คิดถึงพ่อ คิดถึงแม่ คิดถึงบ้าน

[napho]

..............ก้าวลงเฮือนเตือนใจเศร้า......หัวอกตรมระทมเหงา.....คิดนำเจ้าพ่อและแม่......ทั้งตายายเฒ่าแก่.....ผู้เพิ่นหย่ำข้าวหมก......ผู้เพิ่นจกข้าวป้อน........แต่ยังน้อยจนใหญ่มา.......ลูกได้ไลลาเจ้า.......หนีไกลเฮือนไปวั่งวั่ง.......น้ำตาไหลรินพัง.......ทังห่วงญาติพี่น้อง......ผองเพื่อนเสี่ยวสหาย......ต้องจำไกลหนีไปหน้า......หากินปลาวังใหม่......หนีไกลพงศ์เผ่าเซื้อ.......เมืองบ้านบ่อนพักเซา......เข้ามาหาเฮ็ดงา นสร้าง......แปลงทางเทียวไต่......หาเงินใบบาทเบี้ย. ......เมือให้พ่อแม่เฮา

..............พ่อแม่จ๋า คันฮอดยามกินข้าว.....ให้เจ้าวานเอาขวัญ......ลูกเจ้าเข้ามาว่า.......มาฮ่วมพากินข้าวพร้อม......ดอมเจ้า เด้อพ่อเด้อ เด้อแม่เด้อ

..............รูปพ่อแม่ลูกกราบไหว้......วอนเทพไท้เทวา.....ในชั้นฟ้าให้มาซ่อย.. ....เบิ่งพ่อแม่แทนข้าน้อย......ให้เลาได้อยู่เกษม.. ....ให้เลาเปรมปรีสุข......อย่าสิมีแนวฮ้าย.......อย ่าได้เจ็บป่วยไข้......หนาวใน ๆไข้บ่อส่วง......ฮอดยามฝนตกล่วง......ฮอดยามลมพัดต้ อง.......ให้เลาได้อยู่สบาย.......อย่ามีภัยพยาธิฮ้าย.....มาบังเบียดกายจิต......ขอเทวาเนรมิต......ให้อยู่ดีอย่ามีฮ้อน......ข้าขอวอน ข้าขอไหว้.......คุณพระรัตนตรัย......ขอจงได้เข้ามาซ่อย.......อย่าให้พ่อแม่ข้าน้อย.....เลาได้ว่าทุกข์ใจ......ให้เป็นโพธิ์ฮ่มใหญ่......ให้เป็นไทรฮ่มหนา.. ....ให้ลูกนกลูกกา......ได้เทียวซ้นคอยเพึ่ง.......ให้อยู่ถึงขวบร้อย.....อย่าไลล้างห่างหนี เลยเด้อท่าน


*****************************************
คิดเห็นหน้า อยากไปหาพ่อและแม่

[napho]

อย่าลืมแสดงความคิดเห็นด้วยนะครับ เพื่อจะได้ปรับปรุงวันหลัง

[auddy228]

เหมือนหมอลำเลย...(แสดงเรื่องอะไรจ๊ะ...)

ก็...เราไม่ได้เข้าป่าไปเรียนหนังสือเหมือนเรื่องพระอภัยมณี..
โทรไปหาก็ได้นี่...ไม่น่าลำบาก..กระไรเลย
..เพลงเสมอ...เข้าม่าน...

[โป้ยก่าย]

มันเป็นการถ่ายทอดออกมาจากใจในทางศิลป บ่ว่าสิเป็นคำผญากะดี กลอนลำกะดี
ส้วนแต่เป็นการอนุรักษณ์ ศิลปวัฒนธรรมภาษาท้องถิ่น ข้อยว่าดีแล้วหละที่คนรุ่นใหม่
คือหมู่เฮาซ่อยกันสืบทอด เทือหน้ามาลำให้อ่านอีกแน่เด้อ ข้อยลำบ่เป็นดอกแต่มักฟัง

ป.ล. เจ้าเป็นพระเอกหมอลำคณะใดน้อ

[โป้ยก่าย]

ฟังเด้อญาติพี่น้องท้องถิ่นไทยอี่สานสุขสำราญกันดีอยู่สุคนบ่อน้อ.....ท่าน
ผู้ที่ไกลเมืองบ้านหาทำงานอยู่ไกลถิ่นไปหากินอยู่ต่างด้าวอย่าลืมบ้านถิ่นอี่สาน....อะเฮ้ย
ผมได้มากล่าวต้านขานต่อพอถามเถิง ฟากเป็นเสียงกลอนลำมาแวะถาม....นอยามเยี่ยม
ผู้อยู่สูงเทียมฟ้าลอยเมฆาใสส่องอย่าสุลืมญาติพี่น้องผู้คองถ้าเจ้าต่าวคืน....
แคนอี่สานภาคพื้นเจริญฮุ้งเฮืองใสพัฒนาเมืองไทยไปทั่วแดน....อี่สานกว้าง....
คนทั้งปวงกะลือย่องอี่สานทองนับมื้อเก่งฝากเสียงลำเสียงเพลงเป็นทำนองภาคพื่อี่สานก้ำกล่าวแสดง...อะเฮ้ย
ดินอี่สานเคยแห่งแล้งได้ตบแต่งเป็นเหมืองฝาย ทางหนองคาย กาฬสินถิ่นอุดรเจริญ.....ยิ่ง
ทางสุรินทรอุบลก้ำสารคามฮอดขอนแก่นเจริญเหมิดไปทั่วแดนชัยภูมิแฮ่งคักแท้เจริญขึ้นกว่าแต่หลัง
พัฒนาบ่หยุดยั้งบุรีรัมศรีษะเกษเขตเมืองเลยก้ำฝ่ายพุ้นภูเขาอ้อมกะแฮ่งงาม....อะเฮ้ย
แวะไปกินข้าวน้ำก้ำฝ่ายทางสกลหรือสิวนมาแวะบ่อนนครพนมพี่....
ยะโสธรลูกศรซี้หนทางดีลาดยางใหม่ฮอดยามบุญบั้งไฟเชิญเจ้าเที่ยวเล่นขบวนเซิ่งจังแม่นงาม
คันสิแลไปก้ำร้อยเอ็ดคำฟ้าย่อน ๆ แห่งเป็นตาสะออนตอนพระเวศขึ้นขี้ช้างกลับคืนเข้าแม่นสู่เมือง...
สาทยายพอเป็นเรื่องเผดียงต่อพอเป็นไปอาศัยเสียงสำเนียงกลอนวาทลำพอเป็นเรื่อง.....ละน่า

นี้กะแม่นกลอนลำเดอวาททางกาสินพุ้นหละ สังเกตสิมีอะเฮ้ย เล่นลูกตอ ผู้แต่งกะลำบ่เป็นดอกแต่ฟังเป็น อิ อิ

[ศรีสะท้าน]

@ คึดฮอดบ้านใจบ่อบานเบยเบิก
ไลลาเลิกแห่งห้องเฮือนพู้นพ่อแม่มา
จากเคหาเหิงฮ้างคิดบ่อจางจิตหวี่
ใจบ่อดีคิดอ่าวโอ้เกินอ้างกล่าวคำ
คึดอ้ำล้ำประจำจอดจองจิต...พี่แหลว
มวลสนิทเคยเทียวหาห่างลาไกลบ้าน
อธิษฐานมะโนน้อมนำคุณทุกคล้อยค่ำ
ขอคุณพระเลี่ยมงำ อยู่สบายหายจากฮ้อน พระพรพู้นพุทธคุณ ฯฯฯ

[napho]

เหมือนหมอลำเลย...(แสดงเรื่องอะไรจ๊ะ...)

ก็...เราไม่ได้เข้าป่าไปเรียนหนังสือเหมือนเรื่องพระอภัยมณี..
โทรไปหาก็ได้นี่...ไม่น่าลำบาก..กระไรเลย
..เพลงเสมอ...เข้าม่าน...

เป็นกลอนลำอิหลีนั้นหละ
แต่ว่าแต่งเอง บ่อได้มาจากเรื่องได๋ดอก
:):):)

[napho]

ป.ล. เจ้าเป็นพระเอกหมอลำคณะใดน้อ

ถึงคุณโป้ยก่าย
ถามมาว่าเป็นพระเอกคณะได๋ บ่อเคยได้เป็นพระเอกดอก
พระรองกะบ่อเคยเป็น คนผู้ดีจั่งผมนี้เป็นได้แต่โตโกงถ่อนหล่ะ
::)::)::)::)::)

[napho]

ขอขอบคุณอ้ายน้อง พ่อแม่ทั้งหลาย ทั้งคุณตาคุณยาย ผู้ที่มาจาต้าน
มากล่าวสารแถลงซี้ พอให้เห็นป่องกวี ซิได้แต้มเติมต่อ
หัดกล่าวจาสำนวนข้อ ให้คงไว้บ่อละวาง บ่อได้ไลลาล้าง ฮ้างปล่อยวางเสีย
ยังถนอมแพงฮัก บ่อละเลยมูลเค้า ความพ่อแม่เคยจาเว้า สิขอสืบสานต่อ
พอให้เป็นบทข้อ คงไว้บ่อหล่ะลืม ดอกเด้อเจ้า
***********
ลำทำนองขอนแก่นนะครับ ไม่เคยฟังทำนองอื่น ::)::)::)::)

[โป้ยก่าย]

คืนนี่จันทร์เพ็ญแจ้งแงงเงาใสส่อง ลอยเมฆาอยู่ค้องน้องกะยังฮู้ว่าเลื่อนลง...
ดาวอากาศอยู่ท้องฟ้ายังฮู้เลื่อนลงมาสิหัวซาคนหยังบาดอ่าเซกะยังล้ม...
เห็นว่าผักหมเหี้ยนกลางทางอย่าสุฟ้าวเหยียบย้ำลางเทื่อถอดยอดขาวบักฮ่าทางยอดดั้วยังสิได้ก้าย...เกิน
ภูเขาสูงเจิ้นเทิ้นยังฮู้มุ้นทะลายหักหลักอยู่เทิงจอมโพนปลวกกินกะยังล้ม...
ได้เป็นนายซั้นเจ้าอย่าลืมเผ่ากฎุมภีร์บัดฮ่ากรรมเวรมีสินั่งลงดอกซาวก้น.....


อันนี้กะทำนองขอนแก่นคือกันลำบ่เป็นแต่ว่าจำเอามาโพสต์ อิ อิ