ข่าวความดีใจของคนทั่วโลกกับน้องๆทีมหมูป่าและข่าวฟุตบอลโลกจนถึงทีมที่จะได้แชมป์ในครั้งนี้
ส่วนผมขอเก็บเรื่องราวต่างๆ ที่ผ่านมามารวบรวมไว้ เผื่อทุกๆคนที่สนใจ
มื้อก่อนไปแวยามย่า หลังจากปลูกทุเรียนและหมากไม้ผักสวนครัวได้ยินว่าพี่น้องเฮียนติดกันเพิ่นไปตึกแหห้วย
จับได้จักรยานแล่นนำก้นไป ไปเจอเพิ่นกำลังกลัดแหหนอง เอาดางตาข่ายกลัดลัดคลองหน้าหลังก่อนลงแห
ห้วย คลองน้ำสาธารณะที่ทางการเพิ่นผันเงินงบประมาณมาขุดลอกเมื่อหลายปี น้ำจากเขาจากท่งนา
มีน้ำขังตลอดปีพอไทบ้านได้ให้วัวควายกินหน้าแล้ง ได้สูบใส่ไฮ่นายามจำเป็นและได้หาปูหาปลากิน
ไปถึงเพิ่นได้เวลาสิขึ้นจะเลิกแล้วครับ มาแต่ก่อนเพลจนเดี่ยวนี้บ่ายคล้อย เก็บผ้าตาข่ายล้างแหกันแล้ว
ส่องเบิ่งกระชังปลา ป้าดปาค่อใหญ่ ปลาช่อนหัวหลิมโตละกิโลและปลาดุกนาโตงามๆ หมานของเพิ่น
ได้หลายเหลือกินอ้ายเพิ่นแบ่งขายไปนำ โลบ่เกินร้อยบาทพอซื้อกินสำหรับผู้หว่านแหบ่เป็น
อ้ายเพิ่นว่าในห้วยปลาขาวนาหลายคัก สิแม่นยุ่ครับสังเกตุจากปลาค่ออ้วนจนหัวหลิม
กับมาเอาดางมองตาข่ายขาดๆ ยาวประมาณสามสิบเมตรไปลงไว้ เช้าอ้ายเพิ่นไปกู้มาห้อยไว้ให้
ปลดออกได้ปลาขาวนาโตน้อยๆ สดๆ กิโลกว่าขัวเกล็ดหมกหม้อใส่ตะไคร้ผักอิตู่ นานๆกินเทื่อหนึ่งแซ้บครับ
อ้ายแบ่งปลาให้แม่ยายอยู่เป็นประจำ มื้อนี้สบจังหวะผมกลับเพิ่นว่าเอาไปกินโล้ดอยู่นี้พอได้กินแน่ยุ่ดอก
ปิ้งปลาดุกแม่ไข่สามสี่โต ปลาช่อนผมจัดการขัวเกล็ดแผ่หลังผ่าหัวเอียบใส่ลังมานึ่งใส่ยอดดอกแคขมๆ
ปลาดุกสดใส่ลังโฟมมาปิ้งลาบรังสิต ได้กินอีกหลายคาบ ช่วงกุมภามีนาปลาห้วยปลาหนองยังบ่คาวหลาย
มีห้วยมีน้ำช่วยกันรักษาปูปลากบเขียดกะตามมาครับ
Bookmarks