มาๆๆฅนภูไทสิพาไปหาล่ากะปอม

[ฅนภูไท]

วิธีการไล่ล่ากะปอมกะมีอยู่สองสามวิธี กะคือ

1.ไปคล้องเอา วิธีนี่เฮาสิใช้ไม้คล้องกะปอม กะคือเฮ็ดบ้วงผูกปลายไม้ไผ่สียาวๆเติบ หรือผู้ลังคนขี้คร้านเหลาไม้ไผ่ กะเอาไม่ลำปอ ลำใหญ่ๆกะได้คือกัน เวลาไปหาคล้องกะปอม เฮากะต้องใช้วิธี มองไกล คือจั่งไปไล่แย้นั่นหละ เหลียวไปต้นไม้ไกลๆเติบ เพราะว่าขี้กะปอม มันสิลงมาหากินอยู่ต่ำๆ ถ้ามันตื่นคน มันจั่งสิไต่ขึ้นต้นไม้ที่สูง วิธีที่สิเฮ็ดให้กะปอม บ่ตระหนกตกใจง่ายกะคือ เฮาต้องผิวปากไปนำ ย่างไปนำผิวปากไปนำ อาจสิผิวเป็นทำนองได๋กะได้ ลูกทุ่ง สตริง หมอลำ ขี้กะปอมมันมักเหมิด กะปอม พอมันได้ยินเสียงผิวปากของคน มันกะสิเคลิ้ม ตอดเงาง๊อกๆ เฮากะเอาบ้วงไปคล้องคอ แล้วกะ ซิดปั๊บ ขี้กะปอมกะติดบ้วง อ้อนต้อน ปลดใส่ข้องเลย

2.วิธีที่สองนี่ วัยรุ่นชอบใช้ เพราะมันรุนแรงดี กะคือ ยิงเอา อาจสิใช้หนังสะติ๊ก หรือเป่าพลุ กะได้ เวลาเห็นกะปอมกะยิงเลย แต่ควรสิยิงตรงหัวมันเด้อ ถ้ายิงโตมัน มันขี้แตก เน่าง่าย เอามาก้อยบ่แซบ ข้อดีของวิธียิงเอากะคือ ถึงแม้กะปอมสิแล่นขึ้นต้นไม้สูงปานได๋ เฮากะยิงถึง บางทีกะปอมโตเดียว ใช้ลูกกระสุนเหมิดเป็นหอบ โดยเฉพาะกะท่าง หรือกะปอมก่าแหล่ มันสิแล่นขึ้นปลายไม้สูงเร็ว แต่ข้อเสียกะคือ กะปอมมันสิตายมันบ่สด เท่าไปคล้องเอา

แต่บางทีในการออกล่าแต่ละที เฮากะใช้ทั้งวิธีที่ 1 และที่ 2 ร่วมกัน หรือเอาทั้งเสียม ไปหาก่นแย้นำ ผสมผสานกันไป เอาทุกอย่าง บางทีกะไล่นกขุ่ม หรือนกคุ่ม ไปนำ บางทีได้งูสิง กะเอามาต้มคือกัน

3.วิธีล่ากะปอมวิธีที่ 3 เหมาะสำหรับคนที่บ่มีเวลาไปหาอยู่หากินยามกังเว็น เพราะยามกังเว็นต้องเฮ็ดเวียกเฮ็ดงาน กะใช้วิธีนี่ คือ วิธีใต้กะปอม ไปหาใต้ยามกลางคืน กะปอมนี่กะแปลก มันอาศัยอยู่เทิงต้นไม้ใหญ่กะจริง แต่เวลากลางคืนมันนอน นันสิบ่นอนอยู่สูง หรือมันย่านนอนหลับตกต้นไม้บุ๊หนิ มันสินอนนำกิ่งไม้ต่ำๆ เวลาเฮาไปใต้ กะสิเอาได้ง่ายๆ จับเอาเลย วิธีนี่เอากะสได้โตเป็นๆเอามาขังไว้กินหลายมื่อได้ ยามกลางเว็นกะไปทำงาน ยามกลางคืนกะไปใต้กะปอม แต่ว่าเวลาไปใต้ กะบ่เอาแต่กะปอมดอก ถ้าเห็น อึ่ง เห็นเขียดกะเอาคือกัน

วิธีการไล่ล่ากะปอมทั้งสามวิธีที่กล่าวมา กะแล้วแต่ผู้ได๋ถนัดวิธีได๋ กะใช้วิธีนั่น หรือสิใช้วิธีผสมผสานกันกะได้บ่มีข้อห้าม
แต่ว่าอย่าสะไปล่ามาเทือละหลาย หลายเด้อ เอาพออยู่พอกิน อย่าสะเอามาจนมันดับแนวหละ

เมื่อเฮาล่ามาได้หลายเติบแล้ว เฮากะเข้าบ้าน เอากะปอมที่หาได้ มาเฮ็ดแนวกิน กะปอมหรือขี้กะปอมนั้น สามารถนำมาประกอบอาหารได้หลายอย่าง เช่น เอามาปิ้งกินเลยกะแซบ หรือสิตากแห้งไว้ทอด กะดี ผัดเผ็ดกะปอมกะแซบบ่ค่อย หรือสิเอามาก้อย เฮ็ดก้อยกะปอม ที่สิเฮ็ดอยู่นี่หละ ก้อยสุกเด้ บ่แม่นก้อยดิบ ก้อยกะปอม ใส่บักม่วงน้อยสุดยอดอิหลีเด้อสิบอกให้8)8)8)

[lukhin_inter]

ลูกหินพยายามโหวตให้อยู่นะแต่ไม่ทราบได้ไหม ...ไม่ใช่ว่าชอบกินนะแต่รูปสวย บรรยายเห็นภาพชัดเจน จริงบ่อ้ายเวลาคนผิวปากแล้วกะปอมจะเคลิ้มตกลงมาเลยอ่ะ...เหมือนเรายิงยาสลบเลยเหรอ หรือเหมือนสะกดจิตเนี๋ยเหรอ....ลูกหินเห็นอ้ายแล้วนะคะคนในรูปแม่นบ่...คือขยันทำมาหากินเน๊าะ

[ฅนภูไท]

แม่นแล้วครับลูกหินเวลาผิวปากกะปอมสิเคลิ้ม แล้วกะตอดเงาง๊อกๆ คือสะกดจิตนี่หละ

ปล.คนในรูปบ่แม่นคนภูไทเด้อ ฅนภูไทยังบ่เฒ่าครับ อิอิอิ

[lukhin_inter]

ลูกหินนึกว่าแม่นซะอีก...กะตอดคืออาการแบบไหนอ้าย...โงนเงน..รึ...งุนงง..ลูกหินถามนี่ไม่รู้จริง ๆ นะ

[ฅนภูไท]

ตอดเงา หมายถึง ผงกหัวหรือสัปหงกประมาณนั้น ครับลูกหิน ให้ใช้ตอดเงาง๊อกๆเด้อ ถ้าตอดเงางึกๆเป็นคำที่บ่ค่อยสุภาพครับ

[ตรี ศรีเมืองใหม่]

โอ๊ยน๊อน้องลูกหินกะจั่งแม่นส้อ คริๆๆ ตกลงในรูปบ่อแม่นเจ้าติ๊บ่าวภูไท อิอิๆๆ///ขอบคุณสําหรับวิธีการทํามาหากินเด้อครับ สรรหามาลงอีกแหน่เด้อครับ

[lukhin_inter]

ขอบคุณคะลูกหินจะจำไว้ใช้...ตอนนี้ลูกหินก็ตอดเงาง๊อก ๆ อยู่หน้าคอมฯแล้วเดะคะ...ลูกหินบ่ฮู้ลูกหินก็ต้องส้อ...หละน๊ออ้ายบ่าวเซียงน้อย น้อย

[บ่าวดอนโบม]

ก้อยใส่หมากม้วงน้อย คือสิสุดยอดเนาะครับ
กะปอมก่าใหญ่

[ไก่น้อย]

โอ่ววว....แจ่มมากๆ อีกแล้ว

ปล..ลูกอิสานขนาดแท้ ต้องเคยกินก้อยกะปอม 555+ ไก่น้อยลูกคึ่งกะเลยบ่เคยกิน

[ตุ๊กตาไล่ฝน]

++อ้ายภู ไปลักยิงกะปอม บ้านไผอีกล่ะ ระวังหนังสะติ๊กมันซิยิงไปถึกตา เพิ่นเด้อ
...ซิหาว่าน้องบ่เตือน.. อิอิ...