กำลังแสดงผล 1 ถึง 3 จากทั้งหมด 3

หัวข้อ: มันห้านาทีเหลืองเชื่อม Yellow Cassava Root Boiled Sugar

  1. #1
    ดูแลตรวจสอบเนื้อหา สัญลักษณ์ของ หนุ่มลาวสาวขะแมร์
    วันที่สมัคร
    Aug 2012
    ที่อยู่
    รังสิต
    กระทู้
    558

    มันห้านาทีเหลืองเชื่อม Yellow Cassava Root Boiled Sugar


    มันห้านาทีเหลืองเชื่อม Yellow Cassava Root Boiled Sugar

    มันห้านาทีเหลืองเชื่อม Yellow Cassava Root Boiled Sugar

    มันห้านาทีเหลือง (ตามผู้ให้มาเพิ่นเอิ้น) หัวข้อภาษาฝรั่งหาลอกของเพิ่นใส่ ฮ่าๆ
    ได้แนวมาลำหนึ่งมาตัดฝังไว้คูสาได้สามเหง่าครับ
    ปลูกแปดเดือนจนหัวแก่ สามเหง่าขุดสามเทื่อเฉลี่ยตกเหง่าละสิบกิโล
    ปุ๋ยบ่เคยใส่ยาบ่เคยฉีดสิอาศัยดูดกินนำผักนำขุมบักถั่วละมั้งครับ
    ขุดเอาหัวแล้วฝังลำใส่หม่องเก่าบ่ฝังหลุมใหม่เพราะก่นบ่เข้าเฮ้ดแบบง่ายๆ คร้านกะแม่น

    มันห้านาทีเหลืองเชื่อม Yellow Cassava Root Boiled Sugar

    เอามาต้มใส่น้ำตาลทรายแดง มันเหลืองน้ำตาลแดงออกมาสีน้ำตาลไหม้แถมมีเส้นใยแต่แซ้บ
    แซ้บครับมันห้านาทีเหลืองถ้าขุดหว่างห้าหกเดือนนิสิดีกว่ายุ่ผมว่า ขุดตอนยังบ่เป็นเส้น
    เป็นของหวานราคาบ่แพงเนาะครับ น้ำตาลครึ่งกิโลสิบห้าบาทอย่างอื่นน้ำฟืนถ่านฟรี
    ได้กินและแบ่งพี่น้อง โควิดมาทำให้งานหายากเงินหายาก เฮาต้องเฮ้ดแนวที่มันหาบ่ยาก
    มาครับ หากินเผือกกินมันนำคูสานิละพุ่มเอาะเยาะเหลียวเห็นแต่ไกลๆ หาบ่ยาก ฮ่าๆ

    บ่มีกะทิราดผ่าบักพร้าวคั้นบ่ทันเอาไว้ขุดเที่ยวหน้าค่อยราดกะทิแซ้บๆ ครับ

  2. #2
    ร่วมถ่ายทอดความรู้สู่สังคม สัญลักษณ์ของ ชัย หมอแคน
    วันที่สมัคร
    Jan 2010
    ที่อยู่
    มณฑลอานสี
    กระทู้
    407
    บล็อก
    3
    เป็นตาแซบครับ ดินดีปลูกหยังทิ้มไว้กะได้กิน

  3. #3
    ดูแลตรวจสอบเนื้อหา สัญลักษณ์ของ หนุ่มลาวสาวขะแมร์
    วันที่สมัคร
    Aug 2012
    ที่อยู่
    รังสิต
    กระทู้
    558

    ขอบคุณครับอ้ายชัย ขอโทษเด้อเข้ามาเว้านำผมผัดคาแต่ยากนำเวียกบ่ได้มาตอบมาเว้านำ แนะนำพี่น้องทางลาวทางสารคาม ร้อยเอ็ด ยโส ฯลฯ ถ้ามีเงินเหลือใช้กะมาหาซื้อที่ทางทางนี้เด้อครับ เบิ่งใส่กันแล้วดินบ้านเพิ่นถือว่าดีกว่าดินทางบ้านเฮาคักยุ แล้งกะบ่แล้งหลายเป็นตาอยู่ของเพิ่นยุ



    มันเหง่าเก่าที่ผมสับดูกฝังดินคืนไว้ เวลาผ่านไปบ่มีไผมาขุดมาบายสุดท้ายแม่นผม มันเหง่าเก่าแต่บ่แม่นเหง่าเก่าเป็นเหง่าใหม่เหง่าคนละปีกันครับสังเกตุจากต้นอิฮุมช้างผ่านไปปีเดียวต้นใหญ่ท่อขาแล้ว มะรุมช้างเป็นไม้เนื้อแก่นที่โตไวไม้สีน้ำตาลดำแข็งมากถ้าแห้งแล้วมีดฟันบ่ขาดครับ



    ถ้าบ่ขุดผัดสิ่อเน่าถิ่มซื่อๆ เพราะอายุครบสิบสองเดือนแล้ว ดินโคนเหง่าแตกบ้าญ่า



    เอาเสียมแซะๆ มือลูบปัดดินพอได้ถ่ายรูปเก็บข้อมูลมาเว้าสู่พี่น้องฟัง หัวใหญ่คักครับ มันหัวเฒ่าเสี้ยนเต็มกินบ่ได้แล้วละแต่สิขุดเบิ่งว่ามันสิได้จักหัว



    ขุดไปเคิ่งเหง่าพอไว้ก่อนเพราะได้หลายหัวแล้วถ้าเอาไปเชื่อมต้องเชื่อมใส่ปี๊บหรือหม้อวัดเบอร์ห้าสิบสี่ถึงสิเบิด



    มื้อลุ่นมาขุดเอาอีกหัวที่เหลือ เอาไปฝากเจ้าของผู้เพิ่นเอาดูกมาให้ ปีที่แล้วฝากเพิ่นไปแล้วปีนี้เอาไปฝากอีก



    ได้สามหัวยังเหลืออีกด้านั่งสาขุดบ่ไหวเอาไว้ปีใหม่ค่อยมาเล็ม

    ผมเอาหัวมันห้านาทีเหลืองที่ขุดได้มาชั่ง ขุดสองเที่ยวจากมันเหง่าเดียวน้ำหนักรวม 35 กิโลกรัม ถือว่ามันชนิดนี้ให้ผลผลิตต่อเหง่าสูงเลยทีเดียครับ



    หัวมันเฒ่าแต่เนื้อในเนียนบ่มีเสี้ยนครับ สีเหลืองครีมอ่อนๆ สีสวยครับ



    เอามาปอกเชื่อมมันเต็มหม้อน้ำตาลทรายสองกิโลกรัมเทใส่หมด ต้มจนเตาเหมิดถ่านไปสองเที่ยว หวานอร่อยครับ แข็งๆ แซ๊บบ่ขมห่อใส่ถุงมากินรังสิต

    เป็นมันที่ปลูกง่ายให้ผลผลิตดี คนกินได้เป็ดไก่ปลาวัวควายต้องกินได้ น่าสนใจครับผมวางแผนสิปลูกมันชนิดนี้จักงานเอาไว้สับบดเลี้ยงปลาเลี้ยงไก่คนกะเชื่อมกินซากันไปนำครับ


กฎการส่งข้อความ

  • You may not post new threads
  • You may not post replies
  • You may not post attachments
  • You may not edit your posts
  •