บ้านในฝัน 2

[หนุ่มลาวสาวขะแมร์]

ห่อข้าวกับส้มต่อน


ฮ่าๆๆๆ ขอบคุณครับอ้ายพง เห็นมาแหน่หลายเทื่อผมค่อยกล้ามาเว้าเด้
ยังยากนำฮู้บบ่แล้วเดี่ยวมาเดี่ยวบ่มา บ่เป็นหยังบ่ฮ้อนแดดคือก้มดำนาดอกมันฮ้างกะค่อยแก้ไป

แวะปากซอยพ้อเนื้อขาลายละมั้งโลสองร้อยสี่สิบคิดพ้อก้อยยุ่โรงงาน เอาบ่เอาสิบ่เอากะคึดอยากอ่ำหล่ำๆ เอานี่โลนึง
เนื้องามๆ เอามาปาดจิ้มแจ่วคำหนึ่ง บ่คือหยาบโพ้ด แหงนเห็นจุกกระเทียมน้อยมาต้ะบ้านบ้ะลองเฮ้ดส้มต่อนกินก่อนน้า





ผมบ่เคยคั้นส้มงัวกินจั๊กเที่ย โดนๆ ซื้อกินเที่ยหนึ่งญ้อนรู้สึกว่ามันแพงละครับ ซื้อหม่ำเมืองพลแน่พอได้เป็นของฝาก
หลังจากซอยเนื้อบางๆ เบิดโลแล้วกะมาใส่ส่วนผสม ส้มงัวที่เคยกินสังเกตุเห็นมีกระเทียมข้าวเหนียวเค็มหวานเผ็ด
สรุปเครื่องปรุงรสเอาตามที่มีในครัว เกลือถุงละบาท ชูรส กระเทียมโขลก ข้าวเหนียวนึ่งบ่มีเอาเป็นข้าวสวยใส่อย่างละ
พอประมาณที่คิดว่าสิแซ้บ ข้าวหลายโพดบ่แม่นส้มปลาตะเพียนเอาออกอีกเดี๋ยวมันส้มไว





คั้นให้เข้ากันด้วยมือคั้นไปบีบเม็ดข้าวให้แตกไปนำมันค่อยทำปฏิกิริยาไวหรือส้มไว คั้นบ่โดนกะได้กลิ่นหอมของกระเทียม
กับกลิ่นของเนื้อลุกเคล้ากัน หอมเป็นต้ะกินแล้วครับ ชิมรสโดยหยิบเนื้อคำพอประมาณใส่ปากต้องบ่เค็มถ้าเค็มปิ้งสุกแล้ว
สิเค็มกว่าเก่าไปอีกสองสามเท่าแล้วหาภาชนะมาใส่ เพื่อความสดวกรวดเร็วเอาแบบง่ายๆ
กระปุกพลาสติกใสใส่เฉาก้วยโบราณซื้อมากินแล้วเก็บกระปุกไว้ เฮากะนำมาใช้ใส่ส้มงัว ตักใส่พอประมาณตามพอใจ
ผักแป้นบ่มีใส่ต้ะบักพริกหน่วยลงไป ปิดฝาให้สนิทวางไว้ในที่เหมาะสม หรือใส่ถุงปิดสนิทใส่ตู้เย็นไว้เดี่ยวมันสิเป็นส้ม
พร้อมกันกินบ่ทัน ค่อยทยอยออกมาไว้นอกตู้เย็นหลังกินกระปุกแรกเบิด วางหลบแมลงวันอีกสองสามมื้อค่อยมาเขย





เที่ยแรกในชีวิตของการเฮ้ดส้มต่อนเพราะอยากประหยัดอันได่คิดว่าแซ้บแล้วกะพอสิเฮ้ดได้กะลองเบิ่งครับ
แม่ค้าผู้เพิ่นเฮ้ดส้มงัวส้มหมูขายกะคนคือเฮานี่ละ อยากซื้อเพิ่นกินยุ่จอดซื้อบาดได๋กะหมานต้ะใบตองเสียดายเงิน
ครับผ่านไปสองมื้อสามมื้อเปิดออกกลิ่นเนื้อกับกระเทียมหอมฮ่วยๆ ได้ห่อไปกินงายกินสวยที่ทำงานอิหลีละ
ตกกระปุกละหกสิบครับ เกลือกระเทียมชูรสอย่างละนิดบ่ต้องคิด กระปุกหนึ่งได้ห่อกับข้าวสองมื้อกินแล้วห้ามเว้ากับไผ
ห่อใบตองปิ้งหรือขั่วใส่หน่อไม้กะแซ้บครับ ลองเบิ่งเฮ้ดบ่ยากครับ