กำลังแสดงผล 1 ถึง 6 จากทั้งหมด 6

หัวข้อ: ลาบนกคุ่ม

  1. #1
    แบ่งปันความรู้และประสบการณ์ สัญลักษณ์ของ konjaidee
    วันที่สมัคร
    May 2007
    กระทู้
    14

    ลาบนกคุ่ม


    ก่อนเฮาสิได้เฮ็ดลาบนกขุ่ม เฮาต้องไปหานกขุ่มมาสาก่อน วิธีการไปหานกขุ่ม กะไปหาได้หลายวิธี บ่ว่าสิเป็น ไปห่างนกขุ่ม ไปไล่นกขุ่ม หรือไปไต้นกขุ่ม เป็นต้น

    นกขุ่ม หรือ นกคุ่ม แม้มันสิเป็นนก แต่มันบ่ค่อยสินิยมชมชอบการบินสักเท่าได๋ ชีวิตส่วนใหญ่มันสิอาศัยอยู่ตามพื้นดิน บ่คือนกชนิดอื่นๆที่ชอบอาศัยอยู่เทิงต้นไม้ เทิงหลังคาบ้าน แต่กะบ่ใช่ว่านกขุ่มสิบินบ่เป็นเด้ บินได้อยู่ และนกขุ่มตามภาคอีสานบ้านเฮา กะสิหาได้ในช่วงฤดูร้อน เท่านั้น เริ่มมาตั้งแต่หลังจากเก็บเกี่ยวข้าวแล้ว กะสิเริ่มเห็นว่ามีนกขุ่ม ตามหัวไร่ปลายนา ตามป่าละเมาะ ส่วนฤดูการอื่นบ่ฮู้ว่ามันอพยพไปอยู่ประเทศได๋

    จากที่เฮาฮู้ธรรมชาติของนกขุ่มว่า เป็นนกที่อาศัยอยู่ตามพื้นดิน หาเขี่ยอาหารกินคือไก่ บินได้บ่ไกลชอบแล่นหลายกว่าบิน แล้วกะยามนอน กะเฮ็ดหม่องนอนนำพื้นดิน ข้างกอหญ้า เป็นหม่อง ต่องหล่อง แต่งแหล่ง เป็นที่สังเกตุได้ว่า หม่องได๋ เป็นหม่องที่นกขุ่มนอน เมื่อเฮาฮู้ธรรมชาติดังนั้นแล้ว กะเลยมีวิธี หานกขุ่ม ได้หลายๆวิธี เช่น

    1.การห่างนกขุ่ม[/b][/b] อุปกรณ์ที่ต้องมี กะคือ ซิง เป็นซิงห่างนกขุ่ม ซึ่งสิมีขนาดน้อยกว่าซิงห่างไก่ การไปหาห่างนกขุ่มนี่ เฮาจะต้องมีการสำรวจก่อนว่า หม่องได๋ ดอนได๋ มีฮอยนกขุ่มมาหากิน เฮาจั่งค่อยไปห่าง ห่างนำหม่องฮอยมันหากินนั่นหละ แต่ว่าต้องใช้ซิงหลายๆอันจักหน่อย ห่างลัดกันไว้ ผู้ลังคนกะเอาข้าวเปลือก หรือข้าวสารไปโฮย ล่อไว้กะมี ผู้ลังคนกะฮ้อง เฮ็ดเสียงนกขุ่มอืด ฮ้อง อืด อืด ล่อมันมากะมีคือกัน บางทีต้องรอคอยเป็นค่อนมื้อกะมีกว่าสิห่างได้ แต่มื่อได๋หมาน ห่างคาวเดียวกะได้แล้ว

    2.การไต้นกขุ่ม อุปกรณ์ที่ต้องมีกะคือ ไฟส่องสว่าง อาจสิเป็น แบตเตอรี่ หรือตะเกียงแก๊ส กะได้ อีกอย่างหนึ่งกะคือแห แห ตึกปลานี่หละ เอาใว้ไปหว่านเอานกขุ่ม การไปหาไต้นกขุ่มกะต้องไปหาเบิ่งหม่องฮอยมันนอนไว้แต่ยามกังเว็น อย่างที่เฮาฮู้ว่านกขุ่ม มันนอนอยู่นำพื้นดิน หม่องได๋มีกอหญ้า กอเฟียง หรือนำแจคันแทนา เฮากะเอาไฟไปหาแยงเบิ่ง ถ้าเห็นมันนอน กอดจอด แกดแจด อยู่กะให้ใช้แหหว่าน คลุมเอาเลย วิธีนี่สิได้นกขุ่มทีละหลายโต เพราะว่ามันสิมักนอน อยู่เป็นกลุ่ม ทีละสามสี่โต ::)::)::)

    3.การไล่นกคุ่ม วิธีนี่วัยรุ่นชอบใช้ แต่ส่วนใหญ่สิไปไล่นกขุ่มโดยบังเอิญ เวลาไปหาไล่แย้ คล้องกะปอม ย่างไปเห็นนกขุ่มบินปี๊ออกจากกอหญ้า กะแล่นไล่เลย นกขุ่มมันเป็นนกที่บินบ่ได้ไกล้ บินแต่ละครั้ง ข้ามได้ท่งนาเดียว พอบินลงงานนาแล้ว กะแล่นต่อไปอีก งานนาหนึ่ง เวลาคนแล่นนำไปทัน มันกะสิบินต่ออีก คนกะแล่นไล่อีก บินบ่เกินสามสีครั้งนกขุ่มมันกะสิเหมิดแฮง บินต่บ่ได้ พอคนแล่นนำทันกะย่างเลาะหาใกล้ๆหม่องนกขุ่มบินลง กะสิเห็น นกขุ่มหมอบอยู่ กะคุบเอาเลย วิธีนี้ ผู่เฒ่าใช้บ่ได้ เพราะว่า กว่านกขุ่มสิเหมิดแฮง คนกะสิเป็นลมก่อน

    พอเอาได้นกขุ่ม มาแล้ว กะจัดการหลกขนให้หล่อนๆ แล้วกะลนไฟให่ขนน้อยมันออกดี หลังจากนั้นกะผ่าท้องแบ๋ขี้ออกให้เรียบร้อย แต่ระวังแหน่เด้อ ยามเปิดฝาข่องออก ค่อยๆเปิด เดี๋ยวนกขุ่มบินหนี สิได้กินลาบก้านกล้วยใส่ขี่เขียงเด้…

    วิธีการเฮ็ดลาบนกขุ่ม กะบ่ยาก เฮ็ดคล้ายๆลาบแย้นั่นหละ กะคือ ต้องเอานกขุ่มไปปิ้งก่อนจั่งเอามาฟักให้แหลก ถ้าได้บ่หลายกะไปหาตัดก้านกล้วย มาฟักใส่จั่ง สี่ห้าก้าน แต่ว่าบ่ต้องขูดขี่เขียงใส่นำเด้อ มันสินัวโพด ต้มน้ำปลาแดกคน แล้วกะปรุงคือวิธีปรุงลาบ นั่นหละ แต่อย่าลืมเด้อ ข้าวคั่ว ต้องคั่วใหม่เด้อ มันจั่งหอม แล้วกะอย่าลืม ซอยใบเว่อร์ ใส่นำมันจั่งค่อยหอม

    ปรุงแล้วกะหาลงกินเลย เก็บผักมากินกับหลายๆ ท้องสิบ่ได้ผูก แต่ผักกระโดน อย่าสะกินหลาย มันฝาด
    คุ่ยลาบนกขุ่ม คำใหญ่ๆ โฮ้ …แซบอีหลี… แมงตาแตก เฮ็ดจั่งได๋กินกะแซบ….

  2. #2
    นักปราชญ์เมืองอีสาน
    ศิลปินนักแต่ง ผญา
    สัญลักษณ์ของ ศรีสะท้าน
    วันที่สมัคร
    Aug 2006
    กระทู้
    4,311
    โฮ..ของมักตั้วนี้แมะ ทิดคำศรีมักไปหาห่างกับไปต่อนกคุ่ม สมัยเป็นบ่าว มีเทื่อหนึ่งไปนำกันหลายคนตั้ว อาวเซียง บ่าวท็อป แล้วกะสาวนาง (ผู้หลกขน) ได้มาแล้วให้ข้อยเป็นผู้ลาบ หมู่นั้นเพิ่นหล่ะนั่งโสกัน กินเหล่า กินเบียร์ถ้า พะนะ ฟักนกแ ล้วๆงวกหาก้านกล้วยกะบ่อมี เลยย่างลงเฮือนไปหาตัดก้านกล้วยนวล(ยวน) ซั่วสิได้ผั่นอยู่เฮือนแม่ใหญ่ไหมพู้น ลักเอาดอกเลาแพง กลับมาซุมนี้กะยังโสเหล่กันอยู่ซานเฉย บาดเข้าไปในครัว ฮึ้..เขียงแปนอาดหลาด เห็นแต่แมวนั่งเลียปากอยู่แจฝา ฮ่วยย ตายซื่อๆ ตัดสินใจฟักก้านกล้วยซั้นแหลว ขูดขี้เขียงใส่พร้อม เฮ็ดแล้วๆ กะหาออกมาสู่เพิ่นกิน...อิ อิ อิ...ลาบนกเจ้าคือเป็นจางๆอ้ายศรี พะนะ เพิ่นว่า...โอ๊ยย นกยามนี้มันบ่อมันดอก ต้องยามเกี่ยวเข่า พอเว้าแล้วข้อยกะทำท่ายากซั้นแหล่ว..ข้อยคิอสิไข่นี้หล่ะ ปวดหัวหลายขอเมือนอนก่อนเด้อ สงสัยผิดกลิ่นนกคุ่ม ข้อยคือสิบ่อกินนำหมู่เจ้าดอก อิ อิ อิ ..ปล่อยคนกินลาบก้านกล้วยซะซั้นแหลว..เว้ามาอยากหัวหลาย เหอ ๆ ๆ

  3. #3
    ร่วมถ่ายทอดความรู้สู่สังคม สัญลักษณ์ของ บ่าวดอนโบม
    วันที่สมัคร
    Sep 2007
    กระทู้
    1,552
    ยกมาแม้ ลาบนกขุ่มนั่นแมะ มา มา มา ยกมา ถ่ากินยุ

  4. #4
    ดูแลตรวจสอบเนื้อหา สัญลักษณ์ของ แหลวแดง
    วันที่สมัคร
    Mar 2008
    กระทู้
    2,194
    หายากโพด ลาบนกกะทาแทนได้บ่คับ

  5. #5
    เจ้าหน้าที่ประชาสัมพันธ์ สัญลักษณ์ของ หล่อร้อยเมตร
    วันที่สมัคร
    Feb 2007
    กระทู้
    1,944
    กินนำบ่ได้ดอก ย่านผิดกะบูน ::)

  6. #6
    หนุ่มเมืองสาเกตนคร
    Guest
    เป็นนกที่บ่มีให้เห็นหลายปานใด๋แต่ขั้นเห็นแล้วก็บ่จ้งไว้ปานใด๋ ลาบนั่นแหล่วม่องมันแซบ ::)

กฎการส่งข้อความ

  • You may not post new threads
  • You may not post replies
  • You may not post attachments
  • You may not edit your posts
  •