแถะน้อ หนี้สินยุ่กรุงเทพฯยังมีหม่องหาไปเช้าเบิกแลง
    อันนี่แดดแม้บๆ แง้ปอมบ่เห็นพอโตสิไปไล่เอาใส




  3. #13
    ดูแลตรวจสอบเนื้อหา สัญลักษณ์ของ หนุ่มลาวสาวขะแมร์
    วันที่สมัคร
    Aug 2012
    ที่อยู่
    รังสิต
    กระทู้
    558


    หงุดหงิด แหกด่าน


    ขับรถจากรังสิตกลับบ้านจากบ้านกลับกรุงเทพฯ เส้นทางโชคชัยเดชอุดมช่วงแยกสีคิ้วไปแยกปักโชคชัยนางรองหนองกี่
    ด่านอิพ่ออิแม่ ผ่านยามได่มื้อได๋เที่ยวได๋กะพ้อ มันจำเป็นต้องตั้งทุกมื้อปานนั้นบ้อ คันว่ากวดจับยาเสพติดกะอย่าจับ
    อย่างอื่นตี้ละ เกาะกระแสพ่อใหญ่เกรียงไกร ไทยอ่อน ผมทำงานเบิดปีเบิดซ้าดเสียภาษีให้รัฐแต่ละปีบ่หน้อยบาท
    มีวันหยุดบ่หลายมื้อฟ้าวขับรถกลับบ้านยามพ่อยามแม่ไปมายามได๋กะถึกจับ ก็คุณขับรถเร็ววิ่งขวา กะแล่นขวาตั้ว
    เที่ยวก่อนผมแล่นซ้ายตลอดตกหลุมแถวหน้าลานมัน หลายมื้อให้หลัง บร้ารถคือเสียงดังแท้ยางหน้าเป็นบั้งจั่งขวานถาก
    พวงมาลัยกะจอบต้ะสิลงข้างทางได้ดึงไว้ตลอด ไปเข้าร้านยางยุ่รังสิต รถพี่โช้คหน้าแตกคะ ตั้งศูนย์ไม่ได้ถึงได้ก็ไม่ดีนะ
    ได้เสียเงินเปลี่ยนโช้คหน้า ยางเป็นบั้งเป็นแข่วตั๊กแตนมิชชินลินริงการ์ดอย่างดี หลาบแล้วครับแล่นซ้ายทางดีอิหลีค่อยไป
    พี่วิ่งเกินความเร็วกำหนดนะครับ อ้าวผมกะขับตามหลังเขามาเด้ละ ผมเคยตามก้นรถหลวงสามสี่คันร้อยยี่ลิ่วๆ บ่ผ่อนจั้กเที่ย
    แล้วกะบ่พอใจเป็นอย่างยิ่งครับทำงานเฝ้าโรงงานจ่ายภาษีบุคคลเต็ม ขับรถไปยามบ้านเห็นกล้องข้างพุ่มไม้ส่องแนมหน้า
    ข่อยบ่แม่นโจรเด้อต้ะเกิดมาบ่เคยสูบม้าสูบยาจั้กเทื่อบ่เคยลอง มาส่องแนมหน้ากันปานเฮาเป็นโจร บ่พอสองกิโลรถชลอ
    มีกรวยตั้งควักมือให้เฮาไว่ๆ บอกให้เฮาเข้าข้างทาง หลายเทื่อที่ผมชลอเข้าข้างทางแล้วผมกะบ่จอดหล่อยต่อเลยละครับ
    อารมย์ความรู้สึกตอนนั้นมันบ่ไหวอิหลี นำมาโล้ดข่อยบ่มียาเสพติดดอก เพิ่นกะบ่นำดอกครับสุ่มื้อนี่รถเต็มถนนแล้วกะบ่มี
    รถคันได๋แล่นต่ำกว่าเก้าสิบจั้กคันขั่นแม่นรถทางไกล โบกจนบ่มีหม่องสิจอดด่านได่กะดาย มื้อนี่นางรอง มื้ออื่นหนองกี่
    บางมื้อเจอสองด่านพร้อมกันก่อนสี่แยกโชคชัยผ่านไฟแดงไปเจออีก เอ๋า บ่พากันเว้ากันติ

    กับอีกซุมหนึ่งพวกมักแสดง ฟ้าวกว่าบ้านกว่าเมืองเขา ขับรถบ่เบิ่งบ้านเบิ่งเมืองบ่เบิ่งคนอื่น เขาแล่นร้อยกะแล่นนำเขาตี้
    ตัวเองมาทีหลังต้องตามก้นเขาไปบ่แม่นแซงปาดหน้าปาดหลังไผเขากะขับเป็นทุกคนนั้นละรถไผเขากะมีเงินซื้อดอกซ่ำรถ
    ที่ผ่านมาผมรู้จักคนที่ซื้อรถเงินสดเพียงสองคนคนหนึ่งในที่ทำงานขายที่ดินได้ครับอีกคนหนึ่งกะคือพี่เขยคนที่ว่าแต่แรก
    ใช้แคมรี่ไฮบริดมีอีกคนอยู่บ้านออกเงินสดแต่เอาที่นาไปกู้ ธกส มา ที่สระบุรีฟอร์ดแรนเจ้อสี่ประตูสีแดงป้ายแดงแสดงคัก
    ล่อนไปเบิดเทิงสามเลนจนคันอื่นเขาหนหวย แล่นขวาลิ่วๆ ไปกับมาสด้าสามป้ายแดงคือกันไปพ้อรถพ่วงยูเทินกระทันหัน
    แถวแยกภาชีหินกอง พากันเบรคจนดากเงิงป้ายแดงสองคันปัดออกซ้ายออกขวาสิเบียดเข้าเลนผมบ่ให้เข้า จากแยกภาชี
    จนสิฮ้อดรังสิตถ่าให้แซงกะบ่เห็นแซงจั้กเทื่อแล่นแค่ร้อยเดียว ก่อนหน้านี้คือบ่พากันย่าน

    เดินทางเที่ยวได๋กะหงุดหงิดครับ หลักๆ กะหงุดหงิดกับตำรวจตั้งด่านนี่ละแล้วกะหงุดหงิดกับพวกบ่มีมารยาทในการขับขี่
    ทางสามเลนแล่นห้าเลน เลิกใช้มันซ้ะบ้อรถนิ บ่ต้องไปใสมาใสอยู่กับบ้านบ่ต้องไปเที่ยวไปกินใสสิบ่ประหยัดปานหยังติ




  4. #14
    ดูแลตรวจสอบเนื้อหา สัญลักษณ์ของ หนุ่มลาวสาวขะแมร์
    วันที่สมัคร
    Aug 2012
    ที่อยู่
    รังสิต
    กระทู้
    558

    เจอแต่คนรู้ไปหมด





    เห็นบักโมข้างทางอดบ่ได้คิดฮ้อดคนที่รู้จักคนที่ทำงานนำกันจอดซื้อหรือไปซื้อยุสวนไปฝาก มาฝากแล้วผัดว่าแตงไม่แดง
    แตงไม่หวาน แตงแบบนี้แถวบ้านก็ปลูกแถวบ้านสามลูกร้อย เอาอิหยังไปฝากกะมีต้ะแนวติอยู่บ้านมีทุกอย่างเลยละเพิ่นว่า
    แต่บ่เคยได้กินนำเพิ่นจั้กเที่ยดอก บ้ะ สิได้เซาเอามาฝากต้ะมื้อนี่เป็นต้นไป เงินเฮาซื้อรถเฮาขนแรงเฮายก
    เหลือต้ะบ่ทันป้อนใส่ปากปานนั้นกะบ่พากันญ้องอย่าสะได้กินอีก ไม่ได้กินอีกหรอก

    เฮ้ดงานนำกันป่อมๆ พี่เมื่อไหร่จะเลี้ยงซักที กินยามได่กะมีต้ะเฮาเป็นผู้จกผู้จ่าย มีเงินเดือนคือกันแต่จ้องสิกินต้ะของฟรี
    ก็ผมเงินไม่เยอะเท่าพี่พี่ลูกเต้าก็ไม่มีตังค์เหลือเยอะอยู่แล้ว ยามกินบ่อยากจกบาดซื้อเลขงวดชนงวดผัดพากันมีจ่ายเด้ละ
    เอ ฮู้จักคนหลายซื่อๆ แต่มันเผิงไผบ่ค่อยได้ตั้ว ซ้ำบ่หนำเสียหลายกว่าได้อีก หมู่ฮักแพงกันยืมเงินได้แล้วเปลี่ยนโทรศัพท์
    หนีปั๊บไปไล่เอานำหางแง้พุ้นบาดเนี่ย เสียหมู่พวกคนรู้จักไปบ่หน่อยจากเรื่องเงินๆ ไปแฮ่นๆ โชว์กินซาบูยุ่หน้าเฟสแต่
    เงินบ่คืนเฮา พ้อต้ะเก่งๆ ค่องๆ เนาะ ผลาบ้อ

    อีกซุมหนึ่งเว้าหยังขึ้นซ้อดปั้ดๆ ฮู้จักนำเขาทุกเรื่อง พระดีอยู่ใสวัดได่รุ่นได๋หลวงพ่อได่ เว้าเรื่องเกษตรเฮ้ดไฮ่เฮ้ดสวน
    พู้นแบกบักจกออกมาจากท้องแม่พุ้น เมื่อก่อนแถวนี้เป็นทุ่งนาหมดแหละ โอ้ยปลามีแต่ตัวใหญ่ๆ สวิงช้อนเลือกเอา
    หนูนาเอากระสอบปุ๋ยกับไม้ท่อนเดียวตั้งเตารอเลย เว้าเรื่องหมอเรื่องเจ็บป่วยกะฮู้จักเบิ้ดเฮาละบ่ได้อ้าปากนำจั้กเทื่อ
    เป็นไข้นะรีบไปเลยไปหาหมอเลย หมอนั้นหมอนี่ โรงบาลแพทย์ฯภูมิพลหมอดีมากวันเดียวหาย หมอซื่อหยังจำได้เบิด
    เว้าเรื่องรถยังบ่ทันได้ขับต้ะรถถัง เว้าเรื่องเครื่องบินไล่มาเบิดผ่านบ้านผมหมดทุกลำ แจแปน มาเล เดลต้า เอเชีย นก
    เฮ้ดงานนำกันมาซาวปีปีได๋กะต้ะคาแรงขั้นต่ำ แม่งปีนี้ขึ้นห้าบาทจะพอแดกหรือวะ รถกะรถเมล์มอไซด์ ปลากะได้ซื้อกิน
    พี่แถวบ้านมีปูนาหนูนามั้ยเอามาฝากมั่งดิ พี่ยืมตังค์ร้อยพรุ่งนี้คืนห้อยพระเต็มคอจั้กสักแขนจั้กเจาะหู



    แก้ไขครั้งสุดท้ายโดย หนุ่มลาวสาวขะแมร์; 08-04-2017 at 14:25.

  5. #15
    ดูแลตรวจสอบเนื้อหา สัญลักษณ์ของ หนุ่มลาวสาวขะแมร์
    วันที่สมัคร
    Aug 2012
    ที่อยู่
    รังสิต
    กระทู้
    558

    เกม


    ผมคนหนึ่งที่บ่เล่นเกมเลย เกมคอมพิวเตอร์เกมมือถือผมบ่เล่นครับ ผมว่าบ่จำเป็นต้องเล่นเพราะรอบตัวเฮาเต็มไปด้วยเกม
    ลืมตาขึ้นกะพบกับเกมแล้ว เล่นเกมอยู่ในบ้านสามีภรรยา สิหาวิธีเอาเงินจากกระเป๋าเมียได้ด้วยวิธีได๋ สิซ่อนเงินเมียไว้ใส
    เมียถึงสิหาบ่เห็น ถ้าท่านบ่มีความสามารถที่สิซ่อนเงินเมียได้บ่ต้องไปเล่นเกมดอกครับเล่นไปกะแพ้ รอบตัวเฮามีต้ะเกม
    แม่นบ่อยากเล่นเขากะบังคับให้เฮาเล่น เขาบ่ได้บังคับแบบเห็นๆ ผมว่าทุกคนในโลกต่างกะตกอยู่ในเกมของกันและกัน
    มีหนังหลายเรื่องเกี่ยวกับเกม ปล่อยให้นักโทษประหารเข้าไปในสังเวียนแล้วกะกระซิบทุกคนว่าจะมีคนชนะเพียงคนเดียว
    ที่จะรอดออกมาได้พร้อมกับถุงเงินใบใหญ่ สุดท้ายกะมีผู้ชนะหอบถุงเงินออกมาพอเปิดประตูออกมากะมาเจออีกคนหนึ่ง
    นอนกอดถุงเงินจนจ่อยโซเหลือแต่กระดูก ออกจากประตูชั้นแรกได้แต่มีประตูอีกชั้นหนึ่งยังปิดไว้ ฆ่ากันจนตายเรียบ
    สุดท้ายกะยังตกอยู่ในเกมของเขาคือเก่า มีคนจิบกาแฟจอบเบิ่งอยู่ข้างนอกเออไอ้นี่มันเก่ง เอาตัวมันไปขายว่าซั่น
    มีหนังหลายๆ เรื่องที่เบิ่งแล้วสะท้อนให้เห็นว่ามีคนหลายคนที่เป็นหมากเป็นเบี้ยอยู่ในเกมของคนบ่กี่คน

    ผมบ่เล่นเกมของไผถ้าสิเล่นกะต้องเป็นเกมที่ผมคิดขึ้นมาเองแล้วผมกะบ่เก่งปานนั้นสุดท้ายผมกะบ่เล่นเกม ในที่ทำงาน
    ซอมเบิ่งดีๆ ล้วนมีต้ะเกมครับเกมการชิงดีชิงเด่น เกมการเอาตัวรอด เกมการดิ้นรนต่อการเอารัดเอาเปรียบจากนายจ้าง
    เกมการดิ้นรนการเอาตัวรอดจากค่าครองชีพ เกมที่กดให้คนรากหญ้าบ่สามารถลุกขึ้นมาได้ เดือดร้อนหลายลำบากหลาย
    หนี้สินล้นตัวกะเบิดอำนาจต่อรอง ชำระแค่ดอกก็ได้นะคะจะได้สบายกระเป๋าแฮ่งมักคันเขาว่าแบบนั้นยี่สิบปียังผ่อนบ่เบิด
    บ้านหลังเดียว แทนที่สิฟ้าวผ่อนฟ้าวแล้ว บ่ได้ต้องแบ่งเงินไว้ไปเที่ยวเดี่ยวบ่มีแนวโพสท์อัพเดทนำเขา ไปตั้วตลาดน้ำ
    เกิดขึ้นเป็นดอกเห็ดของเพิ่นแพงคืออิหยังนิลูกชิ้นปลาเยาวราชแปดสิบบาทได้หกไข่ ไปกางเต้นทะเลหมอก ไร่ทานตะวัน
    ไปน้ำตก ไปทะเล กว่าสิฉุกคิดได้ละลายเงินเบิดไปหลายหมื่นเผลอๆ ซื้อบ้านได้อีกเป็นหลัง ผมกะเป็นคือเพิ่นทำงานได้
    แทนที่สิฟ่าวใช้หนี้ให้เบิดเหลือเก็บหอมรอมริบไว้ซื้อที่ซื้อนา นี่ละตกไปอยู่ในเกมกระตุ้นเศรษฐกิจของเขาเหมิดออดหลอด

    ในที่ทำงานเหลียวเบิ่งไผกะยากต้ะนำเล่นเกม พากันเล่นไพ่ละครับส่วนหลายจั่วรัมมี่กันบางมื้อดวงดีชนะได้หลายหมื่น
    พุ้นเด้ เก่งคัก งวกมาเบิ่งของจริงได้มื้อสามร้อยเกมชีวิต ออกประตูโรงงานไปพ้อเกมยาดองข้างทางล่อไว้อีก มามาเพื่อน
    เขาซวนเล่นเกมยาดอง เมาแล้วเต็มที่เซนต์ลูกเดียวมันสิแพงซ่ำเหล้าแบล๊กบ่ยาดองซื่อๆ รินมาเพื่อนกับบักยมน้อยดอง
    ถึกกันคัก ฮ้อดบ้านสี่ทุ่มไปขอค่ามอเตอร์ไซด์รับจ้างกับเมีย เมียดึงหูตื่มให้อีกเกมชีวิตจริงเอาชนะอิหยังกะบ่ได้จั้กอย่าง
    เงินออกค่าดอกเงินกู้ค่าหวยค่ายาดอง เหลือสองร้อยกะว่าหลายคักแล้ว




  6. #16
    ดูแลตรวจสอบเนื้อหา สัญลักษณ์ของ หนุ่มลาวสาวขะแมร์
    วันที่สมัคร
    Aug 2012
    ที่อยู่
    รังสิต
    กระทู้
    558

    เงินน้อยอยากกินเยอะ ตลาดไทยชวนชิม


    ทีมงานเทียวถามพี่เมื่อไหร่จะเลี้ยง เอ๋าเลี้ยงอะไร เลี้ยงซีฟู๊ด มีต้ะซองผ้าป่ามัดนึ่งกับผักขี้เหล็กต้มนั้นละอยู่ในช่องฟิซ
    งั้นมาคนละสามร้อยผมออกโซดาน้ำแข็งและสถานที่ จะดีหรือพี่ผมเกรงมันจะไม่อร่อยนะซิ มาล้วงมา เงียบกริบ
    เอ้าๆ จะกินก็จดรายการมาเลิกงานจะได้รีบไปตลาดไท กินแล้วแล่งซองผ้าป่าไปแจกให้ผมด้วย





    ได้งบผู้ละพัน โตสองคนลงไปซื้อแนวที่โตสิเอาเฮาสิไปเบิ่งบักถั่วดินต้มทางพุ้น ปล่อยทีมงานลงหน้าตลาดสดตลาดไท
    ผมไปเลาะทางพืชฝักได้บักถั่วดินฝักใหญ่ต้มห้ากิโลสองร้อยห้าสิบแล้วกะข้าวโพ้ดซุบเปอร์ไฮบริดสดๆพึ่งลงฝักใหญ่ๆ
    มาจากใสละครับ ข้าวโพดจากกาญจ์คะ พันธุ์อะไรครับ ไฮบริดคะ โฮ้พันธุ์เดียวกันกับรถแคมรี่ ถุงละร้อยสิบครับ
    เขียวสดดีคัก เอาถุงนึ่งครับ แตงโมแดงขนาดใหญ่สุดลูกละหนึ่งร้อยบาทครับ เบิดไปห้าร้อยมาเลาะเบิ่งปลาสดน้ำจืด
    ถ่าสองคนนั้น ปลาช่อนขนาดพอต้มส้มกิโลละเจ็ดสิบบาทครับ บ่มาจากโตนเลสาบกะมาจากทางสุพรรณละคือ
    ปลาช่อนยังบ่เอาถ่าให้ถูกกว่านี้ก่อน ได้ของเต็มท้ายรถตามต้องการพร้อมเงินทอนร้อยกว่าบาท แนมหน้าสองอ้าย
    ไปซื้ออะไรทำไมเงินเกือบหมด โฮ้พี่หมูกับเนื้อกับลิ้นก็พันแล้ว หมูเท่าไหร่ คอหมูสามโลโลร้อยยี่สิบ เนื้อลิ้นสองโล
    สี่ร้อยยี่สิบ ปลานิลทางนี้หมดต้องไปข้างในสี่ตัวสามร้อยเก้าสิบเกือบหกกิโล แปดร้อยแปดร้อยห้าสิบแค่พันสองห้าสิบ
    เนื้อต้มอีกปลาหมึกสองโลผักอีกผมไม่ได้ล้วงกระเป๋าใส่ก็บุญแล้ว เอ็งจะไม่จ่ายสักบาทเดียวเลยรึ ก็มันไม่มี บ้ะตอบง่ายคัก
    เลี้ยวเข้าปากซอย พี่เอาน้ำแข็งไปด้วย ร้านนี้ๆ อ้าวก็ลงไปซิ ก็ตังค์ละมัดจำถุงด้วยยี่สิบเป็นเจ็ดสิบห้าคราวก่อนก็มัดจำ
    สองพันห้าเกลี้ยงมินลิ่น แล้วจะไปกินกับอะไรกินกับน้ำเปล่านิ เดี๋ยวผมให้พี่อีกคนเขารับผิดชอบ บ้ะอ้ายนี่แต่งปั้บๆ





    มาฮ้อดปูสาดกลางเดิ่นฟ้าวคัว หมักคอหมูหมักลิ้น บ่มีสูตรดอกครับก๋าใส่หม่องมักเอาโล้ด ซอสรสดีแถมผงนัวหลายๆ
    หมอหนึ่งขอเช้กเนื้อว่ามันสดจริงบ่ เนื้อเขาพึ่งลงนะพี่ ซื้อดีแท้ใส่ถ่งน้อยมาพร้อม หย่ำแล้วละโอเคพี่เชฟจากกุมภวาฯ





    ไฟเป็นถ่านแต่คอหมูกับลิ้นยังบ่เข้าเครื่องย่างข้าวโพดเล่นไปก่อน ข้าวโพดร้อยสิบบาทได้ยี่สิบฝักตกฝักห้าบาทห้าสิบ
    แต่ละฝักขนาดเท่ากันกับขวดลีโอ





    ไผหิวกะกินข้าวโพดจี่ไปก่อนครับ ข้าวโพดสดๆ เปลือกยังบ่เหลืองบ่แก่หวานดีคักบ่ต้องจุ่มน้ำหวาน





    พร้อมกันนั้นกะย่างปลานิลไปนำ ปลานิลโตใหญ่สุดๆ โตละเก้าสิบกว่าบาทหนักประมาณโลสามโลสี่
    เตาว่าใหญ่เติบปลาใหญ่กว่า กินเบิดบ่ละซื้อมาฮ้อดสี่โต ควักขี้ยัดตะไคร้โรยเกลือบรบือถุงละบาท





    สมาชิกเริ่มมาเอาลิ้นใส่เตาก่อนเดี่ยวสิมืด เนื้องัวหรือลิ้นงัวยุตลาดไทรังสิต เนื้องามๆ มื้อนี่กิโลละสองร้อยสิบบาทครับ
    มีซาวกว่าเขียงอยากได้ต่อนได๋เดินเลือกชี้เอา ผมยางสามหลบหาเอาต้ะต่อนสีชมพูๆ ส่วนที่เป็นไขแม่ค้าปาดออก





    ลิ้นงัวหลังหมักซอสผงนัวถึกไฟแล้วเหลืองงามเป็นต้ะกินคักแต่บ่ฮู้ว่ารสชาดสิฝีมือบ่





    ถ่านไฟไม้ยูคามาจากบ้านฮงดียุ่ เมนูไล่กันมาคอหมูย่างครับ ซื้อมาสามโลก๋าให้ถึกผู้เคิ่งโล





    ปลาหมึกสดหรือบ่สดอย่าไปสนใจเถาะเฮาอยู่ไกลทะเลตั้งใจซื้อมากินแล้วอย่าคิดหลาย ก่อนกินล้างให้ดีแล้วปิ้งไฟให้สุก
    คือเล่งไฟแถะละทิด ยุงหลายโพ้ดอ้าย ยุงหยังยามแล้งมียุงยุ่ติ บ่แม่นยุงบ่มีคนเติมน้ำแข็งให้หมอ ใจฮ้ายซุกถ่านใส่ไว่ๆ





    ตามมาด้วยค.ว.ยน้อยเกียกตมเนื้อบ่ติดมันขมพอดีๆ เข้าท่า หมอนี่เฮ้ดแนวกินเป็นทุกอย่างอีหลี คือบ่มีเมียละหมอ เขาป๋าครับ
    ย่างไปเปิดเพลงผัวเก่าให้อ้ายพ่อครัวแกล้มเหล้า อีกผู้นึ่งว่าไม่ต้องเปิดๆ รบกวนข้างบ้านเขา เอ๋าอีกละ



  7. #17
    ดูแลตรวจสอบเนื้อหา สัญลักษณ์ของ หนุ่มลาวสาวขะแมร์
    วันที่สมัคร
    Aug 2012
    ที่อยู่
    รังสิต
    กระทู้
    558

    เงินน้อยอยากกินเยอะ ตลาดไทยชวนชิม 2


    น้ำจิ้มปลาเผาซีฟู้ดคอหมูย่างตั้งซ่ายล่ายปานน้ำจิ้มโต้ะจีน มักแบบได๋รสชาดแบบได๋กะตำเอาปรุงเอาบ่มีสูตรสำเร็จ
    ต้ะกินมาว่าแม่นหลายเทื่อแล้วบ่ทันเข้าแก้บจั้กเทื่อยุ่ ผู้นั้นกะว่าสูตรนั้น ผู้นี่กะว่าสูตรนี่ งวดหน้าสงสัยสิได้แจกถ้วยน้อย
    ผู้ละใบพริกป่นน้ำปลาบักนาวตั้งไว้คือเครื่องปรุงก๋วยเตี๋ยวไผมักสูตรได๋กะเฮ้ดเอาไผเอามัน ผมมักสูตรสาวอุดรคนไกลบ้าน
    มักเพิ่นเว้าม่วน เมียมักยายหนูนาสวีเดนหยุมตำซั้วผักเป็นปุ้ม อ้ายนึ่งมักสูตรคุณสุ ง่ายๆ บ่มีหยังใส่หลายแซ้บหลายผงนัว
    เพิ่นนึ่งว่าไม่ทำเหมือนยายที่อินเดีย แบบมือหยุมในใบตองนั้นติ บ่ๆ ได้ปลากะแยงมาค่อยเฮ้ดถ้าสิเฮ้ดแบบรมควันคือเพิ่น
    ต้มคือเป็นแบบนี้ละหมอคือบ่ขมคือบ่แซ้บ อ้าวพี่บอกอยากินต้มแซ้บก็นี่แหละต้มแซ้บ บ่ต้มขมๆ แซ้บๆ คือยุ่คิวรถสองแถว
    บรบือต้ะกี้น้า ซ้ดบาดได่กะมีแฮงท้องบาดนั้น คะเจ้าบ่ใส่ใบบักกูดหัวสิงไคคักปานนี่น้า นั้นมันต้มขมนี่มันต้มแซ้บสิกินบ่ อ๋อ





    พอสีซึ่มๆ ท้องตึงแล้วเริ่มออกลีลา ตอนเอิ้นเอาเงินมาโฮมว่าจั่งได่กะบ่ตีงมือเพิ่น บาดอิ่มแน่สำบายใจแล้วเริ่มฝอยตี้ละ
    มือไกว่ยุ่วะซั่นหมู่ได้อ้าปากฟังซ่อล่อแซ่แล่ ที่บ้านผมนะปลาถ้าตัวไม่ได้ขนาดไม่จับไม่แตะมันเลยนะและเผากันสดๆด้วย
    เนื้อนี่น่องลายต้องมาก่อนพูดห้าร้อยพูดพันกินประจำ แตงโมลูกเท่านี้บ้านผมเขาคัดออกไปดูนะๆ แตงโมยโสเคยได้ยินมั้ย
    บ้านพี่อยู่ไหน ยโสไม่เคยไปละซิ พระยาคันคากนะรู้จักมั๊ย อะไรพี่พระยาคันคาก ก็พระยาคันคากโอ้ยวิจิตรสวยงามมาก
    นั่งเด่นเป็นสง่าอยู่ริมหนองน้ำคู่กับพระยามังกร เออเราไปกราบพระยาคันคากกันสักครั้งก็ดีนะพี่เผื่อจะเป็นมงคลกับชีวิตบ้าง
    ฟังเขาพูดให้จบก่อน ไปซิไปซิไปพักบ้านผมได้บ้านผมมีรีสอร์ทเงียบสะดวกสบาย เออเนาะเดี่ยวดูวันหยุดสงกรานต์อีกที
    บ้ะอ้ายนี่ เฮ้ดงานเช่าห้องพันห้าพ่อนอนนาเลี้ยงไก่ยุ่ยโสธรตั๋วเขาให้ไปไหว้พระยาคันคากนอนเถียงขอบสาพ่อเจ้าของ
    ถ้าแม่นหนังขายยาได้หมอนี่ไปเป็นโฆษกโฆษณาให้รับรองเดือนละหมู่บ้านบ่ต้องย้ายจอหนังยาถ่ายไฮ่ขวดนำกะบ่ทัน
    หลายคักซุมเซียงเหมี๋ยงไปใสกะพ้อ





    สี่ห้าทุ่มกินอิ่มแล้วพากันเมียนอนบางอ้ายได้ไปส่งปากซอยบ่ไปส่งกะสิพากันนอนเฟียกินอยู่เฮียนเจ้าภาพต่อมื้อหลังอีก
    ตื่นเช้ามาเมียเจ้าของบ้านล้างจานตี้ละครับ นี่ละหม่องมันสิบ่ได้กินกันดู๋ บาดได่บาดนั้นบ่มีว่าเดี่ยวล้างจานก่อนค่อยกลับ
    ชั่งเถอะๆล้างๆเดี่ยวก็เสร็จ ว่าแล้วกะแต่งโตไปเฮ้ดงานละครับไผอยู่บ้านแล้วต้ะเจ้าสิล้างบ่ล้างตั๊ว

    สองพันห้าบวกเหล้าโซดาหกเจ็ดคนมื้อเดียวกินบ่เบิดครับ เหลือทุกอย่างแลงใหม่พากันมาต่ออีกขวบเก่าสามมื้อจั่งเหมิด
    ผู้ที่มีบ้านอยู่ในรัศมีตลาดไทถ้างบบ่หลายแต่อยากกินหลายแนะนำไปช้อบที่ตลาดไทครับ เนื้อสันคอหมูย่างพอซื้อกินได้
    ปลานิลโตใหญ่สุดโลบ่เกินหกสิบบาท โตขนาดที่ผมปิ้งกันสองร้อยบ่อยู่เด้ถ้าซื้อเขากิน บักโมหนักเจ็ดกิโลตกลูกละร้อย
    นานๆ ซื้อถือว่าพอกิน ถั่วต้มโลห้าสิบเอามากินเล่น ซอยกันเฮ้ดซ่อยกันกินเมนูอีสานกับลูกอีสานกะบ่ขี้ล่ายปานได๋ครับ

    เบียร์ถ้าอยากได้ราคาถูกให้ซื้อคะเจ้าอยู่เป็นประจำ จากราคาขวดละเจ็ดสิบตามร้านลาบกะสิเหลือขวดละห้าสิบแบบยกลัง
    น้ำซื้อไว้ยามบิ๊กซีโลตัสเพิ่นลดราคาเหลือแพ็คสี่สิบเก้าบาท ตกขวดละสี่บาท ผู้ได๋มีบ้านให้นั่งให้คัวสดวกสบายมีหมู่กิน
    หมู่จ่ายหมู่ล้างจานให้ไปซื้อผักปลาเนื้อยุ่ตลาดไทมาทำกินเองครับ รับรองอร่อยและประหยัดได้กินเต็มคำและกะม่วน
    เป็นการฝึกการทำอาหารไปในโตเสริมเสน่ปลายจวักกันไป เฮ้ดไปเรื่อยครับตามสูตรเพิ่นตามปากเฮานำบ่แซ้บเอาใหม่
    ว่าแต่แขกเสี่ยวผู้ที่สิเอิ้นมากะสำคัญต้องเลือกคนจั้กหน่อย เอิ้นอ้ายจกถ่งยากแต่เสียงดังมาได้กินกันเที่ยเดียวท้อนเด้

    ข้าวโพ้ดหวานซุปเปอร์สวีทตกฝักละห้าหกบาทได้ปิ้งแจกกันกลับไปกิน เงินหายากแพงอยู่แพงกินแพงไว้ใช้ยามเมียบ้าน
    อันได๋พอประหยัดได้กะประหยัด ฮู้หม่องซื้อหม่องจ่ายในราคาบ่แพงแถมมีเชฟซ้ายขวาคอยช่วยเหลือสบายละบาดเนี่ย
    ผู้มีเงินพอไปกินร้านอาหารได้กะอย่ามาซาเด้อครับ ร้านอาหารนั้นละสะดวกดีบรรยากาศดีบ่ต้องล้างจานผัวเมียบ่ผิดกัน

    กรุงเทพรังสิตกะพออยู่การงานพอหาได้ของกินหาง่าย วันหยุดวันบ่หยุดส้มปากหรือเปรี้ยวปากกะไปซื้อมาเฮ้ดกินครับ



  8. #18
    ดูแลตรวจสอบเนื้อหา สัญลักษณ์ของ หนุ่มลาวสาวขะแมร์
    วันที่สมัคร
    Aug 2012
    ที่อยู่
    รังสิต
    กระทู้
    558


    อดีตเคยดี


    ขณะนั่งกินนั่งฝอยกันยุ้คนหนึ่งบอกว่าเมื่อก่อนข้าวโพดบ้านหนูเพี้ยบเลยที่ชัยนาทนะแค่จะกินข้าวโพดแบบนี้ไม่ต้องซื้อ
    ที่ไหนก็มี แล้วไม่เอามากินละ มันอยู่ไกลหนูไม่ได้กลับ ก็เลยต้องมาซื้อกินที่นี่ ใช่ อีกคนบอกกินแบบนี่แล้วคิดฮ้อดบ้าน
    ต้ะกี้อยู่บ้านกุมภวาได้ซี้นพูดเนื้อพูดมามาฟักลาบขมๆ เข้าเหนียวคุ้ยกับซุมพี่น้องยาดกันคุ้ยแซบคัก เดี่ยวนี่บ่ค่อยได้พ้อกัน
    กลับไปกะบ่ค่อยพ้อผู้ได๋มีต้ะเฒ่าพ่อเฒ่าแม่หลานเดี๋ยวกะไปเดี๋ยวกะมามายุทางชลกับพ่อแม่มัน อีกผู้หนึ่งว่าพ่อผมไม่เข้า
    บ้านเลยนะเมื่อก่อนตอนเด็กก่อไฟแบบนี้ไม่ข้าวโพดก็ไปขุดมันแกวแดงมาเผา มันเทศ เอ้อนั้นละที่บ้านเรียกมันแกวแดง
    นอนนากับพ่อหน้าลงนา ซุกเข้าไปในขี้เถ้าเลยนะหัวมันเอยเม็ดขนุนซิ้นหลอดเอยปลาหลดแห้งนี่อร่อยมากยัดในขี้เถ้า
    สักพักเอาออกมาเคาะๆ เถ้าออก กินกับข้าวเหนียวปั้นใหญ่ๆ พายย่ามสมุดเดินไปโรงเรียนกินข้าวกับปลาหลดไปด้วย
    โอ้ยไม่ต้องมาย่างหมูย่างไก่เป็นโลแบบนี้หรอก เอ็งรีบกลับไปกินปลาหลดเผาแกเลยป้ะ จะไปหาที่ไหนละพี่ปิ้งปลาหลด
    ปลาไหลเขาเอาหม้อน็อกดับแนวหมดแล้ว มีแต่หัวมันสำปะหลังพี่จะกินมั้ยผมจะหมกมาฝาก เออพอแค่นี้คอเรสเตอรอล
    ผมก็สูงปรี๊ดแล้ว แม่นยุ่หนาวๆ ก่อไฟผิงบ่มีแนวจี่แนวเผาหาหนังงัวบ่ได้ในบักขามกะดีเด้ใส่กะโป๋บักพร้าวหมากเสียมซ้วน
    เถ้าฮ้อนๆ ใส่ โค่เล่ให้มันซู่จนเซาแล้วงุบกะโป๋ลงไม้เขี่ยหามาหย่ำไผหย่ำมัน แข่วบ่ดีหย่ำบ่ไหวแกะใส่ขวดแม่โขง
    กรอกน้ำส่างใส่หิ้วไปโรงเรียนไปกินยุ่โรงเรียน นุ่มๆ หย่ำดีคัก ฮ่าๆๆๆ บ้ะบ่แม่นมียุ้ติในบักขาม เซาพี่แม่นมีมันกะบ่
    แซ้บดอกในบักขามหวานต้องในบักขามส้มมันค่อยได้อรรถรส บ้ะมาคอนดิชั่นหลายแถะละแค่หมกขี่เถ้าซื่อๆกะดาย








    บางปาตี้กะมีตบตูดด้วยข้าวจี่ทาไข่พอหายคิดฮ้อดบ้านครับ เบิ่งแต่ละคนขมักเขม้นอยากให้ผลงานจี่ข้าวการทาไข่
    ออกมาดีที่สุด ทุกคนหลังเลิกการเลิกงานต่างกะพูดคุยหยอกล้อเกทับกันด้วยอารมย์ที่สนุกสนาน ใช้ช้อนมันโหยดนะเคน
    เออคราวหน้าจะได้เอาแปลงทาสีมาด้วย ไข่แกทำไมมันหมดไวจังวะ เหลือแค่นี้พี่ ไข่เบอร์ห้าฟองมันค่อนข้างเล็ก
    ปกติการกินสุ่มื้อนี่หลายคนกินไปเล่นโทรศัพท์ไปกะส่งฮู้บหรือโพสท์สู่หมู่เบิ่งไปนำระหว่างการกินนั้นละครับเล่นกะดาย
    แต่ในบรรยากาศแบบนี่บ่มีไผหัวซาโทรศัพท์มีผมถือถ่ายรูปยุ่ผู้เดียว ทุกคนจ้องไปที่เตาและกะปั้นข้าวจี่ เบิ่งจั่งหนึ่งกะคือ
    ทุกคนม่วนในกิจกรรมหรือบางอารมย์กะคือทุกคนคิดฮ้อดบ้าน คนกรุงเทพฯกะยิ้มไปนำเขาพวกพี่นี่กินง่ายเนาะ พะวะ

    ของบ้านนอกบ้านนา ของแบบบ้านๆ หลายอย่างยังคงมีเสน่บ่คลายแต่เฮาอยู่กับเพิ่นบ่ได้ อาศัยหาเอาตามโอกาสมี
    อยู่กรุงเทพเมืองหลวงกะจี่ข้าวเหนียวทาไข่แซ้บๆ กินได้ยุ่ครับ


    แก้ไขครั้งสุดท้ายโดย หนุ่มลาวสาวขะแมร์; 20-04-2017 at 20:56.

  9. #19
    ดูแลตรวจสอบเนื้อหา สัญลักษณ์ของ หนุ่มลาวสาวขะแมร์
    วันที่สมัคร
    Aug 2012
    ที่อยู่
    รังสิต
    กระทู้
    558


    อีสานคอร์นเน่อร์


    หลายๆ สถานที่กะสิมีมุมเฉพาะซุมไผมัน ในที่ผมทำงานกะมีมุมอยู่มุมหนึ่งอยู่ด้านนอกของส่วนโรงงานหรือฝ่ายผลิต
    มุมของพี่ๆที่ทำหน้าที่ขับรถต่างๆครับ รถนาย รถตู้ รถรับส่งพนักงาน รถเทรลเล่อร์ขนสินค้า เป็นมมุมสำหรับพักผ่อน
    มานั่งมานอน รถรับส่งพนักงานต้องตื่นแต่ดึกส่งพนักงานเข้ากะออกกะแล้วมาจอดนอนจอดล้าง มีพัดลมทีวีพอได้เบิ่งข่าว
    บ่ว่าสิเป็นคนขับรถเจ้าหน้าที่ในเครื่องแบบล้วนแล้วแต่เป็นคนอีสานบ้านเฮาเสียส่วนหลาย เสาร์อาทิตย์มื้อได๋ที่ผมเข้าเวร
    สแตนบายตาเวนเที่ยงกะสิแวมาโสเหล่มาเบิ่งมวยนำเพิ่น หรือเอารถมาล้างเพราะน้ำอยู่โรงงานไหลพุ่งแฮงกว่าอยู่บ้าน
    ที่จอดล้างรถกะกว้างสะดวกกว่า ประหยัดน้ำบ้านกะของประหยัดเงินค่าล้างรถไปนำครับ ไปล้างคาร์แคร์สองร้อยเที่ยวได๋
    ฝนตกทุกเที่ยวฝนบ่ฝนแล้งปานได่กะตก ย่างผ่านไปยามเที่ยง ฮ่วยมามา แม่นหยังละครับ ตำบักฮุ่งฮ่วยตำบักฮุ่งเผ็ดๆ
    ข้างกำแพงโรงงานมีต้นบักฮุ่งหน่วยน้อยๆ ยุ้สองต้น หน่วยน้อยซ่ำกันกับหน่วยบักฮุ่งสายแต่พ่อยดีคัก





    บ่มีเครื่องอิหยังหลายบักพริกแดงกระเทียมน้ำปลาร้าน้ำปลาชูรสแล้วกะบักนาว โชเฟ่อร์รถพ่วงเป็นผู้ตำรสชาดแซ้บครับ








    พากันเฝ้าโรงงานบ่ได้เมียไปยามพี่น้องกะเลยโฮมเงินกันไปซื้อเนื้อสดตลาดไทมาซอยจุ๊กับฟักก้อยกินพอแล้วสงกรานต์
    คนอีสานไปอยู่หม่องได๋กะบ่ลืมความเป็นคนอีสานครับ อ้ายอาทิตย์หน้าสิตำบักฮุ่งอีกบ่ ผมสิเอารถมาล้างอีก


    แก้ไขครั้งสุดท้ายโดย หนุ่มลาวสาวขะแมร์; 02-06-2018 at 13:18.

  10. #20
    Moderators สัญลักษณ์ของ สหายพง
    วันที่สมัคร
    Mar 2009
    ที่อยู่
    ผมมากับรถผ้าป่า
    กระทู้
    1,369
    คือกันเบิ้ดสุหม่อน้อครับอั่นพวกตู้ดกินแล้วกะตินั้นตินี้ ฮักบ่จกเงินซ่อยเขาจักเทื่อ ผมกะกลับบ้านแต่ล่ะเทื่อถึงขั่นล้มละลายเลยคือกัน

หน้าที่ 2 จากทั้งหมด 4 หน้า หน้าแรกหน้าแรก 1234 หน้าสุดท้ายหน้าสุดท้าย

กฎการส่งข้อความ

  • You may not post new threads
  • You may not post replies
  • You may not post attachments
  • You may not edit your posts
  •